«Գազպրոմ Արմենիան» իրարամերժ պատասխաններ է տալիս սակագնի շուրջ բանակցությունների մասին

Գազի սակագնի փոփոխության հարցը դեռևս մնում է կառավարության և «Գազպրոմ Արմենիայի» քննարկման օրակարգում։ Տարեվերջին Նիկոլ Փաշինյանի հայտարարությունից հետո կառավարությունը հայտարարեց, որ տարեսկզբի առաջին աշխատանքային օրվանից սկսած բանակցություններ են տեղի ունենալու «Գազպրոմ Արմենիայի» հետ՝ երկրում սակագների բարձրացումը զսպելու համար։

Հունվարի 10-ին «Ազատության» հետ զրույցում «Գազպրոմ Արմենիա» ընկերության լրատվական բաժնից տեղեկացրել էին, որ ՀՀ կառավարության լիազորած մարմնի, կարգավորող մարմնի և «Գազպրոմ Արմենիա» ՓԲԸ-ի միջև՝ շահագրգիռ հասարակական կազմակերպությունների և համապատասխան մասնագետների մասնակցությամբ անցկացվում են քննարկումներ (բանակցություններ)՝ գազի սակագների կառուցվածքում ներառվելիք՝ ընկերության սակագնային մարժայի մեծության վերաբերյալ փոխհամաձայնեցված որոշումներ ընդունելու առումով:

Ավելի մանրամասն տեղեկություն ստանալու համար Fip.am-ը նույն օրը՝ հունվարի 10-ին, հարցում ուղարկեց «Գազպրոմ Արմենիա»՝ մասնավորապես, քննարկումներին մասնակցող հասարակական կազմակերպությունների անունները և քանակը իմանալու համար։

«Գազպրոմ Արմենիայի» պատասխանը, սակայն, որոշակի հակասություն է առաջացնում լրատվականին տված մեկնաբանության հետ։ Բանն այն է, որ հարցման պատասխանում նշվում է, որ դեռևս նախնական քննարկումներն են տեղի ունենում, որին մասնակցում են միայն էներգետիկայի բնագավառում ՀՀ կառավարության լիազորած մարմինը, ՀՀ հանրային ծառայությունները կարգավորող հանձնաժողովը և «Գազպրոմ Արմենիա» ՓԲԸ-ի համապատասխան մասնագետները։ Նախնական քննարկումներից հետո, երբ կհստակեցվեն կողմերի դիրքորոշումները, ընկերությունը քննարկումներ կանցկացնի նաև շահագրգիռ հասարակական կազմակերպությունների հետ։ Մինչդեռ, լրատվամիջոցին տված մեկնաբանության մեջ  չի նշվում, որ այս պահին ընթացող քննարկումները կրում են նախնական բնույթ և միայն դրանից հետո են սպասվում այլ բանակցություններ ևս։

Պատասխանում նաև նշվում է, որ մինչ օրս որևէ հասարակական կազմակերպություն կամ համապատասխան մասնագետ վերը նշված քննարկումներին մասնակցելու ցանկություն առ այսօր չի հայտնել։

Հ․Գ․ «Գազպրոմ Արմենիան» իր պատասխանում նաև նշում է, որ քննարկումներին (բանակցություններին) ընկերության միջնորդությամբ կհրավիրվեն նաև «Իրազեկ քաղաքացիների միավորման» ներկայացուցիչները, թեև մենք մեր կազմակերպությունը բանակցային գործընթացներին ներգրավվելու առնչությամբ ոչինչ չէինք գրել։

Կարինե Կիրակոսյան

[easy-social-share buttons="facebook,twitter,vk,telegram" counters=1 style="icon" point_type="simple"]