Լոռին՝ «պատմական Վրաստան». Գրառման հեղինակն այն հեռացրել է, Զուրաբիշվիլին՝ ոչ

Սոցիալական մեդիայի հայաստանյան տիրույթում օրերս տարածվում էր Վրաստանի նախագահ Սալոմե Զուրաբիշվիլիի՝ ֆեյսբուքյան օգտահաշվում արված հրապարակումը, որում Հայաստանի Լոռու մարզը ներկայացվում էր որպես «պատմական Վրաստան»։ 

Զուրաբիշվիլին կիսել էր Adjara Voyage կոչվող տուրիստական գործակալության՝ դեպի Լոռու մարզ ուղեւորության ծրագիրը, որում հայկական որոշ բնակավայրեր, եկեղեցիներ ու վանքեր ներկայացված էին որպես վրացական։    

Այս հրապարակումից հետո հայաստանյան որոշ օգտատերեր ու ԶԼՄ-ներ (1, 2) գրեցին, թե օգտահաշիվը, որում արվել է վերոհիշյալ հրապարակումը, կեղծ է և կապ չունի Վրաստանի նախագահի հետ։ 

ԶԼՄ-ները, մասնավորապես, վկայակոչում էին Զուրաբիշվիլիի պաշտոնական՝ Verified (վավերացված) կարգավիճակն ունեցող էջը՝ նշելով, որ այնտեղ որևէ նման գրառում չկա։ 

«Փաստերի ստուգման հարթակը» ուսումնասիրեց Զուրաբիշվիլիի ֆեյսբուքյան պաշտոնական էջն ու պարզեց, որ այնտեղ իսկապես չկա խնդրո առարկա գրառումը։ Միևնույն ժամանակ, սակայն, ֆեյսբուքյան անձնական օգտահաշիվը, որը կիսել է համապատասխան գրառումը, պատկանում է Զուրաբիշվիլիին։   

Այսպես, վրաստանյան փաստեր ստուգող լրատվամիջոց factcheck.ge-ն 2024 թվականի հունվարին ստուգել էր վրաստանյան տեղեկատվական տիրույթում Զուրաբիշվիլիին վերագրվող մի գրառում: 

Պարզելու համար, թե արդյո՞ք Վրաստանի նախագահը նման գրառում արել էր, թե ոչ, մեր վրաստանցի գործընկերներն ուսումնասիրել էին ոչ միայն Զուրաբիշվիլիի պաշտոնական ֆեյսբուքյան էջը, այլ նաև նրա անձնական օգտահաշիվը, որը հենց այն օգտահաշիվն է, որտեղ օրեր առաջ հրապարակվել էր հայկական տարածքները պատմական Վրաստան ներկայացնող հրապարակումը։  

Ի դեպ, FIP.am-ը նկատեց, որ ավելի ուշ Adjara Voyage գործակալության էջից գրառումը հեռացվել է:

 

Մինչդեռ, Զուրաբիշվիլիի մոտ այն շարունակում է պահպանված մնալ։ 

Նանե Մանասյան 

[easy-social-share buttons="facebook,twitter,vk,telegram" counters=1 style="icon" point_type="simple"]