56 թռիչք՝ չորս տարում․ որքան է վճարել Ադրբեջանը Հայաստանին՝ ՀՀ օդային տարածքն օգտագործելու համար

«Զվարթնոց» միջազգային օդանավակայանից դեկտեմբերի 11-ին իրականացված Երևան-Բաքու չարթերային չվերթի մասին լուրն իրարանցում էր առաջացրել հայաստանյան տեղեկատվական դաշտում․ օդանավակայանից լրատվամիջոցներին հայտնել էին, որ Երևանից Բաքու չվերթը միջազգային պատվիրակություն է պատվիրել և որ նման թռիչքներ նախկինում ևս եղել են։ 

«Փաստերի ստուգման հարթակը» ուսումնասիրել է վերջին տարիներին Հայաստանում գործող քաղաքացիական օդանավակայաններից դեպի Ադրբեջան և Ադրբեջանից Հայաստան ուղղությամբ իրականացված թռիչքների վիճակագրությունը։ 

Այսպես, Հայաստանի քաղաքացիական ավիացիայի կոմիտեից FIP.аm-ին հայտնել են, որ 2021 թվականից մինչև 2024 թվականի դեկտեմբերի 12-ը ներառյալ նշված և հակառակ ուղղություններով իրականացվել է ընդհանուր առմամբ 56 թռիչք․ 

2021-ին՝ 33, 

2022-ին՝ 13, 

2023-ին՝ 6, 

2024-ին՝ 4։ 

ՀՀ օդային տարածքով տարանցիկ (այսինքն Ադրբեջանի օդանավակայաններից ՀՀ օդային տարածքով դեպի երրորդ երկիր) չվերթներ իրականացնելու դիմաց ադրբեջանական ավիաընկերությունների կողմից հաշվեգրված գումարը նշված ժամանակահատվածում կազմել է ընդհանուր առմամբ €471,000 (€-եվրո)․  

2021-ին՝ €35,700, 

2022-ին՝ €142,500,

2023-ին՝ €111,500, 

2024-ի նոյեմբերի դրությամբ՝ €181,400։ 

Կոմիտեից հայտնել են նաև, որ հայաստանյան ավիաընկերությունների կողմից Ադրբեջանի օդային տարածքն օգտագործելու վերաբերյալ տեղեկությունների չի տիրապետում։ 

Նանե Մանասյան 

[easy-social-share buttons="facebook,twitter,vk,telegram" counters=1 style="icon" point_type="simple"]