Տասը տարիների ընթացքում ՊԵԿ-ի դեմ ներկայացվել է ավելի քան 12 հազար դատական հայց․ դրանց թիվը կտրուկ աճել է 2016 թ․-ից

2015-2025 թվականների ընթացքում Հայաստանի Հանրապետության պետական եկամուտների կոմիտեի դեմ Վարչական դատարան է ներկայացվել 12,506 հայցադիմում։ Դրանց թիվը կտրուկ աճել է 2016 թվականից սկսած։ 

«Փաստերի ստուգման հարթակը» ՀՀ դատական դեպարտամենտից հարցմամբ խնդրել է ներկայացնել տվյալներ, թե որքա՞ն հայցադիմում է ներկայացվել ՊԵԿ-ի դեմ տասը տարիների ընթացքում՝ ըստ տարիների։

2015 թվականին ՊԵԿ-ի դեմ ՀՀ վարչական դատարան ներկայացվել է ընդամենը 5 հայց։ Հաջորդ տարի արդեն այդ հայցերի քանակը կտրուկ աճել է։ Այսպես, 2016 թ․-ին ներկայացվել է 310 հայց, 2017 թ․-ին՝ 359, 2018 թ․-ին՝ 423։ 2019 թ․-ից Վարչական դատարան ՊԵԿ-ի դեմ ներկայացվող հայցերի քանակը նույնպես կտրուկ աճել է, որի մանրամասները հնարավոր է տեսնել ստորև ներկայացվող ինֆոգրաֆիկայում։ 

ՊԵԿ-ի դեմ ամենաշատ հայցերը ներկայացվել են 2022 թ․-ին՝ 2184 հայց։

ՀՀ դատական դեպարտամենտից հետաքրքրվել էինք նաև, թե ներկայացված դատական հայցերից որքա՞նն է բավարարվել, այսինքն՝ որքա՞ն վարչական ակտ է կայացվել ՊԵԿ-ի դեմ։ 

FIP.am-ին պատասխանել են, որ տասը տարիների ընթացքում ՊԵԿ-ի դեմ ներկայացված 12,506 հայցադիմումներից 7527-ով Վարչական դատարանը բավարարել է ներկայացված հայցը։ 

Փաստացի, տասը տարիների ընթացքում դատարանը բավարարել է հարկային մարմնի դեմ ներկայացված հայցերի 60 տոկոսը։

Որքա՞ն ներկայացված հայց չի բավարարվել, այսինքն՝ որքան որոշում է կայացվել ՊԵԿ-ի օգտին, հարցին ի պատասխան նշել են, որ ներկայացված 12,506 հայցադիմումներից 1506 հայցադիմումով Վարչական դատարանը մերժել է ներկայացված հայցը։ 

Մյուս հարցին, թե որքա՞ն բավարարված հայցերի դեպքում է ՊԵԿ-ը բողոքարկել դրանք, պատասխանել են՝ բավարարված 7527 հայցադիմումներից 6009-ով (80%-ը) ՀՀ պետական եկամուտների կոմիտեի կողմից գործն ըստ էության լուծող ակտը բողոքարկվել է ՀՀ վերաքննիչ վարչական դատարան։ Դրանց ելքի մասին տվյալ չի ներկայացվել։

Նաև հետաքրքրվել էինք, թե որքա՞ն է կազմում նման բնույթի գործերի քննության միջին տևողությունը Վարչական դատարանում, այսինքն՝ որքա՞ն է տևում մեկ հայցի քննությունը։ Այս հարցին ՀՀ դատական դեպարտամենտից չեն պատասխանել՝ նշելով, որ «Դատական համակարգ» համակարգչային ծրագրում, որի միջոցով ստացել են վերոնշյալ վիճակագրությունը, գործիքակազմ չկա նման տվյալ ստանալու համար։ 

Հասմիկ Համբարձումյան

[easy-social-share buttons="facebook,twitter,vk,telegram" counters=1 style="icon" point_type="simple"]