Եվրասիական հաջողությունների իլյուզիան

Վերջին ժամանակներում առավել հաճախ են դառնում այն դեպքերը, երբ Հայաստանի Հանրապետության և ընդհանրապես Եվրասիական տնտեսական միության բարձրաստիճան պաշտոնյաները ներկայացնում են ոչ ճշգրիտ վիճակագրական տվյալներ՝ համոզելու համար հասարակությանը, որ Եվրասիական տնտեսական միությունը սկսել է իրական տնտեսական օգուտներ ապահովել անդամակից երկրներին:

Վերջին այդպիսի դեպքը գրանցվել է Բիշքեկ քաղաքում օրերս տեղի ունեցած Եվրասիական տնտեսական բարձրագույն խորհրդի նիստի ժամանակ, որի շրջանակներում ունեցած իր ելույթում Հայաստանի նախագահը նշել է, որ ՀՀ-ից արտահանումը դեպի ԵԱՏՄ երկրներ աճել է շուրջ 65 տոկոսով: ՀՀ Ազգային վիճակագրական ծառայության կողմից հրապարակված վիճակագրական տվյալները, սակայն, վկայում են, որ այս ցուցանիշը ուռճացված է:

Այսպես, 2016թ.-ին ՀՀ արտահանումը դեպի ԵԱՏՄ երկրներ կազմել է մոտ 392 մլն դոլար 2015թ.-ի գրանցված 257 մլն դոլարի համեմատությամբ: Այդպիսով, դեպի ԵԱՏՄ երկրներ ՀՀ արտահանումը 2016թ. ընդհանուր առմամբ աճել է ոչ թե 65%-ով, այլ մոտ 53 տոկոսային կետով: Եթե այս ցուցանիշը համեմատելու լինենք 2014 թ. գրանցված 324.6 մլն դոլար ցուցանիշի հետ, ապա կտեսնենք, որ արտահանումը դեպի ԵԱՏՄ երկրներ դրա ձևավորման պահից սկսած ավելացել է ընդամենը 20%-ով: Ընդ որում, դեպի ԵԱՏՄ երկրներ արտահանման անգամ այսպիսի համեստ աճը ապահովվել է միայն Հայաստանից դեպի Ռուսաստան արտահանման աճի հաշվին, ինչի արհեստական լինելու խնդրին «Իրազեկ քաղաքացիների միավորումը» անդրադարձել է դեռ ամիսներ առաջ:

Այդպիսով, Հայաստան-ԵԱՏՄ տնտեսական հարաբերությունները բնութագրող հիմնական ցուցանիշների շարունակական աղավաղումը կարծես թե մեր իրականությունում դառնում է ավանդույթ: Հավանաբար, պատճառն այն է, որ Հայաստանը իր ԵԱՏՄ անդամակցության երկու և ավելի տարիների ընթացքում այդպես էլ չկարողացավ դրական տնտեսական էֆեկտ ապահովել այդքան բաղձալի 180 միլիոնանոց շուկայի ընձեռած հնարավորություններից:

[easy-social-share buttons="facebook,twitter,vk,telegram" counters=1 style="icon" point_type="simple"]