ԱԺ նախագահը չի որոշում, թե ով որքան խոսի. Սիմոնյանը սխալվում է

Այսօր՝ դեկտեմբերի 20-ին, ԱԺ արտահերթ նստաշրջանում քննարկվում էր արտաքին հետախուզական ծառայություն ստեղծելու մասին օրենքի նախագիծը։ Զեկուցողի կողմից այն ներկայացնելուն և վերջինիս ուղղված հարցերին հաջորդեց մտքերի փոխանակությունը։

Ի թիվս մի շարք պատգամավորների, ելույթ ունեցավ նաև «Քաղաքացիական պայմանագիր» խմբակցության պատգամավոր Վլադիմիր Վարդանյանը։ Ելույթի ընթացքում ընդդիմադիր թևում լսվեցին դժգոհություններ՝ Վարդանյանի կողմից սահմանված ժամանակից երկար ելույթ ունենալու և ԱԺ նախագահի կողմից ՔՊ-ական պատգամավորին չընդհատելու մասով։

Ի պատասխան, ԱԺ նախագահ Ալեն Սիմոնյանը արձագանքեց, որ ելույթի համար նախատեսված ժամանակահատվածն ինքն է որոշում. «Իսկ դահլիճից պատգամավորներին խնդրում եմ ցուցումներ չտան, թե ժամանակը երբ ա ավարտվում, երբ չի ավարտվում։ Ես եմ դա որոշում, գնացեք կանոնակարգ օրենքը կարդացեք»։

«Փաստերի ստուգման հարթակն» ուսումնասիրեց Սիմոնյանի կողմից վկայակոչված օրենքը՝ պարզելու, թե որքա՞ն ժամանակ է, ի վերջո, հատկացվում պատգամավորներին մտքերի փոխանակության համար։

Մասնավորապես, ըստ ԱԺ կանոնակարգ սահմանադրական օրենքի 58-րդ հոդվածի՝ եթե մտքերի փոխանակության տևողությունը սահմանված չէ կամ Կանոնակարգով ելույթների համար այլ ժամկետ սահմանված չէ, ապա ելույթների համար հատկացվում է տասական րոպե:

Նույն օրենքի 62-րդ հոդվածի համաձայն՝ հարցի քննարկման տևողության մեկ ժամվա կամ 90 րոպեի դեպքում հարցերի և մտքերի փոխանակության ընդհանուր տևողությունը, ինչպես նաև զեկուցումների, հարցերի, պատասխանների և ելույթների համար հատկացվող ժամանակի բաշխումը սահմանվում է Աշխատակարգով, իսկ քննարկման այլ տևողության դեպքում՝ մեկ ժամվա ժամկետների համամասնությամբ, ԱԺ կամ Խորհրդի որոշմամբ:

Իսկ ԱԺ աշխատակարգի IV կետի 22-րդ և 23-րդ ենթակետերի կարգավորմամբ՝ եթե նիստում քննարկվող հարցի տևողությունը 1 ժամ է, ապա պատգամավորին մտքերի փոխանակության համար տրվում է մինչև երկուական րոպե ժամանակ։ ԱԺ նիստում հարցը 90 րոպե տևողությամբ քննարկվելու դեպքում մտքերի փոխանակության ընթացքում ելույթների համար հատկացվում է մինչև երեքական րոպե։

Հաշվի առնելով այն փաստը, որ մինչև Վլադիմիր Վարդանյանը ելույթ ունեցած մյուս պատգամավորներին 2 րոպե անց հիշեցվում էր ժամանակի ավարտի մասին՝ կարելի է պնդել, որ այս նիստում մտքերի փոխանակության համար հատկացվել էր 2 րոպե ժամանակ։ Բացառություն էր կազմում ԱԺ փոխնախագահ Ռուբեն Ռուբինյանը, որի ելույթը տևեց ավելի քան 3 րոպե, և այդ ընթացքում ոչ ոք չընդհատեց։

Այնուհանդերձ՝ օրենքն ու աշխատակարգը որևէ լիազորություն կամ իրավասություն չեն տալիս ԱԺ նախագահին ինքնուրույն որոշելու, թե մտքերի փոխանակության համար որ պատգամավորը որքան ժամանակ ունի ելույթ ունենալու։ Դա սահմանված է օրենքով և աշխատակարգով, որոնց համաձայն՝ բոլոր պատգամավորներն ունեն հավասար ժամանակ՝ մտքերի փոխանակության ընթացքում ելույթ ունենալու համար։

Սևադա Ղազարյան

[easy-social-share buttons="facebook,twitter,vk,telegram" counters=1 style="icon" point_type="simple"]