Նախկինում դատապարտված անձը ընտրական հանձնաժողովների կազմում ընդգրկվելու իրավունք ունի

«Այո» նախընտրական շտաբի կողմից Երևան քաղաքի Նանսենի 14 հասցեում գտնվող 2/51 տեղամասային ընտրական հանձնաժողովի նախագահ էր նշանակվել Արտակ Ղուկասյանը։

Արտակ Ղուկասյանը նախկին երկու նախագահների, ինչպես նաև նախկին ՊԵԿ նախագահ Գագիկ Խաչատրյանի և այլ պաշտոնյաների դեմ մահափորձեր նախապատրաստելու համար Քրեական օրենսգրքի միանգամից 7 հոդվածներով 2011 թվականին դատապարտվել էր ազատազրկման 10 տարի 9 ամիս ժամկետով։

2018 թվականին՝ հեղափոխությունից հետո, Ղուկասյանը պայմանական վաղաժամկետ ազատ էր արձակվել և այժմ նշանակվել է վերոնշյալ տեղամասային ընտրական հանձնաժողովում՝ որպես հանձնաժողովի նախագահ։

«Փաստերի ստուգման հարթակը» հրապարակմամբ անդրադարձել էր Արտակ Ղուկասյանին և պարզել, որ վերջինիս նշանակումը հանձնաժողովի նախագահի պաշտոնում Ընտրական օրենսգրքի 41-րդ հոդվածի 2-րդ մասի պահանջների խախտում է։

Ըստ օրենքի՝ հանձնաժողովի անդամ չեն կարող լինել դիտավորությամբ կատարված միջին ծանրության, ծանր կամ առանձնապես ծանր հանցանքների համար դատվածություն ունեցող անձինք։ Եվ քանի որ Ղուկասյանը դատապարտվել էր հենց այսպիսի հանցագործությունների համար, «Փաստերի ստուգման հարթակը» պնդել էր, որ Ղուկասյանի նշանակումը ՏԸՀ նախագահի պաշտոնում ԸՕ խախտում է։

Հոդվածի հրապարակումից հետո մեզ հետ կապ հաստատեց Արտակ Ղուկասյանը և հայտնեց, որ իր նկատմամբ կիրառված պատիժը համարվում է մարված։

Ըստ Քրեական օրենսգրքի 84-րդ հոդվածի 1-ին մասի՝ անձը դատվածություն ունեցող է համարվում մեղադրական դատավճիռն օրինական ուժի մեջ մտնելու օրվանից մինչև դատվածությունը մարվելու կամ հանվելու պահը: 

Եվ քանի որ Ղուկասյանի հանդեպ կիրառված պատժի սկիզբ համարվում է ոչ թե դատավճռի հրապարակման օրը (2011 թ․ հոկտեմբեր), այլ կալանավորման օրը՝ (2009 թ․ մայիս), ապա Ղուկասյանն արդեն իսկ համարվում է դատվածություն չունեցող, և վերջինիս նշանակումը ՏԸՀ նախագահի պաշտոնում օրենքի խախտում չէ։

[easy-social-share buttons="facebook,twitter,vk,telegram" counters=1 style="icon" point_type="simple"]