Պապոյանը սխալվում է․ «Նեմեսիսի» հուշարձանին ՔՊ ներկա թիմի անդամները հավանություն են տվել

ԱԺ պատգամավոր (ՔՊ) Գևորգ Պապոյանը հայտարարել է, որ «Նեմեսիս» գործողության մասնակիցների հուշարձանի տեղադրման որոշում կայացնողներն այլևս իրենց քաղաքական թիմի անդամ չեն։ 

«Իրականում այն մարդիկ, ովքեր այդ որոշումները կայացրել կամ իրականացրել են, կամ համաձայնությունները տվել են և՛ ԱԳՆ-ում, և՛ Երևանի քաղաքապետարանում, իմ տեղեկություններով, նրանք այլևս մեր քաղաքական թիմի անդամ չեն։ Միգուցե նրանցից շատերը երբեք չեն էլ եղել մեր քաղաքական թիմի անդամ»,- Հանրային հեռուստաընկերության «Հարցազրույց Պետրոս Ղազարյանի հետ» հաղորդմանն ասել է Պապոյանը և նաև նշել, թե պատերազմից հետո Հայաստանում եղած ընդհանուր մթնոլորտն է գուցե նպաստել նման որոշում կայացնելու համար։

«Փաստերի ստուգման հարթակը» փորձեց պարզել, թե Երևանի քաղաքային իշխանությունից ովքեր են հավանություն տվել  նախագծին և նրանցից ովքեր են շարունակում այսօրվա դրությամբ մնալ Երևանի ավագանու «Իմ քայլը» խմբակցության կամ «Քաղաքացիական պայմանագիր» կուսակցության թիմի անդամ։

Երևան քաղաքում աղբյուր-հուշակոթող տեղադրելու վերաբերյալ համաձայնություն տալու մասին նախագիծը Երևանի ավագանին հաստատել է 2021 թ. սեպտեմբերի 14-ին։ Նախագծին կողմ է քվեարկել ավագանու 40 անդամ։

Նրանց մեծ մասը՝ ավագանու 27 անդամ, շարունակում է մնալ «Իմ քայլը» խմբակցությունում, և ուստի հանդես են գալիս որպես «Քաղաքացիական պայմանագիր» կուսակցությունից վստահություն ստացած թիմի անդամ։

Նրանցից, օրինակ, Երևանի արդեն նախկին քաղաքապետ Հրաչյա Սարգսյանը 2023 թ. ապրիլի 4-ին նշանակվել է վարչապետի խորհրդական, Վազգեն Դարբինյանը 2016-ից ՔՊ անդամ է, Արթուր Իսպիրյանը 2012 թ.-ին նշանակվել է «Քաղաքացիական պայմանագիր» հիմնադրամի Հոգաբարձուների խորհրդի անդամ, իսկ 2015 թ.-ին անդամակցել է «Քաղաքացիական պայմանագիր» կուսակցությանը: Արմեն Գալաջյանը, որը 2021թ. սեպտեմբերից ընտրվել է «Իմ քայլը» խմբակցության ղեկավար, 2021 թ. դեկտեմբերից «Քաղաքացիական պայմանագիր» կուսակցության վարչության նախագահի օգնականն է: Գայանե Խաչատրյանը 2018-2019 թթ.-ին աշխատել է «Քաղաքացիական պայմանագիր» կուսակցության Դավթաշենի գրասենյակում՝ որպես գործավար։ 

Աղբյուր-հուշակոթող տեղադրելու վերաբերյալ համաձայնություն տալու մասին նախագծին ավագանու կազմում կողմ քվեարկած Գայանե Եղիազարյանը 2022 թ. հունիսի 6-ին ԱԺ պատգամավոր է ընտրվել «Քաղաքացիական պայմանագիր» կուսակցության համապետական ընտրական ցուցակով։ Նա 2015 թ.-ից «Քաղաքացիական պայմանագիր» կուսակցության  հիմնադիր անդամ է։ 

Այսպիսով, Գևորգ Պապոյանի հայտարարությունը, թե «Նեմեսիս» գործողության մասնակիցների հուշարձանի տեղադրման որոշում կայացնողներն այլևս իրենց քաղաքական թիմի անդամ չեն, սխալ է։ 

Նելլի Լազարյան

[easy-social-share buttons="facebook,twitter,vk,telegram" counters=1 style="icon" point_type="simple"]