1.3 մլն դոլար՝ հիմնանորոգման համար․ երկու տարի է՝ թիվ 61 մանկապարտեզը փակ է ու դեռ հայտնի չէ, թե երբ կբացվի

Երևանի Դավթաշեն վարչական շրջանի թիվ 61 մանկապարտեզը փակ է՝ հիմնանորոգման աշխատանքների պատճառով: Արդյունքում, տարբեր տարիներից հերթագրված 248 երեխա առայժմ հնարավորություն չունի հաճախելու մանկապարտեզ։ 

Մանկապարտեզի հիմնանորոգման համար մրցույթ հայտարարվել էր դեռևս 2022 թվականի հունիսին: Երևանի քաղաքապետարանն ասում է, որ հիմնական շինարարական աշխատանքներն ավարտված են և ընթանում է «վերջնական կարգաբերման գործընթացը, «որից հետո հնարավորին կարճ ժամկետում մանկապարտեզը կվերաբացվի»: 

Մանկապարտեզի հիմնանորոգման աշխատանքների համար Երևանի բյուջեից ծախսվել է 474 մլն 816 հազար  դրամ (1.3 մլն դոլար): 

«Փաստերի ստուգման հարթակի» ընթերցողները դիմել էին մեզ՝ հետաքրքրվելու մանկապարտեզի ճակատագրով: Այդ նպատակով մենք եղել ենք դեռևս չբացված մանկապարտեզում։ 

Մանկապարտեզի և՛ առջևի, և՛ հետևի ու կողքերի մուտքերն ունեն թեքահարթակներ՝ տեղաշարժման խնդիրներ ունեցողների համար։ Սակայն չնայած թեքահարթակների առկայությանը՝ եզրադրերից և ոչ մեկը պատշաճ հարմարեցված չէ, օրինակ, անվասայլակով երեխայի համար։ Մանկապարտեզի շենքի մուտքերից մեկում (Նկար 1) երևում է, որ եզրադրերը կառուցելուց հետո փորձել են ասֆալտաբետոնով հարմարեցնել անվասայլակին, բայց միևնույն է՝ նույնիսկ այդ դեպքում տեղը հարմարեցված չէ անվասայլակով երեխայի ու նրան ուղեկցողի համար։ 

Դեռ ավելին, շենքի մեկ այլ մուտքում (Նկար 2) եզրադիրն ընդհանրապես հարմարեցված չէ անվասայլակի համար՝ չնայած առկա է թեքահարթակ։

ՀՀ քաղաքաշինության կոմիտեի նախագահի՝ 2020 թ․ դեկտեմբերի 10-ին ստորագրված հրամանով՝ 

«(․․․) Հասարակական շենքերում որպես ուղղաձիգ կապի միջոց օգտագործվում են վերելակներ, շարժասանդուղքներ, սահող կամ բարձրացնող հարթակներ հաշմանդամություն ունեցող անձանց համար և ուղղաձիգ կապի այլ միջոցներ: Նշված միջոցները պետք է նախագծվեն և տեղակայվեն հաշվի առնելով համապատասխան նորմատիվ փաստաթղթերով և տեխնիկայի անվտանգության գործարանային հրահանգներով նախատեսված պայմանները (․․․)»: 

Ի պատասխան մեր հարցմանը, թե ինչու եզրադրերը հարմարեցված չեն, Երևանի քաղաքապետարանը ուղարկել է լուսանկար (Նկար 3)՝ գրելով, որ դրանում երևում է ասֆալտաբետոնով ծածկի թեքվածությունը։

 

Քաղաքապետարանի ուղարկած լուսանկարում մանկապարտեզի առաջին շենքի գլխավոր մուտքն է, որի եզրադիրը, ամեն դեպքում, պատշաճ հարմարեցված չէ։ Իսկ երկրորդ շենքի առնվազն մեկ մուտքի եզրադրի հարմարեցված չլինելուն քաղաքապետարանը չի անդրադարձել։ 

Մենք նաև հարցրել ենք մանկապարտեզի բակի բարեկարգման մասին։ Մասնավորապես, հարցին, թե բակում ի՞նչ աշխատանքներ են նախատեսվում իրականացնել, քանի որ այն անխնամ ու ոչ բարեկարգ վիճակում է, Երևանի քաղաքապետարանից պատասխանել են, որ բակի բարեկարգման աշխատանքների համար առանձին մրցույթ է հայտարարվել ու «կնքվել է պայմանագիր՝ առանց ֆինանսական միջոցների հատկացման»: 

«Համապատասխան համաձայնագրի առկայության պարագայում կիրականացվեն նաև բակի բարեկարգման աշխատանքները»,- գրել էր Երևանի քաղաքապետարանը հարցման պատասխանի մեջ։   

Այսպիսով, չնայած արդեն երկու տարի է, ինչ մանկապարտեզը փակ է հիմնանորոգման աշխատանքների պատճառով, այն դեռևս պատրաստ չէ բացման համար։ Դեռ ավելին, մանկապարտեզի հիմնանորոգման աշխատանքները լիարժեք ու պատշաճ չեն իրականացվել, մասնավորապես՝ տեղաշարժման խնդիրներ ունեցողների ազատ տեղաշարժման համար։

Ալյոնա Հայրապետյան

 

[easy-social-share buttons="facebook,twitter,vk,telegram" counters=1 style="icon" point_type="simple"]