Ստորգետնյա «ֆեոդալները»․ ինչպես է Մետրոպոլիտենի տնօրենը չարաշահել պաշտոնը

Ազգային անվտանգության ծառայությունն այս տարվա սկզբին ստուգումներ սկսեց «Կարեն Դեմիրճյանի անվան Երևանի մետրոպոլիտեն» ՓԲԸ-ում: Շրջանառվող լուրերի համաձայն՝ այնտեղ հայտնաբերվել են չարաշահումներ, հարուցվել է քրեական գործ: Լուրեր տարածվեցին, թե այդ չարաշահումները կապված են Մետրոպոլիտենի արդեն նախկին տնօրեն Փայլակ Յայլոյանի և նրա որդու՝ Արտակ Յայլոյանի հետ։

Ո՞վ է Փայլակ Յայլոյանը

Փայլակ Յայլոյանը երկար տարիներ զբաղեցրել է Մետրոպոլիտենի տնօրենի պաշտոնը` 2001-2003 թթ․ և 2007-ից մինչև 2019 թ․ մայիսի 20-ը, երբ Յայլոյանը սեփական դիմումի հիման վրա ազատվեց զբաղեցրած պաշտոնից։ 

Տնօրեն աշխատելու տարիներին Յայլոյանը Մետրոպոլիտենի տարածքների մի մասը անհամեմատ ցածր գնով վաճառել և վարձակալության է հանձնել սեփական որդուն։  

Մետրոյի վարչական շենքի մի մասը՝ Յայլոյանի որդուն

«Կարեն Դեմիրճյանի անվան Երևանի Մետրոպոլիտեն» ՓԲԸ-ի դիմումի հիման վրա Երևանի նախկին քաղաքապետ Տարոն Մարգարյանի որոշմամբ 2014 թ․ փետրվարի 7-ին Մ․ Բաղրամյան պողոտա 76 հասցեի մի մասին տրվել է առանձին՝ Մ․ Բաղրամյան պողոտա, 76 շենք, շինություն հ. 2 հասցեն։

Մոտ մեկ ամիս անց՝ մարտի 4-ին, Մետրոպոլիտենն առքուվաճառքի պայմանագիր է կնքել տվյալ պահին տնօրեն հանդիսացող Փայլակ Յայլոյանի որդու՝ Արտակ Յայլոյանի հետ՝ վերջինիս վաճառելով նոր հասցե ստացած Մ․ Բաղրամյան 76 շենքի թիվ 2 շինությունն ամբողջությամբ։ 923,7 քմ տարածքը Մետրոպոլիտենը Յայլոյանին վաճառել է ընդամենը 75,4 մլն դրամով կամ 158 հազար դոլարով։

Արդեն մարտի 31-ին Մետրոպոլիտենի և Արտակ Յայլոյանի միջև կնքվել է անշարժ գույքի բաժանման պայմանագիր, ըստ որի՝ ընդհանուր սեփականության իրավունքով կողմերին պատկանող 0,19459 հա հողամասը բաժանվել է կողմերի միջև։ 

Դրանից 18 օր անց՝ ապրիլի 18-ին, Արտակ Յայլոյանն արդեն իրեն պատկանող տարածքի մի հատվածը՝ 64 քմ, վաճառել է Պողոս Գևորգի Փլավչյանին ընդամենը 1 մլն 100 հազար դրամով։ Նշենք, որ Պողոս Փլավչյանը 2009-2013 թթ. եղել է Երևանի ավագանու «Բարգավաճ Հայաստան» խմբակցության անդամ։

Սակայն հունիսի 5-ին այս պայմանագիրը լուծվել է, քանի որ առուվաճառքի ենթակա գույքի մի մասը պատկանում էր նաև «Երևանի Մետրոպոլիտենին»։ Արդեն 2 շաբաթ անց՝ հունիսի 18-ին, նշված տարածքը, այնուամենայնիվ, վաճառվել է Պողոս Փլավչյանին, այս անգամ որպես վաճառող հանդես են եկել «Երևանի Մետրոպոլիտենն» ու Արտակ Յայլոյանը։ Նոր պայմանագրով գնորդը կողմերին 64 քմ-ի համար պարտավորվել է վճարել արդեն 4 մլն դրամ։

Այնուհետև Արտակ Յայլոյանն իրեն պատկանող տարածքը մաս-մաս վարձակալության է տվել մի քանի կազմակերպությունների՝ «Մետրոքլաբ» ՍՊԸ-ին՝ ամսական 100 հազար դրամով (94,9 քմ), «Ֆելիզ գրուպ» ՍՊԸ-ին՝ 500 հազար դրամով (593,6 քմ) և «Նամաստե Ինդիա» ՍՊԸ-ին՝ 1 մլն 215 հազար դրամով (221,4 քմ)։

Արտակ Յայլոյանը՝ Մետրոպոլիտենի շենքի վարձակալ

Փայլակ Յայլոյանը Երևանի մետրոպոլիտենի վարչական շենքի մի մասը որդուն վաճառելուց զատ՝ որպես վարձակալ վերջինիս է տրամադրել վարչական շենքի մեկ այլ հատված ևս։ Այսպես, 2016 թվականի մայիսի 30-ին Երևանի մետրոպոլիտենի և Արտակ Յայլոյանի միջև կնքվել է անշարժ գույքի վարձակալության պայմանագիր, որով վերջինիս է տրամադրվել Բաղրամյան 76 հասցեում (Մետրոպոլիտենի վարչական շենքում) գտնվող 74 քմ տարածք՝ 148 հազար դրամ ամսական վարձավճարով։

Երեք շաբաթ անց կողմերի միջև կնքվել է նոր պայմանագիր, որով ավելացվել է Արտակ Յայլոյանին հատկացվող տարածքը՝ դառնալով 78,9 քմ՝ 157 800 դրամ վարձավճարով։ Այսինքն՝ յուրաքանչյուր 1 քմ-ի համար Փայլակ Յայլոյանի որդին Մետրոպոլիտենին պարտավորվել է վճարել 2000 դրամ: 

Մինչդեռ, «Կարեն Դեմիրճյանի անվան Երևանի մետրոպոլիտեն» ՓԲԸ տնօրենների խորհրդի 01․11․2011 թ․ թիվ 4 որոշմամբ սահմանվել էր Մետրոպոլիտենի կայարաններում և հարակից տարածքներում գործունեություն ծավալելու ամսական նվազագույն վարձավճարը։ Ըստ այդ որոշման՝ մետրոյի կայարանների համար սահմանվել էին հետևյալ ամսական վարձակալական նվազագույն վճարները։

Սակայն տնօրենների խորհրդի նույն որոշմամբ՝ Մետրոպոլիտենի վարչական և կապի շենքերում ու դրանց հարակից տարածքներում գործունեություն ծավալելու համար որպես վարձակալության նվազագույն վճար սահմանվել է 2000 դրամ՝ 1 քմ-ի համար։ 

Փաստացի, Արտակ Յայլոյանի կողմից վարձակալվող տարածքը գտնվում է Մետրոպոլիտենի վարչական շենքի տարածքում (Մարշալ Բաղրամյան 78), ինչի հետևանքով էլ Յայլոյանը վճարում է ընդամենը 2000 դրամ (մյուս տարածքների դեպքում, ինչպես երևում է աղյուսակում, վարձավճարներն ավելի բարձր են)։ Հետաքրքիր է, որ այս պայմանագրով Փայլակ Յայլոյանն իր որդուն տարածքները տրամադրել է մինչև 2040 թվականը։

Յայլոյանների անշարժ գույքը

Փայլակ Յայլոյանը Մետրոպոլիտենում աշխատել է 28 տարի: Ըստ կադաստրային փաստաթղթերի՝ Յայլոյանին է պատկանում Երևանի Այգեձոր փողոցի 78/1 շենքում գտնվող 2 բնակարան և Ձորաղբյուրում գտնվող հողամաս։ Վերջինս երկու որդիների հետ հանդիսանում է նաև Իսակովի պողոտայում գտնվող 50/1 շենքում գտնվող բնակարանի սեփականատեր։

Յայլոյանի ավագ որդին՝ Արտակը, ինչպես նշեցինք, հանդիսանում է Մետրոպոլիտենի վարչական շենքի մի մասի անհատույց օգտագործող, իսկ մյուս մասի` բաժնային սեփականատեր։ Բացի այդ, Արտակ Յայլոյանը բնակարան ունի Երևանի Մարգարյան փողոցի 6-րդ շենքում, երկու հողամաս Նոր-Նորքի Քոչինյան փողոցում։ Բացի այդ, հանդիսանում է Կոտայքի մարզի Առինջ գյուղի Պարույր Սևակի թաղամասում գտնվող բնակելի տան ընդհանուր բաժնային սեփականատեր։

Փայլակ Յայլոյանի կրտսեր որդին՝ Վահագն Յայլոյանը, որը Երևանի մետրոպոլիտենում զբաղեցրել է «Երթևեկություն» մասնաճյուղի կոմերցիոն բաժնի գովազդի գծով տնտեսագետի պաշտոնը, Երևան քաղաքի Բյուզանդի 17 նորակառույց էլիտար շենքում ունի 3 բնակարան, Կոտայքի մարզի Առինջ գյուղի Պարույր Սևակի թաղամասում գտնվող բնակելի տան ընդհանուր բաժնային սեփականատեր է։

Քրեական գործ՝ ԱԱԾ-ում

Նշենք, որ 2019 թ․ մարտից ԱԱԾ քննչական դեպարտամենտում քննվող քրեական գործի շրջանակում կալանք է դրված Արտակ Յայլոյանին պատկանող Բաղրամյան պողոտա 76/2 հասցեում գտնվող 923,7 քմ մակերեսով անշարժ գույքի վրա։ 

Նախաքննական մարմինը պարզել է, որ 2014-ին Երևանի մետրոպոլիտենը տնօրենի պաշտոնը զբաղեցնող Փայլակ Յայոլյանին որդուն՝ Արտակ Յայլոյանին, Բաղրամյան պողոտայում գտնվող նշված տարածքն օտարել է կադաստրային արժեքից ցածր գնով՝ 75,393,360 դրամ։ Փայլակ Յայլոյանին մեղադրանք է առաջադրվել Քրեական օրենսգրքի 179-րդ հոդվածի 3-րդ մասի 1-ին կետով և 214-րդ հոդվածի 2-րդ մասով, այն է՝ առանձնապես խոշոր չափերով յուրացում և իր կամ ուրիշ անձանց օգտին լիազորությունների չարաշահում, որը կազմակերպության կամ պետության իրավունքներին ու օրինական շահերին էական վնաս է պատճառել կամ առաջացրել է ծանր հետևանքներ։

Սևադա Ղազարյան

 

[easy-social-share buttons="facebook,twitter,vk,telegram" counters=1 style="icon" point_type="simple"]