Ռուսական ներխուժումը՝ 100-ավոր երեխաների մահվան պատճառ. Զախարովան շրջանցում է ուկրաինացի երեխաների տվյալները

Ռուսաստանի Դաշնության արտաքին գործերի նախարարության ներկայացուցիչ Մարիա Զախարովան մարտի 13-ի ճեպազրույցում փոքր-ինչ էմոցիոնալ կերպով հայտարարել է ռուս-ուկրաինական հակամարտության ընթացքում զոհված ռուսաստանցի երեխաների թիվը։ 

«Տասը տարում (2014թ․-ից՝ ռուս-ուկրաինական հակամարտության մեկնարկից ի վեր,- հեղ․) ուկրաինացի անմարդկային գրոհայինների ձեռքերի վրա ոչ պակաս, քան 1700 երեխայի արյուն կա: Եվս մեկ անգամ շեշտեմ` սրանք մոտավոր, նախնական թվեր են», — հուզվելով ասել է Զախարովան։ 

Ըստ Զախարովայի՝ արդեն 2022 թվականի փետրվարի վերջից, երբ ՌԴ զինված ուժերը ներխուժեցին Ուկրաինա, զոհված ռուսաստանցի երեխաների թիվը կազմել է 218, իսկ վիրավորներինը՝ 830։  

«Փաստերի ստուգման հարթակն» ամփոփել է նաև 2022 թ․ փետրվարի 24-ից առ այս պահը զոհված ուկրաինացի երեխաների վերաբերյալ հրապարկված վերջին տվյալները։ 

Այսպես, համաձայն ՄԱԿ-ի Մանկական հիմնադրամի (ՅՈՒՆԻՍԵՖ) 2024 թ․ նոյեմբերի դրությամբ վերջին ստուգված տվյալների, առնվազն 2406 երեխա է զոհվել կամ վիրավորվել Ուկրաինայում․ ռուսական ներխուժումը 659 ուկրաինացի երեխայի կյանք է խլել, 1747 երեխա էլ վիրավորվել է։ 

Փաստացի, ըստ ՅՈՒՆԻՍԵՖ-ի, Ուկրաինայում շաբաթական միջինը 16 երեխա է սպանվում կամ վիրավորվում ռուսական զինված ուժերի թիրախավորման հետևանքով։ 

Պատերազմի մեկնարկից ի վեր Ուկրաինայում երեխաների ողբերգական մահվան դեպքերը բազմաթիվ են։ Օրինակ, ուկրաինական Օդեսա քաղաքի վրա ռուսական հրթիռակոծությունը խլել էր մոր և ընդամենը երեք ամսական երեխայի կյանքը։ 

Մեկ այլ սահմռկեցուցիչ դեպք․ 2024 թվականի սեպտեմբերին ռուսական հարձակումից զոհվեցին մեկ ընտանիքից մայրն ու նրա երեք դուստրը։ 

After today’s 🇷🇺 attack, the only person in this photo who survived is the man.
Mother Yevheniya and her three daughters — Yaryna, Daryna, and Emiliya — were killed.
Standing in the back is Yaryna Bazylevych. She was 21 y.o. Yaryna worked in our office for “Youth Capital 2025” pic.twitter.com/XmSU3FPEbS

— Андрій Садовий (@AndriySadovyi) September 4, 2024

Այսպիսով, Ռուսաստանի՝ Ուկրաինա ներխուժումը հարյուրավոր երեխաների մահվան, հազարավորների վիրավորման պատճառ է դարձել թե’ Ուկրաինայում և թե’ Ռուսաստանում։ Միևնույն ժամանակ, Զախարովան հիշատակում է պատերազմից տուժած միայն ռուսաստանցի երեխաների տվյալները՝ շրջանցելով հարյուրավոր ուկրաինացի երեխաների զոհվելու փաստը։

Նանե Մանասյան

[easy-social-share buttons="facebook,twitter,vk,telegram" counters=1 style="icon" point_type="simple"]