Կառավարությունը դադարել է սոցհարցումներ պատվիրել. «Հրապարակի» հոդվածի հետքերով

«Հրապարակ» օրաթերթը սեպտեմբերի 26-ին գրել էր, որ ըստ պաշտոնական գաղտնի հարցումների՝ Փաշինյանի վարկանիշն իջել է։

«Ինչպես հայտնի է, իշխանությունը պարբերաբար գաղտնի սոցհարցումներ է անում՝ պարզելու քաղաքական ուժերի և տարբեր գործիչների ռեյտինգները, ներքին օգտագործման համար…

Նախօրեին համացանցում հայտնվեց հերթականը, ըստ որի՝ Նիկոլ Փաշինյանի ռեյտինգն իջել է և հասել 25 տոկոսի։ Սակայն, մեր տեղեկություններով, այս թիվը հեռու է իրականությունից։ Պաշտոնական գաղտնի խողովակներով մոտ մեկ ամիս առաջ արված հարցումների արդյունքներով՝ Փաշինյանի ռեյտինգը 45 տոկոսի շրջանակներում է եղել»,- գրել էր օրաթերթը՝ հավելելով, որ հարցումն արվել է մինչև ուժայինների վերջին հրաժարականները և ԱՄՆ այցը։

Հրապարակի այս հոդվածը վերահրապարակել էին տասնյակ լրատվական կայքեր՝ Tert.am-ը, 168.am-ը, News.am-ը, Yerkir.am-ը և այլն։ 

«Փաստերի ստուգման հարթակը» փորձեց հասկանալ, թե ինչ հարցումներ է պատվիրել կառավարությունը վերջին ամիսներին, և արդյո՞ք օրաթերթի նշած տեղեկությունը համապատասխանում է իրականությանը։

Ի՞նչ սոցհարցումների մասին է խոսքը

Նախորդ իշխանությունը պարբերաբար սոցիալական հարցումներ էր պատվիրում մասնավոր ընկերություններին՝ կառավարության աշխատանքի արդյունավետությունը, իշխանությունների գործունեության վերաբերյալ հանրային տրամադրությունները չափելու համար։ Ե՛վ Տիգրան Սարգսյանի, և՛ Հովիկ Աբրահամյանի, և՛ Կարեն Կարապետյանի վարչապետության ժամանակ նման հարցումներ իրականացվել են։ Այդ հետազոտությունները սովորաբար կատարում էր Breavis հետազոտական ընկերությունը (նախկինում IPSC)։ Կառավարությունը 2010-ից 2017 թվականներին ընկերությանը պատվիրել է իրականացնել սոցիալական հարցումներ՝ կառավարության գործունեության, կյանքի որակի, մարզերի հիմնախնդիրների վերաբերյալ։ 2010-2016 թթ. այդ հարցումներին պետական բյուջեից վճարվել է մոտ 530 մլն դրամ կամ 1.1 մլն դոլար։ 

Ինչպիսի՞ իրավիճակ է նոր կառավարության ժամանակ 

«Հրապարակը» պնդում է, որ իրենց տեղեկություններով՝ իշխանությունների կողմից արված հարցումները ցույց են տվել Նիկոլ Փաշինյանի 45 տոկոսանոց վարկանիշ։ Հասկանալու համար, թե արդյո՞ք լրատվականի տեղեկատվությունը ճիշտ է, և արդյո՞ք կառավարությունը ներկայում ևս իրականացնում է սոցիալական հարցումներ՝ Fip.am-ը դիմեց կառավարության աշխատակազմ։ Այնտեղից մեզ հայտնեցին, որ այս տարի՝ 2019-ին, կառավարությունը որևէ սոցիալական հարցում չի պատվիրել։ Կառավարության տեղեկատվության և հասարակայնության հետ կապերի բաժնի պետի պաշտոնակատար Արմեն Խաչատրյանը Fip.am-ի հետ զրույցում մանրամասնեց, որ նախկինում սոցհարցումների համար կառավարության աշխատակազմում միջոցներ նախատեսված են եղել բյուջեում, սակայն 2019 թ. բյուջեից այդ տողը հանված է. 

«Վարչապետի աշխատակազմը սոցիալական հարցումներ պատվիրելու պրակտիկայից հրաժարվել է»,- պարզաբանեց Խաչատրյանը։

Մենք հետաքրքրվեցինք, թե արդյո՞ք կառավարության կամ վարչապետին կից մարմինները, օրինակ՝ «Հանրային կապերի և տեղեկատվության կենտրոն» ՊՈԱԿ-ը իրականացրել է նման աշխատանք։ Արմեն Խաչատրյանը մեզ հայտնեց, որ ՊՈԱԿ-ը նույնպես նման հարցումներ չի կատարել կամ պատվիրել։ 

Այլ սոցհարցումներ

Հայաստանի քաղաքական կյանքի և իշխանության վարկանիշի վերաբերյալ վերջին հարցումը հրապարակել էր Միջազգային հանրապետական ինստիտուտը (International Republican Institute, IRI) դեռևս հուլիսին։ Ըստ այդ հարցման՝ Նիկոլ Փաշինյանի վարկանիշը 72 տոկոս էր: Այս հարցումից հետո որևէ կառույցի կողմից Հայաստանում իշխանությունների վարկանիշի վերաբերյալ սոցիոլոգիական հարցում չի հրապարակվել։

[easy-social-share buttons="facebook,twitter,vk,telegram" counters=1 style="icon" point_type="simple"]