ՓԱՍՏԱՉԱՓ
Խոշորացույց
Թիվ-թվանք
Տեսանյութեր
հյ
ру
en
Այսօր՝ հուլիսի 25-ին «Ազատություն» ռադիոկայանի եվրոպական ծառայությունը կեղծ տեղեկություն է տարածել Հայաստանի Սյունիքի մարզով անցնող ճանապարհի վերաբերյալ ռեպորտաժում։
Դրա հեղինակ Կիան Շարիֆին, որը ներկայանում է որպես փորձագետ, խոսելով ճանապարհի աշխարհաքաղաքական նշանակության մասին՝ այն անվանում է «Զանգեզուրի միջանցք»։
«2020 թվականին շատ փխրուն խաղաղության համաձայնագիրը խոստանում էր նոր ճանապարհ՝ Զանգեզուրի միջանցքը՝ ուղիղ Հայաստանի տարածքով։ Մոսկվան դրան աջակցում է. դա նշանակում է պատժամիջոցներից զերծ առևտրային ուղի նրանց համար», — մասնավորապես ասել է լրագրողը՝ նկատի ունենալով Արցախյան 44-օրյա պատերազմի արդյունքներով ստորագրված նոյերմբերի 9-ի եռակողմ հայտարարությունը։
Այդ հայտարարության որևէ կետում գոյություն չունի ՀՀ տարածքով անցնող որևէ միջանցքի կամ կոնկրետ երթուղու մասին հիշատակում։
Դրա 9-րդ կետը սահմանում է միայն տարածաշրջանային կոմունիկացիաների ապաշրջափակում․
«9. Ապաշրջափակվում են տարածաշրջանում բոլոր տնտեսական և տրանսպորտային կապերը: Հայաստանի Հանրապետությունը երաշխավորում է Ադրբեջանի Հանրապետության արևմտյան շրջանների և Նախիջևանի Ինքնավար Հանրապետության միջև տրանսպորտային հաղորդակցության անվտանգությունը՝ քաղաքացիների, տրանսպորտային միջոցների և բեռների՝ երկու ուղղություններով անխոչընդոտ տեղաշարժը կազմակերպելու նպատակով: Տրանսպորտային հաղորդակցության նկատմամբ վերահսկողությունն իրականացվում են Ռուսաստանի ԱԴԾ սահմանապահ ծառայության մարմինները:
Կողմերի միջև համաձայնեցմամբ՝ ապահովվելու է Նախիջևանի Ինքնավար Հանրապետությունն Ադրբեջանի արևմտյան շրջանների հետ կապող նոր տրանսպորտային հաղորդակցությունների շինարարությունը»։
Հայաստանը բազմիցս պաշտոնապես հայտարարել է, որ պատրաստ է տրամադրել Ադրբեջանին ճանապարհ՝ բացառապես տարածքային ամբողջականության, ինքնիշխանության, ինչպես նաև փոխադարձության սկզբիւնքի հիման վրա։
Ինչ վերաբերում է ՀՀ Սյունիքի մարզով անցնող ճանապարհի վարձակալման ամերիկյան առաջարկին, ապա «Փաստերի ստուգման հարթակն» ամփոփել էր դրա վերաբերյալ զարգացումները։ Մենք անդրադարձել էինք նաև ի պատասխան Թուրքիայում ԱՄՆ-ի դեսպանի հնչեցրած՝ ճանապարհի վարձակալման առաջարկին, որին ի պատասխան պաշտոնական Երևանը արձագանքել էր․ «ՀՀ-ն չի քննարկել և չի քննարկում որևէ երրորդ կողմի սեփական ինքնիշխան տարածքի նկատմամբ վերահսկողությունն արտապատվիրակելը: ՀՀ տարածքի որևէ հատված չի կարող լինել ՀՀ տարածքային ամբողջականությունից, ինքնիշխանությունից, իրավազորությունից դուրս»:
Ավելին՝ Երևանը արձագանքել էր նաեւ Ադրբեջանի նախագահի այն հայտարարությանը, թե ադրբեջանցիների այսպես կոչված «Զանգեզուրի միջանցքով անցնելիս հայ սահմանների կամ որևէ մեկի չպետք է հանդիպեն»։
«Հայաստանի Հանրապետությունը երբևէ որևէ մեկի հետ չի քննարկել, չի քննարկում և չի քննարկելու Ադրբեջանի նախագահի նշած անվանաբանությունը և դրանից բխող տրամաբանությունը … Հայաստանի Հանրապետության տարածքը հատելիս մեր երկրի համապատասխան ծառայություններին չհանդիպելու որևէ տարբերակ չկա», — ասված էր պատասխանի մեջ։
Այսպիսով, «Ազատություն» ռադիոկայանի եվրոպական ծառայության լրագրողը կեղծիք է տարածում․ ՀՀ-ն ոչ միայն որևէ փաստաթղթով ու մասնավորապես նոյեմբերի 9-ի հայտարարությամբ չի պարտավորվել միջանցք տրամադրել Ադրբեջանին, այլ նաև բազմիցս պաշտոնապես բացառել է իր ինքնիշխանությունից ու տարածքային ամբողջականությունից դուրս որևէ երթուղու տրամադրումը։
Նանե Մանասյան
