Միխայել Շումախերը կոմայից դուրս է եկել դեռ տարիներ առաջ

Սեպտեմբերի 10-ին և 11-ին համաշխարհային մամուլը ողողվեց «Ֆորմուլա 1» դասի լեգենդար ավտոարշավորդ Միխայել Շումախերի առողջության վերաբերյալ սենսացիոն հրապարակումներով։ Հղում անելով ֆրանսիական Le Parisien թերթի հրապարակմանը՝ գրեթե ամենուր գրվեց, որ գերմանացին դուրս է եկել վեցամյա կոմայից և նրա գիտակցությունը վերականգնվել է։ «Կարմիր բարոնի»՝ կոմայից դուրս գալու լուրը շատ արագ տարածվեց նաև հայաստանյան լրատվամիջոցներում, մասնավորապես, այդ մասին գրեցին news.am, armenpress.am, armeniasputnik.am, a1plus.am, tert.am, 1in.am, yerkir.am և այլ լրատվական կայքեր։

«Փաստերի ստուգման հարթակը» որոշեց գնալ այդ հրապարակումների հետքերով և հասկանալ՝ արդյո՞ք «Ֆորմուլա 1»-ի յոթակի չեմպիոնի առողջության հարցում իսկապես կտրուկ փոփոխություն է եղել և նա կոմայից դուրս է եկել հենց Փարիզի հիվանդանոցներից մեկում, որտեղ նրան վերջերս տեսել էին Le Parisien-ի լրագրողները։

Տեղեկատվության աղբյուրը

Միխայել Շումախերի՝ կոմայից դուրս գալու մասին լուրը տարածվեց այն բանից հետո, երբ սեպտեմբերի 9-ին «Կարմիր բարոնը» տեղափոխվեց Փարիզի «Ժորժ Պոմպիդուի» անվան հիվանդանոցի սրտաբանական բաժանմունք։ Այդ ժամանակ հայտնի դարձավ, որ մրցարշավորդը պետք է սրտի հյուսվածքում ցողունային բջիջների ներդրման փորձնական վիրահատության ենթարկվի։

Ուղեկցող բժիշկը հրաժարվել էր Le Parisien-ի համար մեկնաբանել Շումախերի առողջության վերաբերյալ հարցերը՝ վկայակոչելով բժշկական գաղտնիությունը, այնուհանդերձ, լրագրողները կարողացել էին զրուցել բուժքույրերից մեկի հետ: Վերջինս բառացիորեն ասել էր․ «Այո, նա գտնվում էր իմ խնամքի տակ: Եվ ես կարող եմ հավաստիացնել ձեզ, որ նա իսկապես գիտակից է»:

Հենց բուժքրոջ այս խոսքերն են «բում» առաջացրել լրատվամիջոցներում, մինչդեռ կինն ամենևին էլ չի ասել, թե լեգենդար ավտոարշավորդը հենց այդ ժամանակ է գիտակցության եկել, այլ պարզապես հաստատել է այն տեղեկատվությունը, ինչի մասին գրվում է արդեն մի քանի տարի։
Հատկանշական է, որ ի տարբերություն լուրը տարածող կայքերի՝ սկզբնաղբյուր կայքն իր հրապարակումը վերնագրել է պարզապես այսպես՝ «Շումախերը հոսպիտալացվել է Փարիզում. բուժումը հարցականի տակ է»։ Եվ շեշտը դրված է ոչ այնքան նշյալ բուժքրոջ խոսքերի, որքան սպասվող վիրահատության եղանակի, դրա արդյունավետության ու վիրաբույժի՝ նախկինում ունեցած հաջողությունների վրա։

 Թեմայի արդիականությունը
Հատկանշական է, որ Շումախերի՝ կոմայից դուրս գալու մասին լուրը հայտնի էր դեռ 2014 թվականից։ Մասնավորապես, BBC-ն հրապարակել էր ««Ֆորմուլա 1»-ի լեգենդ Միխայել Շումախերը դուրս է եկել կոմայից» վերնագրով հրապարակում, որում մեջբերված էին ավտոարշավորդի մենեջեր Սաբինե Կեհմի խոսքերն այն մասին, որ Շումախերն այլևս կոմայի մեջ չէ և լքել է Գրենոբլի հիվանդանոցը՝ շարունակելու իր վերականգնման երկարատև փուլը:

Բացի այդ, 2016 թվականի ամռանը գերմանացուն այցելել էր Հռոմի պապ Բենեդիկտոս 16-րդի անձնական քարտուղար Գեորգ Գենսվինը։ Նա նշել էր, որ Շումախերը «զգում է, որ իր շուրջ մարդիկ կան, ովքեր սիրում են իրեն և հոգ են տանում իր մասին։ Պարզ էր, որ Միխայելը ընկալում է իր շուրջը կատարվողը»:

Իսկ 2018-ի դեկտեմբերին «Ֆերարիի» նախկին ղեկավարը Ժան Թոդը պատմել էր, թե ինչպես է Միխայելի հետ հեռուստացույցով դիտել Բրազիլիայի Գրան պրին։ Այս տարի Թոդը նաև Գերմանիայի Գրան պրին է դիտել ավտոարշավորդի հետ։

Հիշեցնենք, որ 2013 թվականի դեկտեմբերի 23-ին Միխայել Շումախերը գլխուղեղի աջ կիսագնդի վնասվածք էր ստացել ֆրանսիական Ալպերում դահուկով սահելու ժամանակ և երկար ժամանակ գտնվում էր կոմայի մեջ։

Այսպիսով, կարող ենք արձանագրել, որ «Ֆորմուլա 1»-ի մեծագույն լեգենդի՝ կոմայից դուրս գալու վերաբերյալ լուրն ամենևին էլ սենսացիոն չէ, քանի որ, մեծ հաշվով, այն նորություն էլ չէ, և Շումախերը դեռ տարիներ առաջ էր գիտակցության եկել։

Աստղիկ Քեշիշյան

[easy-social-share buttons="facebook,twitter,vk,telegram" counters=1 style="icon" point_type="simple"]