Պաշտոնյաների համոզմամբ ամենում մեղավոր են լրագրողները

Օրերս Գյումրիում վարչապետի ու տեղացի լրագրողների հարց ու պատասխանի տեսանյութը տարակարծություն առաջացրեց մեդիա դաշտում: Կարեն Կարապետյանին բարկացնող հարցեր ուղղող լրագրողներին ոչ պրոֆեսիոնալ վարքագծի մեջ սկսեցին մեղադրել նույնիսկ այն լրագրողները, ովքեր անկախ են իշխանություններից: Լրագրողական ինքնաքննադատությունն ու ինքնակրթվելու մղումը, իհարկե, կարելի էր ողջունել, եթե հիշողության մեջ դեռևս թարմ չլինեին երկրի նախագահի և այլ բարձրաստիճան պաշտոններ զբաղեցնող անձանց մեղադրանքները՝ ուղղված լրագրողներին:

Հիշեցնենք, «Ամեն ինչում լրագրողներն են մեղավոր» թեզը շրջանառության մեջ դրվեց Բաղրամյան 26-ում՝ 2013 թվականի նախագահական ընտրություններից հետո Սերժ Սարգսյանի՝ ընտրյալ ԶԼՄ-ների ներկայացուցիչներին տված հարցազրույցով: «Արտագաղթի բուն պատճառը հենց էդ գաղջ մթնոլորտն է, որովհետև մարդիկ լույս չեն տեսնում, հույս չեն տեսնում: Ինչո՞ւ: Որովհետև երկար տարիների ընթացքում առնվազն 2 հեռուստաընկերություն, տասնյակ տպագիր և էլեկտրոնային լրատվամիջոցներ խոսում են միայն վատ երևույթների մասին, միայն սևացնում են»:

Սերժ Սարգսյանն իր խոսքում մատնանշել էր իր համար անցանկալի լրատվամիջոցներին: Այսինքն՝ նա ոչ բոլորին էր մեղադրել գաղջ մթնոլորտի տարածման մեջ, այլ միայն նրանց, ովքեր քիչ թե շատ դուրս են «Բ26»-ի վերահսկողությունից:

Սարգսյանի՝ լրագրողներին մեղադրելու միտքը շարունակել էր ոստիկանության պետը՝ լրագրողներին ասելով, թե ոստիկանությունն ընդունում է  իր սխալները, իսկ լրագրողներից շատերը չեն տեսնում իրենց սխալները: «Բարեփոխվեք, սիրելիներս, բարեփոխվեք, դուք շատ հին եք մնացել: Դուք դեղնում եք, գունաթափվում եք»,- ասել էր Վլադիմիր Գասպարյանը:

Լրագրողների հասցեին մեղադրանք են հնչեցրել նաև ԱԺ փոխխոսնակ Հերմինե Նաղդալյանը, ՀՀԿ-ական պատգամավորներ Արթուր Գևորգյանը, Աշոտ Աղաբաբյանը, Վերահսկիչ պալատի նախկին նախագահ Իշխան Զաքարյանը և նույնիսկ ընդդիմադիր Սասուն Միքայելյանը:

Ավելին, լրագրողներին մեղադրելու մոլուցքը հասավ այնտեղ, որ նույնիսկ Հայաստանի ֆուտբոլի ազգային հավաքականի նախկին գլխավոր մարզիչը հավաքականի անհաջողությունների համար լրագրողների հանդեպ մեղադրանք հնչեցվեց. «Երևի այդ վատ մթնոլորտը, որ տիրում է ձեր մեջ, այ դրանից է, որ ամբողջ թիմը վնասվածքների մեջ է»։

Եվ ի վերջո, լրագրողներին կշտամբելու հարցում իր համեստ ներդրումն ունեցավ նաև նորաթուխ վարրչապետ Կարեն Կարապետյանը: «Դուք էլ մի քիչ ձեր տրամադրությունը փոխեք, չի՛ կարելի այդպիսի տրամադրությամբ երկիր փոխել… մի քիչ ժպտացեք, այ մարդ, ինչքան ջղայն եք սաղդ»,- Գյումրիում հայտարարել էր գործադիրի ղեկավարը:

Հատկանշական է, որ վարչապետի ելույթին հետևեցին քննարկումներ, որոնցից դատելով՝ պաշտոնյաների հետ այս հարցում համամիտ էին նաև մի շարք լրագրողներ:

Հ.Գ. Հիշեցնենք, որ 2016 թվականին Մամուլի ազատության ինդեքսում Հայաստանը 180 երկրներից 74-րդ տեղում է: Հայաստանն այս ինդեքսում շատ ավելի բարենպաստ հորիզոնական է զբաղեցնում, քան հարևան Ադրբեջանը (163), Թուրքիան (151) ու Հայաստանի ռազմավարական գործընկեր Ռուսաստանը (148): Եվ նման բարձր ցուցանիշ Հայաստանի համար ապահովում են հենց այն լրատվամիջոցներն ու լրագրողները, որոնք «գաղջ մթնոլորտ են տարածում», «ամեն ինչում վատն են տեսնում» և բարկացնող հարցեր են տալիս վարչապետին ու մյուսներին:

Արման Ղարիբյան

[easy-social-share buttons="facebook,twitter,vk,telegram" counters=1 style="icon" point_type="simple"]