Արձանագրված 124 դեպք․ ինչպես է աշխատում ձմեռային անվադողերի պարտադիր պահանջը

Հայաստանի Հանրապետության կառավարության 2024 թվականի նոյեմբերի 28-ի նիստում ընդունված՝ N 955-Ն որոշման մեջ փոփոխությունների համաձայն՝ ձմեռային անվադողերով երթևեկելու պարտադիր պահանջ սահմանվեց․ մասնավորապես, արգելվում է առանց ձմեռային անվադողերի մեքենաների շահագործումը նոյեմբերի 15-ից մինչև մարտի 31-ը ներառյալ։  

Որոշումն ուժի մեջ է մտել նախորդ տարվա դեկտեմբերի 10-ից։ 

Տարածքային կառավարման և ենթակառուցվածքների նախարար Դավիթ Խուդաթյանը նշել էր, թե գրանցվող ՃՏՊ-ների պատճառներից է նաև վարորդների կողմից եղանակային պայմաններին չհամապատասխանող անվադողերով երթևեկելը․ «Ներկայում գործող ճանապարհային երթևեկության գործող կանոններում բացակայում է ձմեռային անվադողերով երթևեկելու պահանջը, ուստի առաջարկում ենք ճանապարհային երթևեկության կանոնների՝ տրանսպորտային միջոցների շահագործումն արգելող անսարքությունների և պայմանների ցանկում ավելացնել նոր պայմաններ, որոնց առկայության դեպքում կարգելվի տրանսպորտային միջոցների շահագործումը»:

«Փաստերի ստուգման հարթակը» պարզել է, թե որքան է կազմել առանց ձմեռային անվադողերի երթևեկելու արձանագրված դեպքերի թիվը։

Այսպես, Ներքին գործերի նախարարությունը FIP.am-ին հայտնել է, որ որոշման՝ ուժի մեջ մտնելուց ի վեր արձանագրվել է առանց ձմեռային անվադողերով երթևեկելու ընդհանուր առմամբ 124 դեպք, որից 66-ը՝ նախորդ՝ 2024 թվականի դեկտեմբեր ամսին, 58-ը՝ ընթացիկ 2025 թվականի հունվարին։ 

Հատկանշական է նաև, որ ՀՀ ՆԳՆ ոստիկանության Պարեկային ծառայությունում առկա է թվով 860 չափիչ սարք, որոնց օգնությամբ որոշվում է տրանսպորտային միջոցների անվադողերի մաշվածությունը։ 

Նանե Մանասյան

[easy-social-share buttons="facebook,twitter,vk,telegram" counters=1 style="icon" point_type="simple"]