Դպրոցական դասագրքերում ՀՀ ամենաբարձր լեռը Արագածն է. ինչի՞ն է հղում անում Փաշինյանը

Գլխավոր լուսանկարում՝ Արարատի պատկերը Արագածի գագաթից: Աղբյուրը՝ Cosmo Deus 

Մայիսի 22-ին լրագրողների հետ հանդիպման ընթացքում վարչապետ Նիկոլ Փաշինյանը, պատասխանելով Արարատ և Արագած լեռների գաղափարական նշանակության մասին հնչած հարցին, հայտարարեց, որ Հայաստանի դպրոցներում երեխաներին սովորեցնում են, թե ՀՀ ամենաբարձր լեռը Արարատն է, ինչն էլ, ըստ վարչապետի, Հայաստանի հանդեպ բացասական վերաբերմունք է առաջացնում Թուրքիայի մոտ:

 «Երբ որ ես երեխաների հետ, աշակերտների հետ հանդիպում եմ, խոսք ա գնում աշխարհագրությունից, էս կողմ, էն կողմ, հարցնում եմ՝  էրեխեք, Հայաստանի Հանրապետության ամենաբարձր լեռը ո՞րն ա… և երեխաների առնվազն կեսը կամ կեսից շատը ասում ա՝ Արարատը։

Հիմա եկեք սա նայենք հակառակ կողմից։ Հակառակ կողմից նայում են Թուրքիայում։ Ասում են Արարատը… Թուրքիայի միջազգայնորեն ճանաչված տարածքի մեջ ա։ Հիմա եթե Հայաստանում… էրեխեքը որտեղի՞ց են իմանում էս ինֆորմացիան։ Իմանում են դպրոցներում դասի գնալուց։ Այսինքն՝ կառավարության կողմից իրականացվող կրթական քաղաքականության արդյունքում։

Ասում են լավ, եթե էս երեխեքը հիմա ասում են, որ Հայաստանի ամենաբարձր սարը Արարատն ա և ոչ թե Արագածը, էս նշանակո՞ւմ ա արդյոք, որ Հայաստանի Հանրապետությունն ունի տարածքային պահանջներ Թուրքիայի նկատմամբ։ Է մի րոպե։ Եթե Հայաստանի Հանրապետությունը Թուրքիայի նկատմամբ տարածքային պահանջներ ունի, բայց ինչի՞ մենք որևէ ձևով աջակցենք, նպաստենք կամ նույնիսկ չնկատել տանք, որ Հայաստանի Հանրապետությունը զարգանա։ Ընդհակառակը, եթե իրանք մեզնից տարածքային պահանջներ ունեն, ընդհակառակը, մենք պետք ա ամեն ինչ անենք, որ իրանց ոչնչացնենք»,- եզրահանգեց Փաշինյանը։

Ըստ Հայաստանի վարչապետի, դպրոցներում երեխաներին սովորեցնում են, թե Հայաստանի ամենաբարձր լեռը Արարատն է։

Մինչդեռ այս պահին դպրոցներում օգտագործվող աշխարհագրության դասագիրքը հերքում է վարչապետի պնդումը։ Հայաստանի ամենաբարձր լեռան մասին գրված է 9-րդ դասարանի «Հայաստանի աշխարհագրություն» դասագրքում։ Ըստ այդմ՝ Հայաստանի ամենաբարձր լեռը Արագածն է (4090մ)։

Լուսանկարն արված է 9-րդ դասարանի «Հայաստանի աշխարհագրություն» դասագրքից։ 2020 թ․ հրատարակություն, հեղինակներ՝ Մաքսիմ Մաասյան, Արմեն Հովսեփյան

Այսպիսով փաստենք, որ վարչապետի պնդումը, թե դպրոցներում երեխաներին սովորեցնում են, թե Հայաստանի Հանրապետության ամենաբարձր լեռը Արարատն է, հիմնավորված չէ։ Ավելին, աշխարհագրության 9-րդ դասարանի դասագրքում հստակ ամրագրված է, որ Հայաստանի ամենաբարձր լեռն Արագածն է: 

Չբացառելով, որ որոշ դպրոցներ կամ որոշ մանկավարժեր կարող են այլընտրանքային տեղեկատվություն մատուցել աշակերտներին՝ վարչապետի պնդումը թողնում ենք առանց վճռի: «Փաստերի ստուգման հարթակը» փորձում է ստանալ նաև խնդրի վերաբերյալ ԿԳՄՍ նախարարության մեկնաբանությունը:  

Սևադա Ղազարյան

 

[easy-social-share buttons="facebook,twitter,vk,telegram" counters=1 style="icon" point_type="simple"]