FIP.am-ը հերքում է ապատեղեկատվություն տարածելու մեղադրանքը

ՀՀ վարչապետի աշխատակազմի «Հանրային կապերի և տեղեկատվության կենտրոն» ՊՈԱԿ-ի հիմնադրած Տեղեկատվության ստուգման կենտրոնն անդրադարձել է FIP.am-ի՝ Հայաստանի արտաքին պետական պարտքի մասին ուսումնասիրությանը՝ այն որակելով որպես ապատեղեկատվություն։ Խմբագրությունը հերքում է, որ նպատակ է ունեցել որևէ կերպ ապատեղեկատվություն տարածելու և ընդունում է, որ օրերս ՀՀ կառավարության ֆեյսբուքյան պաշտոնական էջով հանրությանը ներկայացրած հաղորդագրությունը մասնակի ճիշտ է։ Մասնավորապես, «2019-ի հունիսի դրությամբ, վերջին 15 ամիսների ընթացքում Հայաստանի արտաքին պետական պարտքը նվազել է 120 մլն դոլարով կամ 2.1%-ով» պնդումը ճիշտ է։

Իսկապես, Փաստերի ստուգման հարթակի իրականացրած ուսումնասիրության մեջ առկա է եղել թվաբանական սխալ, ինչի առթիվ ներողություն ենք խնդրում մեր ընթերցողներից։ 15 ամիսների Հայաստանի արտաքին պետական պարտքի դինամիկան հաշվելու համար որպես սկզբնական կետ վերցված 2018 թ․-ի ապրիլի 30-ի տվյալի փոխարեն պետք է ներկայացվեր նույն տարվա մարտի 31-ի տվյալը, ինչպես որ արված էր կառավարության հրապարակած տեղեկատվության մեջ։

Փոխարենը՝ ՀՀ կառավարության՝ «2015-ից ի վեր առաջին անգամ արձանագրվել է արտաքին պետական պարտքի նվազման միտում» պնդումը, որը կրկնվում է նաև Հայաստանի վարչապետի աշխատակազմին կից գործող ՊՈԱԿ-ի կողմից հիմնադրված Տեղեկատվության ստուգման կենտրոնի կողմից, բացահայտ մանիպուլյացիա է։

Փաստացի, Հայաստանի արտաքին պետական պարտքի նվազման միտում արձանագրվել է 2018-ի ապրիլին (մարտի համեմատ շուրջ 41 մլն դոլարի նվազում), հետևաբար՝ հետհեղափոխական կառավարությունը փորձում է իրեն վերագրել Սերժ Սարգսյանի, ապա նաև վարչապետի ժամանակավոր պաշտոնակատար Կարեն Կարապետյանի ղեկավարությամբ գործող ՀՀ կառավարության՝ արտաքին պետական պարտքի մարումը ևս։ Բացի այդ, վերջին 15 ամիսներին արտաքին պետական պարտքի մարմանը զուգահեռ նույն ժամանակահատվածում մեծացել է երկրի ներքին պետական պարտքը։ Արտաքին և ներքին պետական պարտքերի արդյունքների համադրությունը բացասականորեն է ազդում ընդհանուր պետական պարտքի վրա. այն գնալով աճում է և ոչ ամենևին նվազում։

Այսպիսով, ակնհայտ է, որ ՀՀ կառավարության կողմից միջանկյալ հատվածում արտաքին պետական պարտքի մարմանն ու դրա որոշակի նվազմանն անդրադառնալը, այնտեղ անգամ նախահեղափոխական, 2018-ի ապրիլ-մայիս ամիսներին «մերժված» կառավարության գործունեությամբ պայմանավորված դրական արդյունքը ներառելը և դա որպես 2015-ից հետո առաջին անգամ նկատելի բացառիկ միտում որակելը բացահայտ մանիպուլյացիա է՝ հաշվի առնելով այն հանգամանքը, որ 2019-ին Հայաստանը 512 մլն դոլարով պիտի ավելացնի պետական պարտքը, որից 21 մլն դոլարը` Կենտրոնական բանկի գծով:

[easy-social-share buttons="facebook,twitter,vk,telegram" counters=1 style="icon" point_type="simple"]