Որքան վրացի զբոսաշրջիկ է եկել Ամանորին Հայաստան. գովազդային վահանակները չաշխատեցին

Երևանի քաղաքապետարանից 2019 թ. տարեվերջին հայտնում էին, որ Թբիլիսիի կենտրոնական հատվածում տեղադրվել են գովազդային վահանակներ, որոնցում վրացիներին առաջարկում էին Ամանորը տոնել Երևանում՝ իրազեկելով նաև Հանրապետության հրապարակում կայանալիք համերգի մասին։

«Երևանի քաղաքապետարանի և ՀՀ ԷՆ զբոսաշրջության կոմիտեի համագործակցության արդյունքում Երևանում անցկացվող ամանորյա միջոցառումները լայնորեն լուսաբանվում են Վրաստանում։ Թբիլիսիի կենտրոնական հատվածում տարածվում են գովազդային վահանակներ, սոցիալական հարթակների ու տեղական ռադիոյի միջոցով իրականացվում է «Տոնենք Ամանորը հարևանների հետ» մարքեթինգային արշավը»,- մասնավորապես, գրել էր Երևանի քաղաքապետի խոսնակ Հակոբ Կարապետյանը։ 

Իսկ մինչ այդ հանրությունը տարակուսած էր, թե ինչու է իշխանությունն այդքան մեծ գումար ծախսում Ամանորի համար։ 

Հիշեցնենք, որ Երևան քաղաքի 2020 թ. ամանորյա տոնական միջոցառումների համար նախատեսված բյուջեն կազմում էր շուրջ 425 մլն դրամ, որից 271 մլն դրամը հատկացրել էր կառավարությունը՝ պատճառաբանելով, որ զբոսաշրջիկներ են գալու, գումարը բազմապատկվելու է և վերադառնալու տնտեսություն։ 

Հայտնի է, որ վերջին տարիներին հազարավոր հայեր նախընտրում են Ամանորը տոնել հարևան Վրաստանում։ Հատկապես դեկտեմբերի 30-ին, 31-ին հայ-վրացական սահմանին առաջանում է մի քանի կիլոմետր երկարությամբ հերթ։ 

Մինչ ամենաբարձր մակարդակով քաղաքացիներին կոչ էր արվում Ամանորի գիշերն անցկացնել Երևանի Հանրապետության հրապարակում, որտեղ սպասվում էին տոնական միջոցառումներ և հանրաճանաչ երգիչ Գորան Բրեգովիչի համերգը, հայ-վրացական սահմանին կրկին մեծ հերթեր էին գոյացել, սակայն ոչ թե դեպի Հայաստան, այլ՝ հակառակը։

Տոներից հետո վարչապետ Փաշինյանը հարկ համարեց պարզաբանել, որ իրենք ունեն որոշակի տվյալներ և կարող են ասել, որ Ամանորի համար 271 միլիոն դրամ ծախսելով՝ դեկտեմբերի 28-ից հունվարի 6-ն ընկած ժամանակահատվածում, նախորդ տարվա համեմատ, գրանցվել է  9 մլրդ 307 մլն դրամի հավելյալ դրամաշրջանառություն: 

«Փաստերի ստուգման հարթակը» փորձեց պարզել, թե ի վերջո՝ ի՞նչ ազդեցություն ունեցան Թբիլիսիում տեղակայված գովազդային պաստառներն ու մարքեթինգային արշավները. որքան վրացի զբոսաշրջիկ է Ամանորին եկել Հայաստան։

47 հազարը՝ 5 հազար 800-ի դիմաց

Ազգային անվտանգության ծառայությունից, Fip.am-ի հարցմանն ի պատասխան, տեղեկացնում են, որ 2019 թ. դեկտեմբերի 28-ից 2020 թ․-ի հունվարի 6-ն ընկած ժամանակահատվածում Հայաստան մուտք է գործել 5824 Վրաստանի քաղաքացի։ Նշենք, որ 2018-ի նույն ժամանակահատվածում Հայաստան էր մուտք գործել 4070 Վրաստանի քաղաքացի կամ 1754-ով քիչ։

Հատկանշական է, որ 2019 թ. դեկտեմբերի 28-ից 2020 թ․-ի հունվարի 6-ը Հայաստանից Վրաստան է մեկնել 47․039 ՀՀ քաղաքացի, որը 11․625-ով ավել է նախորդ տարվա ցուցանիշից։  2018-ին Վրաստան էր մեկնել 35․414 քաղաքացի։

Այսպիսով, կարող ենք արձանագրել, որ ամանորյա օրերին Վրաստանից Հայաստան եկած զբոսաշրջիկների թիվը շեշտակի աճ չի գրանցել, իսկ ՀՀ բազմաթիվ քաղաքացիներ, չնայած բազմաթիվ կոչերին և ծախսված գումարներին, դեռևս նախընտրում եմ Ամանորը անցկացնել հարևան Վրաստանում։ 

Նելլի Լազարյան

[easy-social-share buttons="facebook,twitter,vk,telegram" counters=1 style="icon" point_type="simple"]