Նվազագույն աշխատավարձը դեռ չի բարձրանա. պարզաբանում

Կառավարության այսօրվա նիստում, ի թիվս այլ որոշումների, գործադիրը հավանություն տվեց նվազագույն աշխատավարձը 55 հազար դրամից 68 հազար դարձնելու օրենքի նախագծին։ Այս որոշումն արդեն իսկ հասցրեց մի քանի ժամում դառնալ մեդիադաշտում և սոցցանցերում մանիպուլյացիայի աղբյուր։

Նշենք, որ այս նախագիծը դեռևս պետք է հաստատվի նաև Ազգային ժողովի կողմից, սակայն սոցցանցներում բազմաթիվ քաղաքացիներ, ինչպես նաև «Իմ քայլը» խմբակցության պատգամավորներ Լիլիթ Մակունցը, Սիփան Փաշինյանը, Սոնա Ղազարյանը, Սերգեյ Մովսիսյանը և այլք կառավարության կողմից հավանության արժանացած օրենքի նախագիծը շտապեցին ներկայացնել որպես արդեն իսկ կատարված իրողություն։

Նշենք, որ ՀՀ-ում նվազագույն ամսական աշխատավարձը սահմանվում է օրենքով, իսկ օրենքի ուժ կարող են ստանալ միայն այն նախագծերը, որոնք համապատասխան ընթացակարգերով անցնելուց հետո ընդունվում են Ազգային ժողովի կողմից։

Այս դեպքում կառավարության հավանությանն արժանացած օրենքի նախագիծը դեռևս չի մտել Ազգային ժողով և հետևաբար՝ չի կարող ունենալ օրենքի ուժ։

Հավելենք, որ թեև կառավարությունն առաջարկում է նվազագույն ամսական աշխատավարձը դարձնել 68 000 դրամ, սակայն օրենքի նախագծի հեղինակ, «Իմ քայլը» խմբակցության պատգամավոր Բաբկեն Թունյանը Ֆեյսբուքյան իր էջում գրառում է կատարել՝ նշելով, որ այդ հարցը պետք է դեռևս քննարկվի։

«Մենք առաջարկում էինք նվազագույն աշխատավարձը 55 հազարից դարձնել 63 հազար դրամ։ Կառավարությունն ասում է՝ ավելի լավ է 68 հազար դրամ։ Մենք ասում ենք՝ շատ լավ, բայց պայմանով, որ բազային աշխատավարձը չպետք է բարձրանա։ Բազային աշխատավարձը հաշվարկվում է նվազագույն աշխատավարձի հիման վրա։ Ու ըստ այդմ էլ հաշվարկվում է պետական պաշտոնյաների աշխատավարձը»,- գրել է Թունյանը՝ հավելելով, որ ԱԺ հանձնաժողովում կքննարկեն կառավարության առաջարկները։