Հայաստանում օրերս վտանգավոր փոթորիկ չի սպասվում․ սունկ կայքերը կեղծ լուր են տարածել

Մի շարք «սունկ կայքեր»* և սոցիալական մեդիայի էջեր հոկտեմբերի 24-ին կեղծ տեղեկություն են տարածել, թե առաջիկա օրերին Հայաստանում իբր փոթորիկ է սպասվում։ 

Այսպես, vendeto.am, hraparaknews.am, mediablog.am, erevanblog.am կայքերը, օգտագործելով «Հիդրոօդերևութաբանության և մոնիթորինգի կենտրոն» ՊՈԱԿ-ի տնօրեն, եղանակի տեսության մեկնաբան Գագիկ Սուրենյանի լուսանկարը, նույնաբովանդակ տեքստ են տարածել՝ գրելով, թե «եղանակային ծառայությունների հաղորդմամբ՝ 20:00-ից սկսած մեր երկրի տարածքում կլինի անձրևախառը փոթորիկ, որը կարող է մեծ վնաս հասցնել, եթե նախապես չպատրաստվենք»։ 

Սունկ կայքերն իրենց ընթերցողներին նաև մի շարք «խորհուրդներ են տվել»՝ նշելով, թե իբր «անհրաժեշտ է փակել լուսամուտները և դռները», «խուսափել երեկոյան ժամերին դրսում գտնվելուց, երբ փոթորիկն իր գագաթնակետին կհասնի», ինչպես նաև «պատրաստել անհրաժեշտ պարագաներ՝ լապտերներ, լիցքավորված հեռախոսներ, տաք հագուստ և անհրաժեշտ սնունդ»։

«Փաստերի ստուգման հարթակն» ուսումնասիրել է «Հիդրոօդերևութաբանության և մոնիթորինգի կենտրոն» ՊՈԱԿ-ի կայքն ու սոցիալական մեդիայի էջերն ու պարզել, որ դրանք առաջիկա օրերին Հայաստանում սպասվող փոթորիկի մասին չեն հաղորդել։ 

Մասնավորապես, համաձայն ՊՈԱԿ-ի տարածած եղանակի տեսության վերջին հաղորդագրության, հոկտեմբերի 24-ի ցերեկը, 25-ին, 28-29-ին սպասվում է առանց տեղումների եղանակ, իսկ հոկտեմբերի 26-ի երեկոյան ժամերին, 27-ի գիշերը հնարավոր է անձրև։

FIP.am-ն ուսումնասիրել է նաև ՊՈԱԿ-ի փոխտնօրեն Սուրենյանի ֆեյսբուքյան էջը ու պարզել, որ նա ևս առաջիկայում սպասվող փոթորկի մասին գրառում չի արել։ 

*«Սունկ կայքեր» ասում են տեղեկատվական տիրույթում հանկարծակի հայտնվող և որպես կանոն կարճատև կյանք ունեցող ռեսուրսներին, որոնք տարածում են հիմնականում ցածրորակ` կեղծ, մոլորեցնող, խիստ էմոցիոնալ ու սենսացիոն բնույթի բովանդակություն։ 

Դրանց նպատակը արագ տեսանելիության, մեծ քանակությամբ այցելուներ ապահովելու միջոցով գովազդից մեծ շահույթ ապահովելն է։ 

Նանե Մանասյան

[easy-social-share buttons="facebook,twitter,vk,telegram" counters=1 style="icon" point_type="simple"]