Կանայք՝ գործադիրում. ո՞ր կառավարությունում են կանայք ամենից շատ ներգրավված եղել

Վարչապետ Նիկոլ Փաշինյանը սեպտեմբերի 5-ին ֆեյսբուքյան գրառում էր կատարել կառավարությունում կանանց ներկայացվածության մասին։ 

«Մեր կառավարությունում 1 կին նախարար կա, 12 կին փոխնախարար: Վարչապետի աշխատակազմի ղեկավարի երեք տեղակալներից երկուսը կանայք են:

ՊԵԿ նախագահի տեղակալներից մեկը կին է, քաղաքաշինության կոմիտեի նախագահի տեղակալներից մեկը կին է: Բացի դա՝ կանայք են ղեկավարում Քաղաքացիական ավիացիայի կոմիտեն, Սոցիալական ապահովության ծառայությունը, Զբոսաշրջության պետական կոմիտեն: Այս ցանկը կարելի է շարունակել, բայց կարծում եմ՝ մեր կառավարությունը կանանց ներգրավվածությամբ գերազանցում է Հայաստանի բոլոր նախկին կառավարություններին»,- գրել էր վարչապետը:

«Փաստերի ստուգման հարթակը» համեմատել է Նիկոլ Փաշինյանի, Կարեն Կարապետյանի և Հովիկ Աբրահամյանի կառավարությունների կին անդամների թիվը՝ հասկանալու, թե որքանով է կանանց ներգրավվածությունն աճել կամ նվազել։ 

Այսպես, Նիկոլ Փաշինյանի կառավարությունն ունի 12 նախարար, որոնցից մեկն է կին, այսինքն՝ կանայք կազմում են նախարարների 8,3 տոկոսը։ Կարեն Կարապետյանի կառավարությունն ունեցել է 18 նախարար, որոնցից կրկին մեկը կամ 5,6 տոկոսն էր կին։ Հովիկ Աբրահամյանի կառավարությունը նույնպես ուներ 18 նախարար, որոնցից կին էին 3-ը կամ 16,7 տոկոսը։ 

Վարչապետն անդրադարձել էր նաև կառավարությունում կին տեղակալների թվին՝ նշելով, որ նրանք 12-ն են։ Այս թիվը համապատասխանում է իրականությանը. կանայք կազմում են փոխնախարարների 26 տոկոսը (Փաշինյանի կառավարությունն ունի 46 փոխնախարար)։ 

Կարեն Կարապետյանի վարչապետության օրոք փոխնախարարները եղել են 57-ը՝ նրանցից միայն 3 էր իգական սեռի։ Հովիկ Աբրահամյանի ժամանակ փոխնախարարներն ավելի շատ էին՝ 65-ը, նրանցից 5-ը կամ 7,7 տոկոսն էր կին։ 

Այստեղ կարևոր է նկատել, որ Փաշինյանի կառավարությունում, նախարարությունների կրճատմանը զուգահեռ, նվազել է նաև փոխնախարարների թիվը, աճել՝ նրանցում կանանց ներգրավվածությունը։ Փոխնախարարների, այդ թվում՝ կին փոխնախարարների թիվը Հովիկ Աբրահամյանի կառավարությունից հետո նվազել է նաև Կարեն Կարապետյանի վարչապետության օրոք (նախարարությունների թիվը, սակայն, չի փոխվել)։ 

Վարչապետի աշխատակազմի ղեկավարի տեղակալների թիվը 3 վարչապետների ժամանակ չի փոխվել՝ 3, Փաշինյանի վարչապետության ժամանակ 3-ից 2-ն են կին, մյուսների դեպքում՝ 3-ից 1-ը։ Այս դեպքում ևս վարչապետի գրառումը ճիշտ է։ 

Պետական համակարգում կանանց ներգրավվածության մասին կարելի է կարծիք կազմել նաև Ազգային ժողովում իգական սեռի ներկայացուցիչների քանակից։ Յոթերորդ գումարման Ազգային ժողովում, որն ունի 132 պատգամավոր, կանայք կազմում են 22,7 տոկոսը կամ 30 հոգի։ 

2018-ի հոկտեմբերին վիճակագրական կոմիտեի կողմից հրապարակված տվյալների համաձայն, 2017-ին Ազգային ժողովում կանայք կազմել են 18,1 տոկոս, 105 պատգամավորից 19-ն էր կին։ 

Կրկին վիճակագրական կոմիտեի տվյալներով, 1995-ին oրենսդիր իշխանության մեջ կանայք կազմել են 6 տոկոսը, 1999-ին՝ 3 տոկոսը։ 1998-ի տվյալներով, առանց ուժային նախարարությունների (19 նախարարություն), կանայք կազմել են նախարարների և փոխնախարարների միայն 2 տոկոսը։ 

Վիճակագրական կոմիտեն «Հայաստանի կանայք և տղամարդիկ, 2019» զեկույցը պետք է հրապարակի այս տարվա նոյեմբերին։ Պետական համակարգում կանանց ներգրավվածության մասին առավել լայն պատկերացում կարելի է կազմել տվյալ զեկույցի տվյալներից ևս։ 

 

[easy-social-share buttons="facebook,twitter,vk,telegram" counters=1 style="icon" point_type="simple"]