Իլոն Մասկը Լուկաշենկոյին մեքենա չի նվիրել

Սեպտեմբերի 2-ին ուսումնական նոր տարվա առիթով Բելառուսի Հանրապետության նախագահ Ալեքսանդր Լուկաշենկոն այցելել էր Մինսկի N93 դպրոց, որտեղ աշակերտները, կարևորելով էլեկտրական տրանսպորտի դերն ու շրջակա միջավայրի պահպանությունը, հետաքրքրվել էին էլեկտրոտրանսպորտով, մեքենաների ու հեծանիվների վարձույթով (8:35ր):

Անդրադառնալով բարձրացված հարցին՝ Լուկաշենկոն ասել էր, որ ինքն ունի էլեկտրական «Տեսլա» մեքենա և որ այդ մեքենան իրեն նվիրել է ամերիկացի գյուտարար ու գործարար Իլոն Մասկը՝ «Տեսլա Մոթորս» ընկերության հիմնադիրը։ «Ես էլեկտրական մեքենա՝ «Տեսլա» ունեմ, որը երբեմն փորձարկում եմ: Մասկն է նվիրել»,— մասնավորապես, հայտարարել էր Լուկաշենկոն։ Ավելին, Բելառուսի նախագահը մանրամասնել էր, որ Մասկը տեսել է իրեն էլեկտրական հեծանիվ վարելիս։  «Տեսնելով ինձ մոտոցիկլետով՝ ասել էր՝ «ձեր նախագահը երկանիվ մոտոցիկլետ է վարում»: Դա մեր՝ Մինսկի գործարանի արտադրած էլեկտրոնային մոտոցիկլետն էր: Իհարկե, «Տեսլայի» նման 180 կմ/ժ արագություն չունի, բայց շատ հաճելի է»,- ասել էր Բելառուսի նախագահը:

Լուկաշենկոյի այս հայտարարությունը բուռն քննարկումների առիթ էր դարձել երկրում, ինչից հետո՝ սեպտեմբերի 6-ին, Белорусский партизан-ն անդրադարձել էր թեմային և Twitter սոցիալական ցանցում «Ո՞վ է իրականում նվիրել Լուկաշենկոյին 165 000 դոլար արժողությամբ էլեկտրական մեքենա» վերնագրով հրապարակում արել: Այստեղ էլ օգտատերերից մեկը Մասկին հարցրել էր՝ արդյո՞ք նա է Լուկաշենկոյին մեքենա նվիրել։ Մասկը, ի պատասխան, պաշտոնապես հերքել էր այդ տեղեկատվությունը: 

Ըստ էության, սակայն, ապատեղեկատվությունը սկիզբ է առել բելառուսական CTB հեռուստաալիքից, որից հետո մի շարք լրատվամիջոցներով տարածվել է Լուկաշենկոյի հայտարարությունն ու Իլոն Մասկի հերքումը (PEN TB, Meduza, currenttime.tv, HB, auto.tut.by, BBC): 

Հիշեցնենք, որ դեռ 2017 թվականին Լուկաշենկոն փորձարկել էր Tesla S P100D մոդելը, ապա Գոմելի մարզ կատարած աշխատանքային ուղևորության ընթացքում խոսելով էլեկտրական տրանսպորտային միջոցների արտադրության մասին՝ ասել, որ այդ մեքենայով զարգացրել է  280կմ/ժ արագություն՝ վախենալով, որ այն կարող է «թռչել»: Մինչդեռ, այս մոդելի արագությունը չի կարող գերազանցել 250 կմ/ժ-ը:  

Այսպիսով, Բելառուսի բազմամյա նախագահ Ալեքսանդր Լուկաշենկոն առաջին անգամը չէ, որ շփոթություն է առաջացնում իր հանրության մեջ «Տեսլա» մեքենաների վերաբերյալ։

Մարջան Չոբանյան

[easy-social-share buttons="facebook,twitter,vk,telegram" counters=1 style="icon" point_type="simple"]