Ոչ թե հուշարձանն է վանդալիզմի ենթարկվել, այլ ՌԴ դրոշի ժապավեններն են տրորվել․ Զախարովան մանիպուլացնում է երևանյան միջադեպը

Հունվարի 30-ին ՌԴ արտաքին գործերի նախարարության պաշտոնական ներկայացուցիչ Մարիա Զախարովան, անդրադառնալով նախօրեին Երևանում «Պաշարված Լենինգրադի երեխաների» հուշարձանի մոտ տեղի ունացած միջադեպին, պնդել է, թե իբր հուշակոթողն է պղծվել ու ենթարկվել վանդալիզմի։ 

«Խստորեն դատապարտում ենք հունվարի 29-ին Երևանում «Պաշարված Լենինգրադի երեխաների» հուշարձանի մոտ կատարված վանդալիզմը։ Խորը ցավով նշում ենք, որ սա Ռուսաստանի և Հայաստանի համար ընդհանուր պատմության հերոսական էջերին նվիրված հուշարձանների պղծման առաջին դեպքը չէ։ ․․․հանրապետության իշխանություններից ակնկալում ենք ապագայում բարբարոսության նման դրսևորումների ճնշում»,- ասել է Զախարովան։ 

Հունվարի 27-ին սոցիալական մեդիայում տարածվեց օգտատերերից մեկի կողմից նկարահանված մի տեսանյութ, որում երևում էր, թե ինչպես է վերջինս հուշարձանի մոտ տեղադրված ծաղկեպսակների վրայից պոկում ՌԴ դրոշի ժապավեններն ու տրորում դրանք, ապա գետնին շրջում ծաղկեպսակները։  

Տեսանյութում չկան կադրեր, որոնք կհաստատեին բուն հուշակոթողը վնասելու, պղծելու կամ վանդալիզմի ենթարկելու պնդումները։

Հատկանշական է, որ ավելի ուշ դեպքի վերաբերյալ ՀՀ քննչական կոմիտեի նախագահի մամուլի քարտուղար Գոռ Աբրահամյանի տարածած հաղորդագրության համաձայն՝ միջադեպի առնչությամբ քրեական վարույթ է նախաձեռնվել ՀՀ քրեական օրենսգրքի 297-րդ հոդվածի 1-ին մասով, այն է՝ խուլիգանության հատկանիշներով։ 

«Կատարվում է նախաքննություն՝ կատարվածի հանգամանքները լիարժեք պարզելու և նշված անձի գործողություններին իրավական գնահատական տալու նպատակով»,- նշված է հաղորդագրության մեջ։ 

Մինչդեռ, հուշարձանը վանդալիզմի ենթարկելը կամ վնասելն ու դրա համար նախատեսված պատիժը սահմանված են ՀՀ քրեական օրենսգրքի 301 հոդվածով: 

Փաստացի, հարուցված քրգործի հիմքում առերևույթ խուլիգանության, և ոչ թե վանդալիզմի հատկանիշներով արարքն է։ Միևնույն ժամանակ, տարածված տեսանյութը չի հաստատում հուշակոթողը վանդալիզմի ենթարկելու պնդումը, փոխարենը կան միայն ՌԴ պետական դրոշի անարգման կադրեր։ 

Հատկանշական է նաև, որ ՀՀ քրեական օրենսգրքում (հոդված 472) պատասխանատվություն սահմանված է միայն ՀՀ պետական խորհրդանիշերի անարգման համար։ 

Նանե Մանասյան

[easy-social-share buttons="facebook,twitter,vk,telegram" counters=1 style="icon" point_type="simple"]