Կարո՞ղ է Բագրատ Սրբազանը դառնալ ՀՀ վարչապետ՝ ըստ ՀՀ Սահմանադրության

Այսօր Բագրատ արքեպիսկոպոս Գալստանյանն անհնազանդության երթի ընթացքում լրատվամիջոցների հետ զրույցում, պատասխանելով իր՝ վարչապետի թեկնածու դառնալու մասին հարցին, նշել է, որ «եթե ժողովուրդը ցանկանա, դա լինի Աստծո կամքը, և Հայոց հայրապետը օրհնի, ես ո՞վ եմ, որ ասեմ չէ»։

Նա նաև հայտարարել է, որ չի թաքցնում, որ երկքաղաքացի է և ունի նաև Կանադայի քաղաքացիություն։ Կանադայի անձնագիրը, ըստ Գալստանյանի, իրեն տրվել է Կանադայում հոգևոր ծառայություն իրականացնելու 10 տարիների ընթացքում և ավելի շատ ճանապարհորդական նշանակություն ունի։ 

Արդյո՞ք երկքաղաքացիություն ունեցող անձը կարող է դառնալ ՀՀ վարչապետ

ՀՀ Վարչապետը, ըստ Սահմանադրության 147-րդ հոդվածի, հանդիսանում է Կառավարության անդամ, իսկ ըստ ՀՀ Սահմանադրության 148-րդ հոդվածի՝ «Կառավարության անդամը պետք է բավարարի պատգամավորին ներկայացվող պահանջները»:

ՀՀ Սահմանադրության 48-րդ հոդվածի համաձայն էլ՝ Ազգային ժողովի պատգամավոր կարող է ընտրվել քսանհինգ տարին լրացած, վերջին չորս տարում միայն Հայաստանի Հանրապետության քաղաքացի հանդիսացող, վերջին չորս տարում Հայաստանի Հանրապետությունում մշտապես բնակվող, ընտրական իրավունք ունեցող և հայերենին տիրապետող յուրաքանչյուր ոք:

Այսպիսով, ՀՀ վարչապետը, ինչպես Ազգային ժողովի պատգամավորը, ըստ Սահմանադրության, չի կարող լինել երկքաղաքացի, այլ միայն ՀՀ քաղաքացի:

Անդրադառնալով Սահմանադրության այս արգելքին՝ Բագրատ Սրբազանը նշել է․ «Հիմա եթե ժողովուրդը որոշի Սահմանադրության մեջ ներկայություն ունենալ ու երկքաղաքացի մարդուն ասել, որ ինքն էլ կարող է վարչապետ լինել, ձեր ի՞նչ գործն է»։

Այդուհանդերձ, Բագրատ Գալստանյանը, ըստ ՀՀ Սահմանադրության, չի կարող վարչապետ դառնալ, քանի որ վերջին չորս տարիներին հանդիսանում է և՛ Կանադայի, և՛ ՀՀ քաղաքացի։

Արփինե Հովհաննիսյան

[easy-social-share buttons="facebook,twitter,vk,telegram" counters=1 style="icon" point_type="simple"]