Կուրբան Բայրամի առթիվ Երևանը Թեհրանին երբեք չի շնորհավորել․ քաղաքագետի մանիպուլյացիան

Հունիսի 29-ին «5-րդ ալիքի» «Օրագիր» հաղորդման եթերում քաղաքագետ Սերգեյ Մելքոնյանը, անդրադառնալով ՀՀ վարչապետ Նիկոլ Փաշինյանի՝ Կուրբան Բայրամի (իսլամական աշխարհում տարածված զոհաբերության տոն) առթիվ Թուրքիայի նախագահ Ռեջեփ Թայիփ Էրդողանին ուղղված շնորհավորանքին, նշել է, որ Երևանը «հրաժարվել է շնորհավորել Իրանին»։ 

«Եկեք ֆիքսենք, որ Հայաստանը պաշտոնապես չշնորհավորեց Իրանին։ Այստեղ մենք խոսում ենք առաջնահերթությունների մասին․ դա նշանակում ա, որ Թուրքիան առաջնահերթությունների ցանկում առաջին տեղում է, իսկ Իրանը ընդհանրապես չկա․․․ Իրանը դարձել է Հայաստանի անվտանգության երաշխիքներից մեկը՝ առաջին հերթին Սյունիքի հանդեպ, բայց [Հայաստանը] հրաժարվում է շնորհավորել Կուրբան Բայրամի տոնով իրանական կողմին․․․»,- ասել է քաղաքագետը։ 

Մելքոնյանն Իրանի ղեկավարությանը համամուսուլմանական տոնի առթիվ չշնորհավորելը ներկայացրել է «Երևանի կողմից վարվող հակաիրանական քաղաքականության» համատեքստում։ 

Մենք ուսումնասիրեցինք պաշտոնական և այլ բաց աղբյուրներ և պարզեցինք, որ Կուրբան Բայրամի առթիվ Հայաստանի որևէ ղեկավար երբևէ պաշտոնապես չի շնորհավորել Իրանին։ 

Իրանագետ Հարութ Առաքելյանը ևս «Փաստերի ստուգման հարթակի» հետ զրույցում հաստատեց այս փաստը՝ նշելով, որ արարողակարգով այդ տոնի առթիվ պաշտոնական շնորհավորանք Երևանից նախատեսված չէ, թեև այն կարևոր կրոնական տոն է Իրանի Իսլամական Հանրապետությունում։ 

Պաշտոնական արարողակարգի համաձայն, Հայաստանի ղեկավարությունն իրանցի գործընկերներին շնորհավորական ուղերձներ է հղում Ֆեթր մուսուլմանական տոնի և Նովրուզի առթիվ։ 

Ըստ այդմ, Նիկոլ Փաշինյանը, ինչպես իր պաշտոնավարման նախորդ տարիներին, 2023-ին ևս շնորհավորել է Իսլամական հեղափոխության գերագույն առաջնորդ այաթոլլահ Սեյեդ Ալի Խամենեիին և ԻԻՀ նախագահ Սեյեդ Էբրահիմ Ռայիսիին ինչպես Ֆեթր տոնի, այնպես էլ Նովրուզի առթիվ։ 

Այսպիսով, քաղաքագետի պնդումը, թե Հայաստանը հրաժարվել է շնորհավորել Իրանին Կուրբան Բայրամի առթիվ մանիպուլյատիվ է, քանի որ այդ տոնի առթիվ շնորհավորանք պաշտոնական Երևանից երբևէ չի հնչել նաև նախկին ղեկավարների կողմից՝ պայմանավորված պետական արարողակարգով։ 

Փոխարենը, Երևանը ինչպես նախկինում, Փաշինյանի օրոք ևս շնորհավորել է Իրանին այդ երկրի կարևոր աշխարհիկ ու կրոնական երկու այլ տոների առթիվ։ 

Նանե Մանասյան

[easy-social-share buttons="facebook,twitter,vk,telegram" counters=1 style="icon" point_type="simple"]