«Իմ քայլի» պատգամավորները Սահմանադրական փոփոխությունների քվեարկության օրը չեն իմացել վարակված լինելու մասին

Լրատվական կայքերում հունիսի 28-ից տարածվում է մի տեղեկություն, ըստ որի` ԱԺ «Իմ քայլը» խմբակցության պատգամավորները, կորոնավիրուսով վարակված լինելով հանդերձ, հունիսի 22-ին ներկա են եղել սահմանադրական փոփոխությունների նախագծի քվեարկությանը։

Այս տեղեկությունն առաջինը հրապարակել է Alternativ.am կայքը, որը, հղում անելով իր «հավաստի» աղբյուրներին, գրել է․ «Այդ օրը՝ հունիս 22-ին, ԱԺ նիստին ներկա 89 պատգամավորներից երկուսի մոտ արդեն դրանից մի քանի օր առաջ ախտորոշվել էր կորոնավիրուս, բայց իշխանական հպատակ պատգամավորներին ցուցված է եղել անտեսել այդ փաստը և պարտադիր ներկայանալ քվեարկությանը: Այդ պատգամավորներն են իմքայլական Վիկտոր Ենգիբարյանը, ում մոտ ախտորոշվել էր վարակը 18․06․2020 թ․ Նորքի ինֆեկցիոն հիվանդանոցում և Հայկ Գևորգյանը, ում մոտ վարակն ախտորոշվել է 19․06․2020 թ․ կրկին Նորք ինֆեկցիոն հիվանդանոցում»։

Կայքը նաև, հղում անելով Քրեական օրենսգրքին, գրել էր, որ այս պատգամավորները պետք է ենթարկվեն քրեական պատասխանատվության, քանի որ դիտավորյալ խախտել են հայտարարված արտակարգ դրության ընթացքում ինքնամեկուսացման կանոնները կամ ազատ տեղաշարժվելու իրավունքի այլ սահմանափակումները։

Այս տեղեկությունը տարածել են բազմաթիվ լրատվական կայքեր, մասնավորապես՝ News.am-ը, 168.am-ը, Hayeli.am-ը, Yerkir.am-ը, 7or.am-ը և այլն։

«Փաստերի ստուգման հարթակը» որոշեց պարզել, թե երբ են պատգամավորներն իմացել, որ վարակված են կորոնավիրուսով։

Նշենք, որ «Իմ քայլը» խմբակցության պատգամավոր Վիկտոր Ենգիբարյանն արդեն իսկ արձագանքել էր լրատվականների այս տեղեկություններին և իր ֆեյսբուքյան էջում հերքել էր լուրը՝ այն անվանելով «սուտ մատնություն»։ Պատգամավորը նաև իր էջում 

տեղադրել էր թեստի դրական պատասխանի լուսանկարը, որից հստակ երևում է, որ Ենգիբարյանից նմուշառում է կատարվել հունիսի 23-ին, այսինքն՝ վերոնշյալ քվեարկության հաջորդ օրը։

Վիկտոր Ենգիբարյանը Fip.am-ի հետ զրույցում հայտնեց, որ հունիսի 22-ի առավոտյան չի ունեցել ախտանշաններ, նույնիսկ Ազգային Ժողով մուտք գործելիս ջերմություն չի ունեցել։ Վերջինս սկսել է վատ զգալ այդ օրը երեկոյան, իսկ հաջորդ օրն արդեն հանձնել է թեստ, որի արդյունքը պատկերված է լուսանկարում։

Լրատվականների կողմից նշված մյուս պատգամավորը՝ Հայկ Գևորգյանը, Fip.am-ի հետ զրույցում նույնպես պնդեց, որ տեղեկությունը, թե ինքը քվեարկության է գնացել արդեն իսկ հաստատված վիրուսով, սուտ է։ Գևորգյանը հայտնեց, որ կորոնավիրուսի թեստ հանձնել է հունիսի 24-ին, այսինքն՝ քվեարկությունից 2 օր անց, ինչից հետո ինքնամեկուսացել է և մինչ օրս գտնվում է ինքնամեկուսացման մեջ։ Դրական պատասխանը ստացել է մեկ օր անց՝ հունիսի 25-ին։

Որպես ապացույց իր խոսքի՝ Գևորգյանը մեզ ներկայացրեց Նորքի ինֆեկցիոն հիվանդանոցից իրեն տրամադրված՝ թեստի պատասխանի լուսանկարը։

Այսպիսով փաստենք, որ լրատվականների կողմից տարածված տեղեկությունը, թե Հայկ Գևորգյանի և Վիկտոր Ենգիբարյանի մոտ արդեն իսկ ախտորոշված է եղել կորոնավիրուս, սակայն վերջիններս մասնակցել են քվեարկությանը, չի համապատասխանում իրականությանը։

Սևադա Ղազարյան