«ՀԷՑ-ը Կարապետյանից վերցնում են, որ թուրքերին տան»․ Կրեմլի քարոզիչը կեղծ պնդում է անում

Հայաստանյան մի շարք լրատվամիջոցներ ակտիվորեն տարածում են Կրեմլի քարոզիչ Անդրեյ Արեշևի հոդվածը՝ հունիսի 20-ին Հայաստանի Հանրապետության վարչապետ Նիկոլ Փաշինյանի՝ Թուրքիա կայանալիք այցի վերաբերյալ։ 

Քարոզիչը իրադարձությունը կապում է ռուսաստանցի գործարար Սամվել Կարապետյանի ձերբակալության և նրան պատկանող «Հայաստանի էլեկտրական ցանցեր» ՓԲԸ-ն ազգայնացնելու վերաբերյալ ավելի վաղ Փաշինյանի արած հայտարարությունների հետ։ 

«Վարչապետի՝ «Հայաստանի էլեկտրական ցանցերի» ազգայնացման մասին հայտարարված մտադրությունը ոչ այլ ինչ է, քան հայաստանյան իշխանությունների կողմից սկսված ռեյդերային արշավի քողարկում, որի նպատակը ընկերության զավթումն է և հետագայում թուրքերին հանձնելը։ Առկա տեղեկատվության համաձայն՝ խոսքը վերաբերում է Aksa Energy ընկերությանը, որը պատկանում է Kazancı Holding-ին, իսկ դրա սեփականատեր Ջեմալ Քազանջին հետաքրքրված է Հայաստանի էներգետիկ ցանցերի գնմամբ»,- գրել է քարոզիչը։ 

Նա պնդել է, թե հիմնական միջնորդը Ազգային ժողովի «Քաղաքացիական պայմանագիր» խմբակցության պատգամավոր Խաչատուր Սուքիասյանն է, որը իբրև թե զբաղվում է նաև Քաջարանի պղնձամոլիբդենային կոմբինատի վերավաճառքով նույն թուրքերին։ 

Փաստացի, Արեշևը պնդում է անում՝ հղում անելով ինչ-որ «առկա տեղեկությունների», առանց վկայակոչելու հստակ աղբյուր կամ իր պնդումն ապացուցող որևէ փաստ։ 

«Փաստերի ստուգման հարթակը» բաց աղբյուրներում, այդ թվում նաև նշված թուրքական ընկերության առցանց ռեսուրսներում Արեշևի պնդումը հաստատող փաստեր չհայտնաբերեց։ Ընկերությունը երբևէ առնվազն հրապարակային կերպով հետաքրքրված չի եղել Հայաստանում էներգետիկ նախագծերով։ 

Ավելին, տեղեկությունը հերքել է նաև Խաչատուր Սուքիասյանի մամուլի քարտուղարը՝ անվանելով այն զառանցանք։ 

Այսպիսով, Կրեմլի քարոզչի պնդումը ոչ փաստահեն է ու հերքված։ 

Հոդվածը հրապարակվել է Կրեմլի հայտնի քարոզչական հարթակում 

Արեշևի հոդվածը հրապարակվել է 2005 թվականից գործող ռուսաստանյան Ռազմավարական կուլտուրայի հիմնադրամ (Фонд Стратегической Культуры/Strategic Culture Foundation, ՌԿՀ) կոչվող կազմակերպության հանդեսում։ Հիմնադիրը հենց Արեշևն է՝ Կրեմլի ակտիվ քարոզիչը, որը պարբերաբար հայտնվում է հայկական լրատվական որոշ հարթակներում։ 

ՌԿՀ-ն ներկայանում է որպես աշխարհաքաղաքական թեմաների վերաբերյալ անկախ փորձագիտական վերլուծությունների հարթակ, սակայն շատ վաղուց հայտնի է որպես Կրեմլի քարոզչական հարթակ, որում հրապարակվում են կեղծ ու մանիպուլյատիվ հոդվածներ՝ հիմնականում հակաարևմտյան բնույթի։ 

Հիմնադրամն ակտիվորեն աշխատում է նաև հետխորհրդային երկրների իշխանությունների դեմ քարոզչության ուղղությամբ։ 

Փաստերի ստուգման EU vs Disinformation հարթակը, որը ռուսական ապատեղեկատվության դեմ պայքարի շրջանակներում բազմաթիվ հետաքննություններ է կատարել, ժամանակին ուսումնասիրել էր և պարզել, որ այս կազմակերպությունը թափանցիկ չի աշխատում, թաքցնում է իր աշխատակիցներին, տարածում է ռուսական կենտրոնական իշխանության քարոզչական թեզերը։ 

Թեզն առաջինը շրջանառել է Հայաստանի ընդդիմությունը 

Հատկանշական է, որ այս թեզն առաջին անգամ շրջանառվել է ԱԺ «Հայաստան» խմբակցության պատգամավոր Իշխան Սաղաթելյանի կողմից։ 

Վերջինս, նախօրեին լրագրողների հետ զրույցում անդրադառնալով թեմային, պնդել էր, թե Փաշինյանը «ռուսական կապիտալով ընկերությունները պետք է ազգայնացման անվան տակ խլի, որ այս ամեն ինչը հանձնի թուրքերին»։ 

Նանե Մանասյան 

[easy-social-share buttons="facebook,twitter,vk,telegram" counters=1 style="icon" point_type="simple"]