«Փաշինյանին հաշված օրեր են մնացել»․ ընդդիմադիրների խոստումների ու կանխատեսումների հետքերով

2024 թվականին ևս Հայաստանի ընդդիմությունը խոստանում էր, որ ՀՀ վարչապետ Նիկոլ Փաշինյանը հեռացվելու է իշխանությունից․ որոշ դեպքերում, ընդդիմադիր առանձին գործիչներ հստակ ժամկետներ էին նշում։ 

«Փաստերի ստուգման հարթակը» ամփոփել է ընդդիմադիր գործիչների ու շարժումների առաջնորդների հայտարարությունները․ այս տարի ևս իրականություն չեն դարձել իշխանափոխության մասին ընդդիմադիրների խոստումները։ 

Փաշինյանը հեռանալու է 24-ի գարնանը 

Հայաստանի հանրապետական կուսակցության ներկայացուցիչ Էդուարդ Շարմազանովը 2023 թվականի հուլիսին 24News-ի եթերում պնդում էր, թե «կոնկրետ տվյալներ կան»՝ անցնող տարվա գարնանը Փաշինյանը հեռացվելու է։ 

«Նիկոլ Փաշինյանը գնալու է, 2024 թվի գարնանը, նա որպես վարչապետ չի լինելու»,- ասել էր նա։ 

Նույն թվականի հոկտեմբերին քաղաքագետ, Դեմոկրատական այլընտրանք կուսակցության ղեկավար Սուրեն Սուրենյանցը ևս պնդում էր, թե 2024 թվականի գարնանը Փաշինյանին հեռացնելու աշխարհաքաղաքական կոնսենսուս կա։ 

«Փաշինյանի օրերը հաշված են» 

Փաշինյանին հեռացնելու ու իշխանափոխություն անելու մասին հայտարարություններն ու խոստումները գերակշռող դարձան այս տարվա ընթացքում։ 2024-ի մարտին ՀՀ պաշտպանության նախկին նախարար, «Համահայկական ճակատ» կոչվող շարժման ղեկավար Արշակ Կարապետյանը, որն այժմ ապաստանում է Ռուսաստանում, Մոսկվայից տեսաուղերձ էր հղել՝ պնդելով, որ «Փաշինյանի օրերը հաշված են»։ 

Տավուշի թեմի առաջնորդ Բագրատ Գալստանյանի՝ 2024-ի մայիսին մեկնարկած «Տավուշը հանուն հայրենիքի»  շարժումը նույնպես հայտարարում էր, որ վարչապետը հեռանալու է։ Գարնանը համակիրների հետ նա սկսեց իր քայլերթը Տավուշից՝ սահմանազատման հետ կապված հարցերի վերաբերյալ պարզաբանումներ ստանալու պահանջով, սակայն հասնելով Երևան՝ պահանջեց Փաշինյանի խաղաղ հեռացումը։ Տարին ավարտվում է, և Բագրատ Գալստանյանը հույսը չի կտրել․ այժմ էլ է հայտարարում՝ Փաշինյանը շուտով կհեռանա, և իրենց նպատակները կիրականանան։  

Այսպիսով, չնայած ընդդիմադիր տարբեր ուժերի ներկայացուցիչների կանխատեսումներին և խոստումներին, Նիկոլ Փաշինյանը 2024 թվականին շարունակել է զբաղեցնել ՀՀ վարչապետի պաշտոնը։ 

Նանե Մանասյան 

[easy-social-share buttons="facebook,twitter,vk,telegram" counters=1 style="icon" point_type="simple"]