TV 5-ի եթերում քաղաքագետը կրկնում է ադրբեջանական ապատեղեկատվությունը

«5-րդ ալիքի» «Օրագիր» հաղորդաշարի մարտի 22-ի թողարկման ժամանակ քաղաքագետ Ալեն Ղևոնդյանը կրկնել է Ադրբեջանի պետական APA լրատվական գործակալության տարածած, այնուհետև բացահայտված ապատեղեկատվությունը, թե իբր Հարավային Կովկասում ԵՄ հատուկ ներկայացուցիչ Տոյվո Կլաարը Բաքվում հայտարարել է, որ ՀՀ վարչապետն իր ստանձնած հանձնառությունները չի կատարում։ 

«Եվրոպական հանձնակատարը գալիս է Բաքու և ասում է, որ ՀՀ վարչապետը հանձնառություններ է վերցրել և պետք է Ադրբեջանին հանձնի սա, սա, սա.., ինչո՞ւ ի կատար չեք ածում, ընդ որում՝ Հայաստանն իր հույսը կապում է հենց այդ Եվրամիության հետ, ում հանձնակատարը Բաքվում բաց տեսքով, ընդ որում դրա ձայնագրությունը… տեսանյութը կա, իր ուղիղ խոսքի, այդպիսի թեզ է առաջ քաշում»,- հայտարարում է բանախոսը։ 

Նշենք, որ ավելի վաղ նույն պնդումը ներկայացվել էր հայաստանյան մի շարք լրատվամիջոցներում՝ հղումով Ադրբեջանի պետական APA լրատվական գործակալության կողմից աղավաղված զրույցինը: Խնդրին անդրադարձել էր մեր գործընկեր Civilnet.am-ը՝ բացահայտելով ապատեղեկատվությունը:  

Ադրբեջանական APA գործակալությունը հրապարակել էր հարցազրույցի անգլերեն՝ բնագիր տարբերակը, որտեղ Տոյվո Կլաարն ի պատասխան հարցի, թե ինչպե՞ս է գնահատում Հայաստանի և Ադրբեջանի միջև գործընթացի ներկա վիճակը, պատասխանում է, որ երկու երկրների ղեկավարներն էլ հանձնառու են այդ գործընթացին։ 

«Կարևորն այն է, որ Երևանի և Բաքվի ղեկավարներն ունենան քաղաքական կամք՝ վերացնելու այս հակամարտության հետևանքները։ Այս տեսանկյունից մենք կարծում ենք, որ նախագահ Ալիևը հանձնառու է այս գործընթացին, ինչպես նաև հանձնառու է վարչապետ Փաշինյանը։ Բայց կրկին, սա ժամանակ է պահանջում և հեշտ գործընթաց չէ»,- ասել է Կլաարը։ 

Հատկանշական է, որ հայկական լրատվամիջոցները տարածել էին ադրբեջանական APA գործակալության հարցազրույցի ռուսերեն՝ աղավաղված տարբերակը, որտեղ Տոյվո Կլաարը իբրև ասում է. «Մենք գտնում ենք, որ նախագահ Ալիևը հավատարիմ է գործընթացին, իսկ վարչապետ Փաշինյանը պարտավորություններ ունի»։ Ավելի ուշ APA գործակալությունն ուղղել էր իր սխալը։  

Ի դեպ, Տոյվո Կլաարի մամուլի քարտուղար Անրի Դուկենը Civic.am-ին տված պարզաբանման մեջ ևս հաստատել է, որ ԵՄ հատուկ ներկայացուցչի խոսքը ռուսերեն տարբերակում սխալ է ներկայացվել ադրբեջանական APA գործակալության կողմից։

Այսպիսով, «5-րդ ալիքի» եթերում քաղաքագետի արած պնդումը, թե Տոյվո Կլաարը ասել է, որ ՀՀ վարչապետը հանձնառություններ է ստանձնել և չի կատարում, կեղծ է։   

Նելլի Լազարյան

[easy-social-share buttons="facebook,twitter,vk,telegram" counters=1 style="icon" point_type="simple"]