Տիգրան Ավինյանի ներկայացրած ցուցանիշներն ու տնտեսության իրական պատկերը

Փոխվարչապետ Տիգրան Ավինյանն իր ֆեյսբուքյան էջում օգոստոսի 26-ին գրառում է կատարել՝ ներկայացնելով այս տարվա հուլիս ամսին արձանագրված մի քանի մակրոտնտեսական ցուցանիշներ, որոնցով ցույց է տալիս նախորդ տարվա հուլիսի նկատմամբ տնտեսության մի շարք ճյուղերի արձանագրած աճը։

Ավինյանն իր գրառման մեջ ներկայացնում է տնտեսական ակտիվության, արդյունաբերության, ծառայությունների, շինարարության, առևտրաշրջանառության և արտաքին առևտրի ցուցանիշները։

Նշենք, որ Տիգրան Ավինյանը ներկայացրել է Վիճակագրական կոմիտեի հրապարակած ընթացիկ-օպերատիվ ամփոփմամբ ստացված նախնական հիմնական մակրոտնտեսական ցուցանիշները, որոնցում, ի թիվս այլ համեմատությունների, հուլիս ամիսը համեմատվում է նախորդ տարվա նույն ամսի հետ։

Ու չնայած Վիճակագրական կոմիտեն ներկայացրել է 2019 թ. առաջին յոթ ամիսների մակրոտնտեսական ցուցանիշները, սակայն փոխվարչապետը հրապարակել է միայն հուլիս ամսվա տվյալները։ Երկու ցուցանիշների տարբերությունը կարող է բացատրել, թե ինչու է Տիգրան Ավինյանը ներկայացրել հատկապես հուլիսի տվյալները։

Նշենք, որ տնտեսագիտության մեջ ընդունված չէ մակրոտնտեսական ցուցանիշների ամսական համեմատությունը, քանի որ առանձին ամիսներին հնարավոր են տնտեսության որոշակի ճյուղերի ակտիվության կամ պասիվության դրսևորումներ, և որպեսզի հնարավորինս օբյեկտիվ լինի մակրոտնտեսական ցուցանիշների համեմատությունը, անհրաժեշտ է դիտարկել դրանք ժամանակի ավելի լայն կտրվածքով (եռամսյակ, կիսամյակ, տարի)։

Որպեսզի համեմատական պատկերն ամբողջական լինի, «Փաստերի ստուգման հարթակը» ներկայացնում է ինչպես 2019 թ. հուլիսի մակրոտնտեսական ցուցանիշների համեմատությունը նախորդ տարվա հուլիս ամսվա ցուցանիշների հետ, այնպես էլ առաջին յոթ ամիսների տվյալների համեմատությունը։

Եվ այսպես,

Այս տարվա հուլիսին տնտեսական ակտիվության ցուցանիշը նախորդ տարվա հուլիսի համեմատ աճել է 8․1 տոկոսով, մինչդեռ առաջին 7 ամիսների կտրվածքով աճը կազմել է 6․8 տոկոս։
Արդյունաբերության աճը հուլիսին կազմել է 16,1 տոկոս, մինչդեռ առաջին 7 ամիսներին ընդամենը 8․4 տոկոս է։
Ծառայությունների ծավալը հուլիսին աճել է 14,9 տոկոսով, իսկ առաջին 7 ամիսների կտրվածքով աճը կազմել է 15․2 տոկոս։
Շինարարությունը հուլիսին, նախորդ տարվա հուլիսի համեմատ, աճել է 4․1 տոկոսով, իսկ առաջին 7 ամիսներին՝ 4,5 տոկոսով։
Առևտրաշրջանառությունը հուլիսին աճել է 9․1 տոկոսով, առաջին 7 ամիսներին՝ 8,9 տոկոսով։
Եթե այս տարվա հուլիսին արտահանումը նախորդ տարվա հուլիսի համեմատ աճել է 19․5 տոկոսով, ապա 2019-ի առաջին յոթ ամիսների կտրվածքով արտահանման աճը կազմել է ընդամենը երեք տոկոս։
Ինչ վերաբերում է ներմուծմանը, ապա այս տարվա հուլիսին նախորդ տարվա հուլիսի համեմատ ներմուծումն աճել է 10 տոկոսով, իսկ առաջին 7 ամիսներին ներմուծման ծավալների աճը կազմել է ընդամենը 1,9 տոկոս։

2018-ի ցուցանիշները

Ի դեպ՝ 2018 թվականի առաջին յոթ ամիսների մակրոտնտեսական ցուցանիշները շատ ավելի «հուսադրող» էին։ Մասնավորապես, տնտեսական ակտիվության ցուցանիշը, ծառայությունները, շինարարությունը և արտաքին առևտրի ծավալներն ավելի արագ էին աճում, քան այս տարի (մանրամասն՝ գրաֆիկում)։ Փոխարենը՝ այս տարի էականորեն աճել են արդյունաբերական արտադրանքի ծավալները։

Այս շարքում, թերևս, բացառություն է կազմում ներքին առևտուրը, որի աճի տեմպը անփոփոխ է՝ 8․9 տոկոս։

Այսպիսով, թեև փոխվարչապետ Տիգրան Ավինյանի հրապարակած տվյալները ճիշտ են, սակայն դրանք չեն արտացոլում տնտեսության ճյուղերի աճի իրական պատկերը։ Փաստացի, 2019-ի առաջին յոթ ամիսներին արձանագրված աճի ցուցանիշները, մեծ մասամբ, առավել ցածր են հուլիս ամսին արձանագրված ցուցանիշներից։