Գծանշման աշխատանքներն ավարտված չեն. քաղաքապետարանում սխալ են զեկուցում

Հունիսի 5-ին Երևանի քաղաքապետարանի գործակարգավարական խորհրդակցության ժամանակ փոխքաղաքապետ Տիգրան Ավինյանին զեկուցեցին, որ Երևանի մի քանի վարչական շրջաններում գծանշման աշխատանքներն ամբողջովին ավարտվել են։

«Սահմանված ժամանակացույցով աշխատանքները առաջ են գնում գծանշման մասով։ Ավարտված է Կենտրոն, Նոր Նորք, Քանաքեռ-Զեյթուն, Մալաթիա-Սեբաստիա և Ավան վարչական շրջանները։ Ներկայումս գծանշման աշխատանքներ են իրականացվում Շենգավիթ և Էրեբունի վարչական շրջաններում»,- զեկուցեց Տրանսպորտի վարչության պետի ժամանակավոր պաշտոնակատար Վազգեն Հարությունյանը։

Իրականում, նշված վարչական շրջաններում թեև գծանշման աշխատանքներ արվել են, սակայն ոչ ամբողջությամբ։

«Փաստերի ստուգման հարթակը» շրջայցի շնորհիվ բոլոր նշված շրջաններում գտավ այնպիսի փողոցներ, որոնք գծանշված չեն կամ գծանշված են կիսով չափ։ Շեշտենք, որ խոսքը ոչ թե բակային տարածքների, այլ հիմնական և երկրորդային փողոցների մասին է։

Այսպես, Կենտրոնում նոր գծանշումը բացակայում է նույնիսկ Հանրապետության հրապարակում։ Գծանշված չէր նաև, մասնավորապես, Վազգեն Սարգսյան փողոցը, Տերյան փողոցից դեպի Աբովյան պուրակ տանող ճանապարհը։

Նոր Նորքում գծանշումներն իսպառ բացակայում են նոր ասֆալտապատված Մոլդովական փողոցում (փողոցն ասֆալտապատվել է շաբաթներ առաջ)։

Քանաքեռ-Զեյթուն վարչական շրջանում գծանշումները կիսատ են, երբեմն էլ ընդհանրապես բացակայում են Դրոյի, Ուլնեցու փողոցներում։ Որոշ հատվածներում նույնիսկ փողոցի ինչ-որ կետից դադարել են գծանշել։

Մալաթիա-Սեբաստիայում ընդհանրապես գծանշումներ արված չեն նոր ասֆալտապատված Առնո Բաբաջանյան և Տիչինա փողոցներում։

Ավանում էլ գծանշված չեն Նվեր Սաֆարյան փողոցը, Սաֆարյան-Խուդյակով խաչմերուկը, Վախթանգով-Թամրուչի խաչմերուկը և այլն։

Այս ամենից բացի, գրեթե չենք հանդիպել թարմացված հետիոտնային անցումների, իսկ որոշ տեղերում նույնիսկ անցումների գծանշումը տեսանելի չէ։

Գրեթե բոլոր դիտարկված տեղերում ընդհանրապես բացակայում են փողոցների եզրային գծանշումները։ Մի շարք այլ տեղերում, որտեղ հավանաբար այս գարնանը գծանշում է արվել, արդեն նկատվում է դրանց մաշվածությունը կամ վատ տեսանելիությունը: 

Կրկին հիշեցնենք, որ այս ամենը «բացահայտել ենք» ընդամենը այս տարածքներում մի քանի ժամ շրջելու արդյունքում՝ առանց խորը ուսումնասիրության։

Այպիսով փաստենք, որ քաղաքապետարանի պաշտոնյայի հայտարարությունը չի համապատասխանում իրականությանը. այն վարչական շրջաններում, որոնց մասին զեկուցվում է, որ «գծանշման աշխատանքներն ամբողջովին ավարտված չեն», ոչ բոլոր փողոցներն են գծանշված։

Սևադա Ղազարյան

[easy-social-share buttons="facebook,twitter,vk,telegram" counters=1 style="icon" point_type="simple"]