«ՀՀ-ն ամենաանվտանգ երկրներից է»․ պետական կառույցները հերթական անգամ վկայակոչել են սիրողական վարկանիշը

ՀՀ զբոսաշրջության կոմիտեն ֆեյսբուքյան իր պաշտոնական էջում հրապարակել է  ՆԱՄԲԵՈ (NUMBEO) համաշխարհային տվյալների բազայի վարկանիշը, համաձայն որի՝ 2025 թվականին Հայաստանը զբաղեցրել է 8-րդ տեղը աշխարհի ամենաապահով երկրների ցանկում։

Վարկանիշում Հայաստանն իսկապես հայտնվել է աշխարհի ամենաապահով երկրների տասնյակում՝ հանցավորության մակարդակի՝ 22․1 և ապահովության մակարդակի 77․9 միավորով։

Զբոսաշրջության կոմիտեն Հայաստանում առաջին գերատեսչությունը չէ, որ հղում  անելով այս վարկանիշին՝ պնդում է, թե Հայաստանն աշխարհի ամենաապահով երկրների տասնյակում է։ 

Նախկինում այս տվյալները վկայակոչել են նաև ՀՀ ներքին գործերի նախարարությունը, ՀՀ վարչապետի աշխատակազմը և այլն։ 

«Փաստերի ստուգման հարթակը» պաշտոնյաների ու գերատեսչությունների համապատասխան հրապարակումներին նախկինում անդրադարձել է․ մասնավորապես, պարզել էինք, որ NUMBEO-ն սերբական առցանց տվյալների շտեմարան է, որը չունի վստահելի հարթակի համբավ, իսկ դրա վարկանիշները կազմվում են սիրողական, ոչ պրոֆեսիոնալ մեթոդաբանությամբ․ դրանք հիմնված չեն վիճակագրական ճշգրիտ տվյալների կամ ծանրակշիռ փորձագիտական վերլուծությունների վրա: 

FIP.am-ը պարզել էր, որ NUMBEO-ի ցուցանիշները կազմվում են օգտատերերի աջակցությամբ և նրանց անանուն առաջարկությունների հիման վրա: 

Երևանը՝ ամենաանվտանգ քաղաքների շարքում. Չախոյանը ոչ արժանահավատ վարկանիշ է մեջբերում

 

Մեթոդաբանության մեջ հստակ նշվում է, որ բաժնի տվյալները ստացվել են կայքի այցելուների կողմից անցկացված հարցումներից։  

«Կարևոր է նշել, որ NUMBEO-ի կողմից տրամադրվող հանցավորության ինդեքսը հիմնված է օգտատերերի կողմից տրամադրված տվյալների և ընկալումների վրա, որոնք կարող են տարբերվել պաշտոնական պետական վիճակագրությունից։ Ինդեքսը ծառայում է որպես համեմատական գործիք՝ տարբեր քաղաքների կամ երկրների հարաբերական անվտանգության գնահատման համար՝ օգնելով մարդկանց կայացնել տեղեկացված որոշումներ և հասկանալ հանցավորության իրավիճակը կոնկրետ վայրերում»,- նշվում է մեթոդաբանության մեջ։

Նույն հարթակը ավելի վաղ էլ մեր տարածաշրջանում միջին աշխատավարձերի ոչ ճշգրիտ տվյալներ էր հրապարակել, որոնք ևս հայտնվել էին հայաստանյան տեղեկատվական տիրույթում․ FIP.am-ը պարզել էր, որ դրանք ևս ոչ ճշգրիտ ցուցանիշներ են։ 

Այսպիսով, պետական գերատեսչությունները մի քանի տարի անընդմեջ պնդում են, թե Հայաստանն աշխարհում բարձր դիրք է զբաղեցնում ամենաանվտանգ երկրների շարքում՝ հղում անելով ոչ պատշաճ ու սիրողական մեթոդաբանությամբ, այսինքն՝ կայքի այցելուների հայեցողությամբ կազմվող վարկանիշի վրա։ 

Նանե Մանասյան 

[easy-social-share buttons="facebook,twitter,vk,telegram" counters=1 style="icon" point_type="simple"]