Սերժ Սարգսյանի ժամանակների ոստիկանների բռնությունը վերագրվում է Փաշինյանին. հին տեսանյութը՝ նոր կեղծիքի գործիք

Ֆեյսբուքի հայալեզու տիրույթում մայիսի 6-ի ուշ երեկոյից տարածվում է Երևանի փողոցներից մեկում նկարահանված մի տեսանյութ, որում ոստիկանները՝ կարմիր բերետներով, մահակներով հարվածում ու ջարդում են քաղաքացու մեքենան։ 

Տեսանյութն ավելի քան 16 հազար անդամ ունեցող #անտինիկոլ/antinikol ֆեյսբուքյան խմբում տարածել է Արամ Հովսեփյան անունով կեղծ օգտահաշիվը՝ «ենիչերիներ, նիկոլական մուսռներ» վիրավորական մեկնաբանությամբ։ 

Ավելին՝ այն տարածող օգտատերերը վիրավորանք ու ատելության խոսք պարունակող արտահայտություններով են կիսել ու մեկնաբանել տեսանյութը։

 

Տեսանյութը, այս հոդվածի հրապարակման պահին արդեն, ֆեյսբուքյան մոտ 100 օգտատեր է կիսել, այդ թվում՝ նաև մեդիայում որպես ադրբեջանագետ ներկայացող Արմինե Ադիբեկյանը։ 

«Փաստերի ստուգման հարթակն» ուսումնասիրեց տեսանյութն ու պարզեց, որ այն հին է և նկարահանվել ու հրապարակվել է դեռևս 2018 թվականի ապրիլին՝ Թավշյա հեղափոխության օրերին։ 

Տեսանյութում երևում է, թե ինչպես են ոստիկանները ջարդում Երևանի Աբովյան փողոցը փակած մեքենան, և թե ինչպես են բերման ենթարկում անհնազանդության ակցիա իրականացնող վարորդին։ 

Հատկանշական է, որ տեսանյութը հրապարակվել է այդ թվականի ապրիլի 21-ին՝ այդ պահին խորհրդարանի կողմից դեռ նոր ընտրված վարչապետ Սերժ Սարգսյանի հրաժարականից 2 օր առաջ։ 

Փաստացի, ցանցում տարածվել է 7 տարվա վաղեմության տեսանյութ, որում տեղի ունեցողը փորձ է արվում որպես թարմ դեպք ներկայացնել՝ վերագրելով դա ՀՀ վարչապետ Նիկոլ Փաշինյանի կառավարմանը։ Մինչդեռ, ոստիկանները, որոնց հասցեին կեղծ օգտահաշիվը վիրավորանք է գրել, գործել են ՀՀ նախկին նախագահ Սերժ Սարգսյանի կառավարման ժամանակ։ 

Նանե Մանասյան 

[easy-social-share buttons="facebook,twitter,vk,telegram" counters=1 style="icon" point_type="simple"]