Ռուսաստանը չի հեռացվել ՄԱԿ-ի խորհրդից, Մոսկվայի անդամակցությունը կասեցվել է. ինչ է դա նշանակում

Միավորված ազգերի կազմակերպության Գլխավոր ասամբլեան ապրիլի 7-ին արտահերթ նիստի ընթացքում կողմ է քվեարկել ՄԱԿ-ի Մարդու իրավունքների խորհրդում Ռուսաստանի անդամակցության կասեցմանը:

Հայալեզու լրատվամիջոցների մի մասը, այդ թվում՝ «Ամերիկայի Ձայն»-ը, 365news.am-ը և այլ կայքեր, լուսաբանել է քվեարկությունը՝ հայտնելով, որ Ռուսաստանը հեռացվել է ՄԱԿ-ի Մարդու իրավունքների խորհրդից,: 

Բանաձևը իրականում կոչվում է «Ռուսաստանի Դաշնության իրավունքների կասեցումը` կապված ՄԱԿ-ի Մարդու իրավունքների խորհրդին անդամակցության հետ»: Քվեարկությունը տեղի է ունեցել 2006 թ.-ին ՄԱԿ-ի Մարդու իրավունքների խորհուրդը ձևավորող Գլխավոր ասամբլեայի բանաձևի հիման վրա: Դրանում, մասնավորապես, ասվում է, որ «Գլխավոր ասամբլեան քվեարկող անդամների երկու երրորդի մեծամասնությամբ կարող է կասեցնել Խորհրդի ցանկացած այն անդամի անդամակցությունը, որը թույլ է տալիս մարդու իրավունքների կոպիտ և համակարգված խախտումներ»։

ՄԱԿ-ի Մարդու իրավունքների խորհուրդը բաղկացած է 47 անդամ երկրներից, որոնցից յուրաքանչյուրն ընտրվում է Գլխավոր ասամբլեայի անդամների մեծամասնությամբ, գաղտնի քվեարկությամբ, երեք տարի ժամկետով և երկու անընդմեջ պաշտոնավարումից հետո անմիջապես վերընտրվելու իրավունք չունի:

Ռուսաստանը Խորհրդի ներկա կազմ է ընտրվել 2021-ին, մինչև 2023-ը։ Նախօրեին ընդունված որոշումը նշանակում է, որ Ռուսաստանը կզրկվի խորհրդում ձայնի իրավունքից, բայց կկարողանա ներկա գտնվել նիստերին։ 

Ի պատասխան այս բանաձևի ընդունման՝ ՄԱԿ-ում Ռուսաստանի ներկայացուցչությունը հայտարարել է, որ ՌԴ-ն որոշում է կայացրել ՄԱԿ-ի Մարդու իրավունքների խորհրդում անդամակցության վաղաժամ դադարեցման մասին:

58 երկրների հետ համահեղինակությամբ Ուկրաինայի առաջարկած բանաձևին աջակցել է 93 պետություն։ 24 պատվիրակություն դեմ է արտահայտվել, իսկ 58-ը ձեռնպահ է մնացել։ ՄԱԿ-ում Հայաստանի ներկայացուցչությունը չի մասնակցել քվեարկությանը:

Բանաձևի ստեղծման համար հիմք են հանդիսացել ուկրաինական Բուչա քաղաքում տեղի ունեցած իրադարձությունները: Ռուսական զորքերի հետ քաշվելուց հետո պարզվել էր, որ քաղաքում, ըստ պաշտոնական տվյալների, 300-ից ավելի խաղաղ բնակիչ է սպանվել: Պաշտոնական Մոսկվան հերքում է մեղադրանքները: 

Լուսինե Ոսկանյան

Մհեր Թարոյան

[easy-social-share buttons="facebook,twitter,vk,telegram" counters=1 style="icon" point_type="simple"]