Մի գիշերում ԵՄ անդամ չեն դառնում․ Խզմալյանի կեղծ պնդումը

*Նյութը հրապարակումից հետո համալրվել է։ Համալրված մասը նշված է աստղանիշով

Հայաստանի եվրոպական կուսակցության նախագահ Տիգրան Խզմալյանը հունիսի 14-ին ֆեյսբուքյան գրառմամբ պնդել է, թե Եվրոպական միությունը Հայաստանին անդամակցության պաշտոնական հրավեր է ուղարկել։ 

«Հունիսի 8-ին Եվրոպան արեց իր քայլը, պաշտոնապես հրավիրելով ՀՀ-ին անդամակցելու ԵՄ-ին։ Հիմա Երևանի հերթն է։ Մենք դա կիրականացնենք»,- գրել է Խզմալյանը։ 

«Փաստերի ստուգման հարթակը» վերոհիշյալ պնդումը հաստատող պաշտոնական որևէ տեղեկություն չհայտնաբերեց ո՛չ եվրոպական և ոչ էլ հայաստանյան աղբյուրներում։ 

ԵՄ պաշտոնական կայքում նշված են կառույցի անդամակցության թեկնածու երկրները․ այս կարգավիճակը տրվում է այն երկրներին, որոնք  կառույցի օրենսդրությունը ներպետական օրենսդրությանն ինտեգրելու գործընթացում են գտնվում։ 

Թեկնածու երկրներն են Ալբանիան, Բոսնիա և Հերցեգովինան, Մոլդովան, Մոնտենեգրոն, Հյուսիսային Մակեդոնիան, Սերբիան, Թուրքիան, Ուկրաինան։ 

ԵՄ անդամակցության հնարավոր թեկնածուների ցանակում են Վրաստանն ու Կոսովոն․ այս կարգավիճակը ենթադրում է, որ երկիրը դեռևս չի կատարել ԵՄ անդամակցության պահանջները։ 

Այս ցուցակներից և ոչ մեկում Հայաստանի Հանրապետության անունն ընդգրկված չէ։  

Հատկանշական է, որ ԵՄ անդամակցության ընթացակարգի պաշտոնական նկարագրության մեջ նշվում է, որ կառույցի անդամ դառնալը «բարդ ընթացակարգ է, որը չի լինում մի գիշերում»։ 

ԵՄ-ին միանալ ցանկացող երկիրը պետք է նախ անդամակցության հայտ ներկայացնի Եվրոպական խորհրդին (European Council, չշփոթել Եվրոպայի խորհրդի՝ Council of Europe-ի հետ-խմբ.), որ խնդրում է Եվրոպական հանձնաժողովին գնահատել հայտատուի՝ 1993 թվականին ընդունված Կոպենհագենյան չափանիշներին համապատասխանությունը: 

Այնուհետև Հանձնաժողովի կարծիքի հիման վրա Խորհուրդը որոշում է կայացնում բանակցությունների մանդատի վերաբերյալ, ինչից հետո պաշտոնապես մեկնարկում են բանակցությունները՝ առանձին առարկաների շուրջ։ 

Այսպիսով, Հայաստանի՝ ԵՄ անդամակցության պաշտոնապես մեկնարկած գործընթացի մասին Տիգրան Խզմալյանի պնդումը չի համապատասխանում իրականությանը։  

*Նյութի հգրապարակումից հետո ԱԳՆ-ից պատասխանեցին մեր հարցմանը՝ տեղեկացնելով, որ ՀՀ և ԵՄ միջև անդամակցության հարց չի քննարիկվել։

Նանե Մանասյան

[easy-social-share buttons="facebook,twitter,vk,telegram" counters=1 style="icon" point_type="simple"]