«Ապօրինի հրամանների գաղտնալսման»՝ Փաշինյանին վերագրվող ձայնագրությունը կեղծ է, ԱԲ-ով գեներացված

Այսօր՝ հունիսի 26-ին, «Չորրորդ իշխանություն» կայքը տարածել է յութուբյան 1991TV կոչվող ալիքի մի տեսանյութ՝ ներկայացնելով այն որպես Հայաստանի Հանրապետության վարչապետ Նիկոլ Փաշինյանի՝ ՀՀ իրավապահ մարմիններին տրված ապօրինի հանձնարարականների գաղտնալսում։ 

«Համացանցում շրջանառվում է մի գաղտնալսում, որից պարզվում է, որ «հիբրիդային պատերազմի» մասին գործը ամբողջությամբ թխված է իրավապահների կողմից՝ վարչապետ Նիկոլ Փաշինյանի ապօրինի հրամաններով: Հրապարակելով այդ ձայնագրությունը՝ դիմում ենք ՀՀ գլխավոր դատախազին՝ ձայնագրության իսկությունը անհապաղ քննելու և այն հաստատելու դեպքում Փաշինյանի նկատմամբ անհապաղ քրեական հետապնդում սկսելու պահանջով»,- գրել է կայքը։ 

Տեսանյութում, որի հիման վրա կայքը նման պնդումներ է արել, Փաշինյանի նկարն է ու նրա ձայնը՝ կասկածելի առոգանությամբ։ 

«Փաստերի ստուգման հարթակն» այդ ձայնագրությունը ստուգել է արհեստական բանականությամբ գեներացված տեսաձայնագրությունները հայտնաբերող երկու գործիքների միջոցով և պարզել, որ այն կեղծ է՝ deepfake։

Այսպես, համաձայն Deepware հարթակի վերլուծության՝ տեսանյութում հայտնաբերվել է deepfake․ մասնավորապես, արհեստական բանականությամբ գեներացված լինելու հավանականությունը գնահատվում է 96%: 

Մեկ այլ՝ attestiv.com հարթակը վերլուծել է տեսանյութում լսվող ձայնն ու դրան տվել է կասկածելի կարգավիճակ՝ գնահատելով ԱԲ-ով գեներացված լինելու հավանականությունը 58%։ 

FIP.am-ը ChatGPT-ին ևս խնդրել է վերլուծել ձայնը․ դրա տրամադրած ակուստիկ պրոֆիլի համաձայն ևս՝ արհեստական ​​բանականության կողմից ստեղծված կամ փոփոխված լինելու հավանականությունը մեծ է։ Մասնավորապես, ձայնի մոտավոր բարձրությունը (~50 Հց) ավելի ցածր է, քան բնորոշ է մարդու խոսքին, ինչպես նաև բացակայում է բնական խոսքին բնորոշ տոնի փոփոխականությունը (դինամիկան)։ Փոխարենը նկատվում է ձայնի կանոնավոր դինամիկա, ինչը բնորոշ է հենց ԱԲ-ով գեներացված խոսքին։   

Այսպիսով, «Չորրորդ իշխանության» տարածած՝ Փաշինյանին վերագրվող ձայնագրությունը կեղծ է՝ գեներացված ԱԲ-ի միջոցով։ Հետևաբար, պնդումը, թե այն ապօրինի հանձնարարականների մասին գաղտնալսում է, փաստահեն չէ։ 

Նանե Մանասյան

[easy-social-share buttons="facebook,twitter,vk,telegram" counters=1 style="icon" point_type="simple"]