Կանադայի ԱԳ նախարարը ԼՂ հակամարտության մասին գրառում չի արել․ լրատվամիջոցները սխալ են ներկայացրել նրա հայտարարությունը

Հայաստանյան մի շարք լրատվամիջոցներ Կանադայի արտաքին գործերի նախարար Մելանի Ջոլիին են վերագրել Լեռնային Ղարաբաղի հակամարտության լուծված չլինելու վերաբերյալ գրառում։ 

Մասնավորապես, մի շարք ԶԼՄ-ներ (24news.am, «Հայկական ժամանակ», «Oragirnews» և այլն) պնդել են, թե Կանադայի ԱԳ նախարարը գրել է հետևյալը․ «Լեռնային Ղարաբաղի հակամարտությունը մնում է չլուծված։ Կանադայի կոչը վճռորոշ նշանակություն ունի այս հարցի` համաշխարհային օրակարգում առաջնային մնալու համար: Հելսինկյան սկզբունքներով առաջնորդվող իրական բանակցությունների միջոցով, ներառյալ Արցախի ժողովրդի ինքնորոշման հիմնարար իրավունքը, պետք է հասնել հիմնական լուծման»։ 

Արտապատկերումները՝ «Հայկական ժամանակից» և 24news.am-ից։ 

«Փաստերի ստուգման հարթակն» ուսումնասիրել է Կանադայի արտաքին գերատեսչության կայքը և նախարարի սոցիալական մեդիառեսուրսները՝ պարզելու, թե արդյո՞ք Ջոլին նման գրառում է արել Լեռնային Ղարաբաղի հակամարտության վերաբերյալ։

Ի՞նչ գրառում է արել Կանադայի ԱԳ նախարարը

Ապրիլի 2-ին՝ Ապրիլյան 4-օրյա պատերազմի տարելիցին, Կանադայի ԱԳ նախարար Մելանի Ջոլին սոցիալական մեդիայի իր էջերում՝ X-ում և Instagram-ում, հրապարակում է արել՝ ոգեկոչելով պատերազմի զոհերի հիշատակը։ 

pic.twitter.com/iy7wES3VrS

— Mélanie Joly (@melaniejoly) April 2, 2025

«Լեռնային Ղարաբաղում 2016 թվականի Ապրիլյան 4-օրյա պատերազմի տարելիցի կապակցությամբ մենք հիշում ենք զոհվածներին և վերահաստատում Կանադայի նվիրվածությունը խաղաղությանը և երկխոսությանը։ Տևական լուծումը կարող է ձեռք բերվել միայն դիվանագիտության և միջազգային իրավունքի նկատմամբ հարգանքի միջոցով»,- մասնավորապես․ գրել է Կանադայի ԱԳ նախարարը։ 

FIP.am-ը, ուսումնասիրելով Կանադայի ԱԳ նախարարության կայքը, պարզել է, որ վերջին հայտարարությունը, որում այդ երկիրը պաշտոնապես անդրադարձել է բուն Լեռնային Ղարաբաղի հակամարտությանը, եղել է 2024 թվականի սեպտեմբերի 22-ին, որում անդրադարձ է կատարվել 2023 թվականի սեպտեմբերին Ադրբեջանի՝ Լեռնային Ղարաբաղի վրա հարձակման տարելիցին։  

Արտապատկերումը՝ Կանադայի ԱԳ նախարարության կայքից։ 

Փաստացի, Ջոլին հայաստանյան որոշ ԶԼՄ-ների կողմից իրեն վերագրվող գրառումը չի արել։ 

Կանադայի Հայ Դատի գրասենյակի գրառումը վերագրվել է Ջոլիին

Կանադայի ԱԳ նախարար Ջոլիի՝ Ապրիլյան պատերազմի զոհերի հիշատակը ոգեկոչող գրառումից որոշ ժամանակ անց այն իր ֆեյսբուքյան էջում կիսել է Կանադայի Հայ դատի գրասենյակը՝ գրելով իր մեկնաբանությունը։ 

«Արցախի (Լեռնային Ղարաբաղի) հակամարտությունը մնում է չլուծված, և Կանադայի կոչը՝ միջազգային իրավունքի վրա հիմնված կայուն լուծման հասնելու վերաբերյալ, վճռորոշ նշանակություն ունի հարցը համաշխարհային օրակարգում պահելու գործում։ Կայուն լուծումը պետք է ձեռք բերվի անկեղծ բանակցությունների միջոցով՝ առաջնորդվելով Հելսինկյան սկզբունքներով, ներառյալ Արցախի ժողովրդի ինքնորոշման հիմնարար իրավունքը»,- գրել է գրասենյակն իր ֆեյսբուքյան էջում։

Փաստացի, հայաստանյան որոշ լրատվամիջոցներ Հայ Դատի գրասենյակի մեկնաբանությունը վերագրել են Կանադայի ԱԳ նախարարին։ Մինչդեռ նա Լեռնային Ղարաբաղի հակամարտության վերաբերյալ վերջերս որևէ հայտարարություն չի արել․ հակամարտության վերաբերյալ նրա վերջին անդրադարձը եղել է 2024 թվականի սեպտեմբերին։ 

Նանե Մանասյան

[easy-social-share buttons="facebook,twitter,vk,telegram" counters=1 style="icon" point_type="simple"]