Ի՞նչն էր «պինցետով հանում» և «արաղով ախտահանում» Նիկոլ Փաշինյանը

Վարչապետ Նիկոլ Փաշինյանը մայիսի 16-ին առցանց մամուլի ասուլիսի ժամանակ հայտարարել էր, թե չի հիշում, որ Հայաստանում կորոնավիրուսի նախնական տարածման փուլում վիրուսի մասին «պինցետով հանելու» և «արաղով ախտահանելու» վերաբերյալ հայտարարություն է արել:

Լրագրողը, մասնավորապես, հարցրել էր. «Դուք ձեր վերջին լայվում հայտարարեցիք, որ հակահամաճարակային պայմանները համատարած չեն պահպանվում, ու, ըստ էության, թագավարակի տարածման համար մեղադրեցիք քաղաքացիներին: Դա այն դեպքում, երբ կորոնավիրուսի տարածման նախնական շրջանում հայտարարում էիք՝ կորոնավիրուսն ո՞ւմ շունն է, պինցետով կհանենք ու արաղով կախտահանենք»:

Փաշինյանը, ի պատասխան,  ընդգծել էր, որ չի հիշում նման բան. «Գուցե այլ շրջանակում է այդ հայտարարությունը հնչել»:

Շատ կայքեր՝ Antifake-ը, 7or.am-ը, live24.am-ը, անդրադառնալով այս թեմային, վարչապետին մեղադրել են սուտ խոսելու մեջ և պնդելով, որ իրականում այդ համատեքստում նման հայտարարություն եղել է: 

Նշենք, որ Նիկոլ Փաշինյանի հիշյալ ելույթը տեղի ունեցել է մարտի 12-ին Մալիշկայում սահմանադրական փոփոխությունների հանրաքվեի քարոզարշավի ժամանակ: Նա պատմել էր մի դեպք, երբ կանադացի սփյուռքահայ կնոջ գործը  անձնագրային և վիզաների վարչությունում ձգձգել էին, ապա ասել՝ «եկել ես այստեղ՝ ինչ անես, Նիկոլը ձեզ խաբել է»։

«Կորոնավիրուսը չի վտանգավոր: Այ կորոնավիրուսն իրանք են իսկական, որ մինչև հիմա մեր պետական համակարգի օրգանիզմը քայքայում են: Ու էդ կորոնավիրուսներին իրար հետ հատիկ-հատիկ պինցետով հանելու ենք, տնական արաղով դեզինֆեկցիա անենք ու ուղարկենք իրենց գործերին։ Ապրիլի 5-ը սրա մասին է»,- հայտարարել էր վարչապետը:

Փաստացի, Փաշինյանի՝ «պինցետով հանելու» և «արաղով ախտահանելու» մասին խոսքը վերաբերում էր ոչ թե կորոնավիրուսին, այլ կոռումպացված պաշտոնյաներին: Սակայն մի շարք կայքեր նրա խոսքը ներկայացրել են կիսատ՝ չընդգրկելով խոսքի բովանդակային հատվածը։

Լուսինե Ոսկանյան

[easy-social-share buttons="facebook,twitter,vk,telegram" counters=1 style="icon" point_type="simple"]