Hollywood տառերը և բլուրը կրակի մեջ լուսանկարը, որը տարածում է հայկական մեդիան, կեղծ է

Սոցիալական տարբեր հարթակներում բազմաթիվ լուսանկարներ են տարածվում, որոնց հեղինակները պնդում են, թե Հոլիվուդի հայտնի խորհրդանիշը՝ Hollywood գրությունը, կրակի մեջ է: Այդ լուսանկարը «Այրվում է հայտնի Հոլիվուդ գրությամբ բլուրը» և նմանատիպ բովանդակությամբ մեկնաբանություններով տարածել են նաև հայկական որոշ լրատվականներ (1, 2, 3, 4, 5):

«Փաստերի ստուգման հարթակը» ուսումնասիրել է և պարզել, որ այդ լուսանկարը կեղծ է։

ԱՄՆ Կալիֆոռնիա նահանգի անտառտնտեսության և հակահրդեհային պաշտպանության վարչությունը իր պաշտոնական կայքէջում Live ռեժիմում ներկայացնում է այն տարածքները, որոնք հրդեհի ճիրաններում են, և տեղեկացնում, որ այդ տարածքներից մարդկանց տարհանում է իրականացվում։

Հոլիվուդի բլուրը, որտեղ տեղադրված է Հոլիվուդի խորհրդանշանը, հեռու է հրդեհի գոտուց։ 

Ինչպես նշում է Independent-ը, տառերն այս պահին ապահով են կրակից: Կրակը պետք է անցներ մայրուղին՝ տառերը վնասելու համար։ Այնուամենայնիվ, Լոս Անջելեսի հրդեհը ազդել է նշանի լուսավորության վրա, ինչն էլ, իր հերթին, ազդել է դրա տեսանելիության վրա:

X-ի օգտահաշիվներից մեկը՝ Raw Alerts-ը, որը առաջիններից է, որ անդրադարձել է հոլիվուդյան նշանի վերաբերյալ կեղծ լուրերին, հայտնել է, թե տարածվող պատկերները «ստեղծվել են արհեստական բանականության կողմից»: «Հոլիվուդի նշանը չի այրվում, թեև  նոր հրդեհ է սկսվել: Բազմաթիվ լրատվական էջեր և այլ էջեր տարածում են արհեստական բանականության ստեղծած կեղծ պատկերներ, որոնք հակառակն են պնդում: Ահա հոլիվուդյան ցուցանակի ներկայիս նկարը, որը պարզություն կմտցնի»,— ասվում է հաղորդագրության մեջ, որն ուղեկցվում է գրառումը գրելու պահին նշանի պատկերներով:

🚨#BREAKING: The Hollywood sign is not on fire, even though a new fire has started. Numerous news accounts and other pages are sharing fake AI-generated images claiming otherwise. Here’s a current live picture of the Hollywood sign to set the record straight. pic.twitter.com/kiZrzl7kD9

— R A W S A L E R T S (@rawsalerts) January 9, 2025

Ինչպես նշում է Independent-ը, օգտահաշիվը պատկերները վերցրել է վեբ-կայքից, որը նվիրված է նշանին, որին անընդհատ ուղղված է վեբ-տեսախցիկը իրական ժամանակում:

Սոցցանցերում տարածվել են նաև նկարներ, որոնք ակնհայտորեն արհեստական բանականության կողմից են ստեղծվել:

HOLLYWOOD SIGN IS ON FIRE! pic.twitter.com/3WHpliQ76x

— We the People (@WTP_REPORT) January 7, 2025

Այս նկարում պարզ երևում է, որ տառերից մեկը ավելորդ է:

Լոս Անջելեսի անտառներում հրդեհը բռնկվել է հունվարի 7-ին Լոս Անջելեսի ժամանակով մոտ 10:30-ին: Կրակն արագորեն տարածվել է քամու և չոր օդի պատճառով: Հրդեհը 5 մարդու կյանք է խլել: Կրակի մեջ են Փասադենա, Փելիսեյդ, Սանտա Մոնիկա, Մալիբու, Սիլմար բնակավայրերը։ Լոս Անջելես քաղաքում բռնկված խոշոր հրդեհից այրվել է նաև ԱՄՆ-ի «Սահակ-Մեսրոպ Հայ Քրիստոնյա» դպրոցի շենքը:

Ի դեպ, Hollywood-ի խորհրդանիշին կարելի է հետևել պաշտոնական կայքում, որում կա նաև 24/7 ռեժիմով գործող տեսախցիկ։

Այսպիսով, սոցիալական տարբեր հարթակներում տարածվող լուրերը և պատկերները, թե Հոլիվուդի հայտնի ցուցանակը այրվում է, կեղծ է։ Այդ լուսանկարները կեղծ են և պատրաստված են արհեստական բանականության միջոցով:

Սյուզաննա Համբարձումյան

[easy-social-share buttons="facebook,twitter,vk,telegram" counters=1 style="icon" point_type="simple"]