Բաքվի քարոզչական ռեսուրսը հայկական քաղաքացիական հրաձգարանը որպես ահաբեկիչների վարժական կենտրոն է ներկայացրել

Ադրբեջանական CBC հեռուստաընկերությունը ռեպորտաժ է պատրաստել Հայաստանում գործող ARM Tactical քաղաքացիական հրաձգարանի վերաբերյալ՝ պնդելով, թե այնտեղ «ահաբեկիչներ ու զինյալներ են վարժանքներ անցկացնում»։ 

Քարոզչական այս ռեսուրսը պնդել է, թե իբր կենտրոնի հրահանգիչների և վարժանքներին մասնակցողների ինքնությունը «խիստ գաղտնի է պահվում»՝ որպես դրա վկայություն օգտագործելով կենտրոնի սոցիալական մեդիայում մարքեթինգային նպատակներով արված տեսանյութում օգտագործված կադրերը, որոնցում մարզվողներն ու հրահանգիչները դիմակավորված են։ 

«Փաստերի ստուգման հարթակն» այցելել է ARM Tactical կենտրոն, նկարահանել տարածքն ու զրուցել կենտրոնի տնօրեն և ավագ հրահանգիչ Հրայր Ավետիսյանի հետ։ Նա ներկայացրել է կենտրոնի բաց ու թափանցիկ գործունեությունը՝ հերքելով ադրբեջանական քարոզչամեքենայի ստերը։  

Կենտրոնի գործունեությունը, ծառայությունների տեսակներն ու արժեքները ներկայացված են սոցիալական ցանցերում՝ Facebook-ում և  Instagram-ում։ 

Ահաբեկիչները 2-րդ արցախյան պատերազմում

Ռեպորտաժում պնդում է արվում, որ նախկինում Հայաստանը ևս նման «ահաբեկիչների» է պատրաստել, որոնք մասնակցել են Արցախյան երկրորդ պատերազմին։ Ադրբեջանական կողմը չունի որևէ փաստ ու ապացույց, որ հայկական զինված ուժերից բացի, ռազմական գործողություններին ներգրավված են եղել ահաբեկիչներ։ 

Նշենք, որ վարձկանների ներգրավումը միջազգային իրավունքի խախտում է 1990 թվականին ընդունված Վարձկանների հավաքագրման, օգտագործման, ֆինանսավորման և ուսուցման դեմ միջազգային կոնվենցիայով։ 

Փաստերն ու միջազգային կառույցները, սակայն, հակառակն են պնդում․ Բաքուն է Թուրքիայի օգնությամբ պատերազմական գործողություններին ներգրավել վարձկան ահաբեկիչների։ 

Այս փաստը հաստատել են ՄԱԿ մարդու իրավունքների փորձագետները, Եվրոպայի խորհուրդը, ինչպես նաև ԵԽ խորհրդարանական վեհաժողովը։ 

Ավելին, 44-օրյա պատերազմին մասնակցած երկու սիրիացի վարձկանները՝ Մուհռաբ Մուհամմադ ալ-Շխերին և Յուսեֆ Ալաբեդ ալ-Հաջին, Հայաստանում դատվել են միջազգային ահաբեկչության, զինված ընդհարումների ժամանակ միջազգային մարդասիրական իրավունքի նորմերի լուրջ խախտումների, վարձկանության հոդվածներով։ 

10,000 դասալիքի պնդումը

Քարոզչական ռեսուրսը նաև, առանց որևէ հստակ աղբյուրի հղման, պնդել է, թե պատերազմի ժամանակ հայկական կողմից մոտ 10,000 դասալիք է եղել։ FIP.am-ը նախկինում անդրադարձել է այս պնդմանը։ 

Վարչապետ Նիկոլ Փաշինյանի կինը՝ Աննա Հակոբյանը, 2023 թ․ ապրիլի 1-ին Տավուշի մարզի Աճարկուտ գյուղում, զոհված զինծառայող Դավիթ Շահնազարյանի անվան խաղահրապարակի բացման արարողության ժամանակ հայտարարել էր, ապա 2 անգամ կրկնել, որ  44-օրյա պատերազմի ընթացքում ունեցել ենք 11 հազար դասալիք։

Աննա Հակոբյանի այս հայտարարությունից օրեր առաջ նմանատիպ միտք էր հնչեցրել նաև Ադրբեջանի նախագահ Իլհամ Ալիևը։ «Մեր բանակում չի եղել ոչ մի դասալիք։ Հայկական բանակում, վերջին տվյալներով, եղել է ոչ թե 10 հազար, այլ 11 հազար դասալիք»,- հայտարարել էր նա։

«Փաստերի ստուգման հարթակը» հարցում էր ուղարկել Դատախազություն՝ խնդրելով տրամադրել պատերազմի օրերին դասալքության վերաբերյալ եղած տվյալները։ Համաձայն դրանց, դասալքության հոդվածով այդ պահի դրությամբ մեղադրյալի կարգավիճակ ուներ 756 անձ, որոնցից միայն 64 անձի վերաբերյալ էր կայացվել դատական ակտ։ Փաստացի, 10,000 կամ 11 հազար դասալիքների վերաբերյալ պնդումն անհիմն է։ 

Նանե Մանասյան

[easy-social-share buttons="facebook,twitter,vk,telegram" counters=1 style="icon" point_type="simple"]