Euronews-ը Փաշինյանի և հոգևորականի բանավեճը սխալ է ներկայացրել, սակայն ժամեր անց որոշ ուղղումներ արել

Եվրոպայում միջազգային լուրերի հեռարձակող Euronews-ը հունիսի 26-ին անդրադարձել է Հայաստանի ներքաղաքական իրավիճակին, սխալ ներկայացրել Փաշինյան-հոգևորականներ վեճի մի դրվագը, ինչպես նաև ոչ ճշգրիտ պնդում արել։ Սակայն ավելի ուշ՝ մոտ երեք ժամ անց, եվրոպական առաջատար լրատվամիջոցն ուղղել է սխալը։

Մասնավորապես, հոդվածի առաջին տարբերակում Euronews-ը (հեղինակ՝ Գեվին Բլեքբըրն (Gavin Blackburn)) ներկայացնում է վարչապետ Նիկոլ Փաշինյանի և Զարեհ քահանա Աշուրյանի հեռակա բանավեճը և նշում․ «․․․Նիկոլ Փաշինյանը ընդունել է հոգևորականի մարտահրավերը՝ ապացուցելու, որ թլփատված է, մի երևույթ, որը տարածված է Հայաստանի քրիստոնյաների շրջանում» (հոդվածի հին տարբերակը կարող եք կարդալ այստեղ–խմբ․):

Եվրոպական խոշորագույն լրատվամիջոցներից մեկը, սակայն, սխալվում է․ Հայաստանի քրիստոնյաների շրջանում թլփատումը ոչ միայն տարածված երևույթ չէ, այլ նման բան ընդհանրապես չկա։ 

Լրատվամիջոցը, այդուհանդերձ, ուղղել է սխալը և հանել այդ պնդումը՝ նշելով․ «Փաշինյանը արձագանքել է Հայ-առաքելական եկեղեցու ներկայացուցչին՝ ասելով, որ ինքը պատրաստ է ապացուցել, որ թլփատված չէ»։

Թլփատումը, նշենք, վիրաբուժական միջամտություն է, որի ժամանակ հեռացվում է տղամարդու սեռական օրգանի գլխիկը ծածկող մաշկային ծալքը: Այն կիրառվում է տարբեր նպատակներով՝ կրոնական, մշակութային կամ առողջապահական։ 

Եթե հրեաների ու մահմեդականների շրջանում թլփատումը մասսայական է, ապա քրիստոնեության մեջ այն տարածում չունի։ Հատկապես հայաստանցիների շրջանում թլփատումը տարածված երևույթ չէ։ Թլփատում կարող են կատարել միայն որոշ բացառիկ դեպքերում՝ առողջական կամ ազգային փոքրամասնությունների պարագայում (օրինակ՝ եզդիներ, մուսուլմաններ)։

Euronews-ի այլ ուղղումները 

Բացի վերը նշվածից, Euronews-ը այլ ուղղումներ ևս կատարել է հրապարակված հոդվածում։ Մասնավորապես, լրատվամիջոցը սխալ է ներկայացրել Փաշինյանի մեջբերումը՝ գրելով․ «․․․Նիկոլ Փաշինյանն ընդունել է հոգևորականի մարտահրավերը՝ ապացուցելու, որ թլփատված է․․․»։

Մինչդեռ, երբ հոգևորականը, ակնարկելով Փաշինյանին, հայտարարել էր, թե «Առաքելական Սուրբ Եկեղեցին պետք է րոպե առաջ մաքրել Սուրբ Դրոշմի կնիքը թլպատության նշանով փոխած կեղծ «հավատացյալներից», Փաշինյանն իր ֆեյսբուքյան էջում արձագանքել էր այսպես․ «Կտրիճ Ներսիսյանի խոսնակը հրապարակում է արել, թե ես իբր թլպատված եմ։ Պատրաստ եմ ընդունել Կտրիճ Ներսիսյանին ու իր խոսնակին և ապացուցել հակառակը»։

Այս կոնտեքստի փոփոխության արդյունքում փոփոխվել է նաև Euronews-ի վերնագիրը, և նոր տարբերակում շեշտվել է հենց չթլփատված լինելու հանգամանքը։ 

Հոդվածագիրը Հայ-առաքելական եկեղեցին սկզբում ներկայացրել էր օրթոդոքս (ուղղափառ),  այնուհետև փոխել՝ շեշտելով «առաքելական» բառը։ 

Նկատենք, որ հոդվածի նոր տարբերակում նշվում է, որ Հայաստանի վարչապետի աշխատակազմի կողմից տրամադրված պարզաբանումներից հետո հոդվածը թարմացվել է։ 

Ի դեպ, Euronews-ի հոդվածի նախնական տարբերակի շեշտադրմամբ նյութեր օրեր առաջ տարածել էին նաև ռուսական լրատվական դաշտում։ 

Հասմիկ Համբարձումյան

[easy-social-share buttons="facebook,twitter,vk,telegram" counters=1 style="icon" point_type="simple"]