Վարչապետը չի սխալվել․ հայտարարագրման համակարգում կլինեն նորամուծություններ

«Փաստերի ստուգման հարթակը» փետրվարի 3-ին «Կրթական խմբակների վճարը չի վերադարձվի․ Նիկոլ Փաշինյանը սխալ է ներկայացրել սոցիալական ծախսի մեխանիզմը» վերնագրով հրապարակման մեջ սխալ է ներկայացրել իրավիճակը։ Պատճառը հունվարի 31-ին մամուլի ասուլիսում վարչապետի ոչ լիարժեք հայտարարությունն էր։ Վարչապետը, պարզվում է, խոսել է հայտարարագրման համակարգում առաջիկայում սպասվող նորամուծությունների մասին։ Սակայն նրա խոսքում այդ մասին հիշատակում չկա, ինչն էլ մեզ մոտ որոշ տարընթերցում է առաջացրել։

Խոսքը հայտարարագրման համակարգում սոցիալական վճարի վերադարձի մասին է։ Եթե այս տարի 2024 թվականի համար ֆիզիկական անձը ունի հայտարարագիր ներկայացնելու պարտավորություն, ապա կարող է օգտվել սոցիալական ծախսի փոխհատուցումից միայն այն դեպքերում, երբ 2024 թվականի ընթացքում իր կամ իր ընտանիքի անդամի համար Հայաստանում գործող ապահովագրական որևէ ընկերությունից ձեռք է բերել առողջության ապահովագրական փաթեթ կամ Հայաստանում գործող՝ կրթական ծրագրեր իրականացնող հաստատությունում կատարել է ուսման վճար։ 

Գործող կարգի համաձայն, կրթության գծով փոխհատուցումից անձը կարող է օգտվել, եթե կրթական ծախսերը կատարվել են նախադպրոցական, տարրական, հիմնական, միջնակարգ, նախնական մասնագիտական (արհեստագործական), միջին, բարձրագույն և հետբուհական մասնագիտական կրթական ծրագրերի համար։ Ուսման վճարի մասով կատարված ծախսերի համար պետք է ուսումնական հաստատությունից պահանջել հաշվարկային փաստաթուղթ։ Ըստ Պետական եկամուտների կոմիտեի պարզաբանման, եթե երեխան սովորում է վճարովի մանկապարտեզում, դպրոցում կամ բուհում, ապա տվյալ դեպքում նրա ծնողները կարող են օգտվել սոցիալական ծախսի փոխհատուցման հնարավորությունից, իսկ «եթե վճարը կատարվել է արվեստի, երաժշտական դպրոցում կամ մարզադպրոցում սովորելու կամ մասնավոր դասընթացներին մասնակցելու համար, ապա տվյալ ծախսը փոխհատուցման ենթակա չէ»։ 

Առաջարկվող փոփոխությամբ, որի մասին Նիկոլ Փաշինյանը խոսել է իր ասուլիսից մեկ օր առաջ, կառավարության նիստում, ընդլայնվում է այս ցանկը և ներառվում են նաև արտադպրոցական ծառայությունները։

«Մենք հիմա նաև հետևյալն ենք անում, այս  որոշումները վերաբերվելու են ոչ միայն 2026 թվականին, այսինքն՝ 2025 թ. հայտարարագրի համար, այլև հիմա՝ առաջիկայում լրացվող հայտարարագրերին 2024 թվականի ծախսերի համար։ Մենք մտածում ենք, որ այդ սոցիալական կրեդիտների համակարգում պետք է ներառենք և կներառենք նաև արտադպրոցական ծառայությունները, մասնավորապես՝ երաժշտական դպրոցներ, նկարչական խմբակ, պարի խմբակ,  սպորտային խմբակներ և այլն»,- հունվարի 30–ին կառավարության նիստում ասել է վարչապետը։

Խնդիրն այն է, որ Նիկոլ Փաշինյանը այս մասին չի հիշատակել ասուլիսում, թեպետ երկար խոսել է ներդրվող համակարգից, ինչի արդյունքում տպավորություն է ստեղծվել, թե խոսում է արդեն գործող համակարգից։ Այդ հանգամանքն էլ տարընթերցման առիթ է հանդիսացել։ 

Հասմիկ Համբարձումյան

 

[easy-social-share buttons="facebook,twitter,vk,telegram" counters=1 style="icon" point_type="simple"]