Արմեն Աշոտյանը ստում է. Սերժ Սարգսյանը հստակ ասել է, որ պատրաստ է թողնել 7 շրջանները

Հանրապետական կուսակցության փոխնախագահ Արմեն Աշոտյանն այսօր՝ նոյեմբերի 26-ին, «ՍիվիլՆեթում» Արշալույս Մղդեսյանի հետ հարցազրույցում պնդել է, թե երրորդ նախագահ, ՀՀԿ առաջնորդ Սերժ Սարգսյանը Լեռնային Ղարաբաղի կարգավիճակի դիմաց 7 շրջան զիջելու մասին ուղիղ հայտարարություն չի արել։  

Հարցազրույցում անդրադարձ է կատարվում Լեռնային Ղարաբաղի հիմնախնդրին, ներկայիս իշխանությունների քաղաքականության և զիջողականության թեզին։

Լրագրողի դիտարկմանը, որ Սերժ Սարգսյանը 2011-ին Կազանում ասել է, որ պատրաստ է  զիջել 7 տարածքներ, ինչի մասին 2016-ին հայտնել է նաև ռուս լրագրող Դմիտրի Կիսելյովի հետ հարցազրույցում, Արմեն Աշոտյանը հակադարձում է, որ դա սխալ է։ 

«Սերժ Սարգսյանը չի ասել, որ պատրաստ է եղել, ասել է՝ «они думали, что мы готовы», դուք լրագրող եք․․․ «они думали, что мы готовы», մի հատ լսեք, լրիվ ուրիշ իմաստային բան ա ասել»,— պնդում է Աշոտյանը։

«Փաստերի ստուգման հարթակը» որոշեց ստուգել Աշոտյանի այս պնդումը՝ ուսումնասիրելով  2016 թվականի նոյեմբերի 17-ին «Սպուտնիկ» հեռուստաընկերությանը տված հարցազրույցի այն հատվածը, որտեղ Սերժ Սարգսյանը խոսում է կարգավիճակի դիմաց զիջումների մասին։  

Սերժ Սարգսյանը հստակ ասել է

Հարցազրույցում Սերժ Սարգսյանը, անդրադառնալով Լեռնային Ղարաբաղի հարցի  կարգավորմանն առնչվող՝ Դմիտրի Կիսելյովի հարցին, մասնավորապես, ասել էր․ «Մենք հանդիպեցինք Մայենդորֆում և ստորագրեցինք փաստաթուղթ, որի համաձայն` Լեռնային Ղարաբաղի խնդիրը պետք է լուծվի միայն քաղաքական ճանապարհով։ Հետո բանակցային գործընթացը շարունակվեց, և մենք մի քանի անգամ մոտ էինք այն փաստաթուղթը ստորագրելուն, որտեղ բոլոր այդ 3 սկզբունքները հստակ արտացոլված էին։ Այսինքն` հայկական կողմերը` Լեռնային Ղարաբաղն ու Հայաստանը, թողնում են այն տարածքները, որոնք վերցված են որպես անվտանգության գոտի, այն տարածքները, որոնք ադրբեջանցիներն անվանում են բռնազավթված՝ ադրբեջանական 7 շրջանները։ Թողնում ենք տարածքները, հեռանում»,- հայտարարել էր Սարգսյանը։

Կիսելյովի հարցին, թե հայկական կողմը պատրա՞ստ է վերադառնալու այդ փաստաթղթին և այն գործող համարել, նա պատասխանել էր. «Մենք պատրաստ ենք այդ երեք սկզբունքների հիման վրա գնալ խնդրի կարգավորմանը, բայց միայն՝ այդ երեք սկզբունքների հիման վրա»:

Այսպիսով, կարող ենք արձանագրել, որ Սերժ Սարգսյանը, ինչպես Արմեն Աշոտյանն է պնդում, չի ասել, որ նրանք կարծում էին, թե մենք պատրաստ ենք զիջումների, այլ հստակ ասել է, որ «այն տարածքները, որոնք ադրբեջանցիներն անվանում են բռնազավթված՝ 7 ադրբեջանական շրջանները, մենք պատրաստ էինք թողնել, հեռանալ»։

Այսպիսով, Արմեն Աշոտյանի պնդումը չի համապատասխանում իրականությանը։

Նելլի Լազարյան

[easy-social-share buttons="facebook,twitter,vk,telegram" counters=1 style="icon" point_type="simple"]