Երբ է Էրդողանը հիշատակում Փաշինյանին․ ապակողմնորոշող պնդումներ ռուսական և հայաստանյան մամուլում

Ռուսաստանյան ՏԱՍՍ պետական լրատվական գործակալությունը հունիսի 3-ին տեղեկություն է հրապարակել, ըստ որի՝ Թուրքիայի նախագահ Ռեջեփ Թայիփ Էրդողանն իր երդմնակալության ժամանակ բարձրաստիճան հյուրերին թվարկելիս չի հիշատակել Հայաստանի վարչապետ Նիկոլ Փաշինյանի անունը։ 

Փաշինյանը հունիսի 3-ին Անկարայում Էրդողանի երդմնակալության արարողությանը մասնակցած բարձրաստիճան հյուրերից էր։ 

«Թուրքիայի նախագահ Ռեջեփ Թայիփ Էրդողանը չի հիշատակել Հայաստանի վարչապետ Նիկոլ Փաշինյանին, երբ թվարկել է երդմնակալության արարողությանը մասնակցող այլ պետությունների և կառավարությունների ղեկավարների ցուցակը», — մասնավորապես գրել էր ՏԱՍՍ-ը` վկայակոչելով Թուրքիայում իր թղթակցին։

Հայաստանյան  բազմաթիվ լրատվամիջոցներ՝ news.am,  24news.am, panorama.am, hraparak.am, auroranews.am, pastinfo.am, hayeli.am, oragir.news և այլն, տարածել էին այս տեղեկությունը։ 

Տեղեկության տարածումից որոշ ժամանակ անց հայաստանյան որոշ լրատվամիջոցներ հերքեցին այն՝ նշելով, որ ՏԱՍՍ-ը խեղաթյուրել է Փաշինյանի՝ Թուրքիա այցի մասին տեղեկությունը։ 

«Էրդողանը Փաշինյանի և մյուս վարչապետերի անունները նշում է նախագահներից հետո»,- գրել էր Civic.am-ը՝ կից ներկայացնելով տեսանյութ։

«Փաստերի ստուգման հարթակը» պարզել է, որ Թուրքիայի նախագահն իրականում հիշատակել և շնորհակալություն հայտնել է Փաշինյանին իր երդմնակալությանը մասնակցելու համար, սակայն ոչ թե բուն պաշտոնական արարողությանը, այլ պետությունների և կառավարությունների ղեկավարների հետ պատվո ընթրիքի ժամանակ։ 

Հունիսի 3-ին երդմնակալության արարողության ժամանակ Էրդողանը ողջունել է միայն մի շարք երկրների նախագահների ու կառավարությունների ղեկավարների, մասնավորապես՝ Վենեսուելայի, Ադրբեջանի, Ուզբեկստանի, Բուլղարիայի,  Ղազախստանի, Ղրղզստանի, Թուրքմենստանի, Պակիստանի և մի շարք այլ երկրների ղեկավարներին, ինչպես նաև ՆԱՏՕ-ի գլխավոր քարտուղարին։ 

Էրդողանը ամբիոնից նաև հայտարարել է, որ բոլոր հյուրերին թվարկելու համար բավական ժամանակ չի լինի և հնարավորություն կունենան ավելի ուշ խոսելու պատվո ընթրիքի ժամանակ։ 

Արդեն ընթրիքին թվարկելով պետությունների և կառավարությունների ղեկավարներին, Էրդողանը շնորհակալություն է հայտնում նաև Նիկոլ Փաշինյանին։ 

Այսպիսով,  թեև Էրդողանն իր երդմնակալության բուն արարողության ժամանակ չի հիշատակում Փաշինյանին, սակայն, դա անում է ավելի ուշ կայացած պաշտոնական ընթրիքի ընթացքում՝ ի թիվս այլոց շնորհակալություն հայտնելով ՀՀ վարչապետին։

Նելլի Լազարյան 

[easy-social-share buttons="facebook,twitter,vk,telegram" counters=1 style="icon" point_type="simple"]