Համակենտրոնացման ճամբար Կուրսկո՞ւմ․ ՌԴ ԱԳՆ-ն հայտարարում է, բայց փաստեր չի ներկայացնում

Պաշտոնական Մոսկվան հայտարարում է, որ Ուկրաինայի զինված ուժերը Կուրսկի շրջանում ստեղծել են համակենտրոնացման ճամբարներ, որոնցում պահում են ռուս բնակչությանը, սակայն այդ մասին որևէ ապացույց չի ներկայացնում։

Կուրսկում ուկրաինացիների կողմից ստեղծված համակենտրոնացման ճամբարի գոյության մասին հայտարարել է Ռուսաստանի Դաշնության արտաքին գործերի նախարարության պաշտոնական ներկայացուցիչ Մարիա Զախարովան սեպտեմբերի 20-ին՝ ամենշաբաթյա ճեպազրույցների ընթացքում․ «ՌԴ-ն ունի կոնկրետ փաստեր Ուկրաինայի զինված ուժերի գրոհայինների կողմից Կուրսկի շրջանում համակենտրոնացման ճամբարների ստեղծման մասին, որոնցում պահում են տեղաբնակներին»։

Նրա խոսքով, ռուս իրավապահները ստանում են տեղեկություններ և վկայություններ այն մասին, որ ուկրաինացի «բանդերականները» տարհանվել չհասցրած բնակիչներին բռնությամբ տեղափոխել են սահման։

«Դա, հիշեցնում եմ, նացիստական օկուպանտների տիպիկ վարքագիծ է, հիշո՞ւմ եք՝ ինչպես էին սովետական ժողովրդին գերի վերցնում, ստրկության տանում։ Դա նույն ձեռագիրն է։ Ունենք բազմաթիվ վկայություններ, որոնք հավաքվել են ՌԴ Կարմիր խաչի կողմից։ Ըստ էության, ունենք նաև կոնկրետ վկայություններ ուկրաինացի զինված ուժերի կողմից Կուրսկում համակենտրոնացման ճամբարի նման վայր ստեղծելու մասին, որտեղ նրանք ավտոմատի սպառնալիքով տեղավորում են տարբեր պատճառներով տարհանվել չհասցրած բնակչությանը»,- հայտարարել է Զախարովան։

Մինչ նրա հայտարարությունը, ՌԴ ԱԳՆ-ն զեկույց էր պատրաստել, որտեղ այդ մասին նշում եղել էր։ Զեկույցը տրամադրվել էր ՌԴ պետական «ՌԻԱ-Նովոստի» գործակալությանը, որն էլ այդ մասին հրապարակում էր պատրաստել։ 

Նույն թեման Соловьев Live-ի եթերում շարունակել էր «Ախմատ» հատուկ ջոկատի հրամանատար Ապտի Ալաուդինովը։ Ավելին, նա հայտարարել էր, թե այդ մասին կան տեսանյութեր, լուսանկարներ։

Սակայն հատկանշական է, որ ռուսական պաշտոնական շրջանակների այս հայտարարության վերաբերյալ տեսանյութի կամ լուսանկարների տեքսով որևէ վկայություն ռուսական պետական քարոզիչների կամ ռազմական բլոգերների ալիքներում չկան։ 

Ապատեղեկատվության դեմ պայքարի կենտրոնը (Center for Countering Disinformation/CCD) հայտարարել է, որ ՌԴ պաշտոնական աղբյուրները կեղծ տեղեկություն են տարածում՝ հայտարարելով Կուրսկի շրջանում համակենտրոնացման ճամբարի գոյության մասին։ «Իրականում այս ակնհայտ կեղծ տեղեկության տարածումը Կրեմլին անհրաժեշտ է շեղելու ուշադրությունը ռուսական զինված ուժերի կողմից ուկրաինական օկուպացված տարածքներում ստեղծված այսպես կոչված ֆիլտրացիոն ճամբարներից։ Գործի դրվող ֆիլտրացիոն միջոցների օգնությամբ ռուսները վախեցնում են ուկրաինացի ժողովրդին։ Մարդիկ, որոնք չեն անցնում ֆիլտրացիան, հայտնվում են ռուսական բանտերում, ենթարկվում են խոշտանգումների»,- նշվում է CCD–ի տարածած հայտարարության մեջ։ 

Համակենտրոնացման ճամբարների մասին ՌԴ ԱԳՆ-ի և մասնավորապես, Մարիա Զախարովայի հայտարարությունը ֆեյք է համարել նաև Detector Media-ն, որը ռուս-ուկրաինական պատերազմի մասին Կրեմլի տարածած տեղեկությունները ճշգրտում ու փաստագրված ներկայացնում է հանրությանը։  

Այսպիսով, ուկրաինացի զինված ուժերի կողմից Կուրսկի շրջանում համակենտրոնացման ճամբարներ ստեղծելու մասին ՌԴ պաշտոնական աղբյուրների տարածած հայտարարությունները փաստարկված չեն հանրության համար տեսանելի ապացույցներով։ Ռուսական զինված ուժերը, թերևս, կարող էին թռչող սարքերի միջոցով նկարահանել այդ ճամբարները և որպես վկայություն ներկայացնել տեսանյութեր, լուսանկարներ կամ այլ ապացույցներ։ 

Հասմիկ Համբարձումյան

[easy-social-share buttons="facebook,twitter,vk,telegram" counters=1 style="icon" point_type="simple"]