310 քաղաքացի կորոնավիրուսի կեղծ պատվաստման սերտիֆիկատ և ՊՇՌ թեստերի կեղծ բացասական պատասխաններ է ստացել

Կորոնավիրուսային հիվանդության դեմ պատվաստումների կիրառման առաջին շրջանից ի վեր իրավապահ մարմինները մի քանի անգամ հայտարարել են տարբեր բժշկական հաստատությունների կողմից քաղաքացիներին տրված պատվաստման կեղծ հավաստագրերի վերաբերյալ ստացված հաղորդումների մասին։ 

Ավելի ուշ հայտարարվեց նաև, որ կեղծվում են նաև Հայաստան մուտք գործող օտարերկրացիների ՊՇՌ թեստերի բացասական պատասխանները։ 

Պատվաստման գործընթացի պատշաճ իրականացման համար վարչական լծակներ էր կարգադրել գործի դնել նաև վարչապետ Նիկոլ Փաշինյանը։ «Ազգային անվտանգության ծառայությանը և ոստիկանությանը. կեղծ պատվաստումների մասին ես էլ ահազանգ չլսեմ։ Ձերբակալե’ք, կալանավորե’ք։ Էդ բժիշկները, ովքեր որ օգտվում են առիթից չպատվաստելու մարդկանց և պատվաստանյութը փչացնելու համար… շատ խիստ միջոցներ ա պետք ձեռնարկել։ Գլխավոր դատախազին եմ դիմում, նաև՝ մեր քննչական մարմիններին»,- հայտարարել էր Փաշինյանը։

«Փաստերի ստուգման հարթակը» փորձել է ամփոփել կորոնավիրուսային հիվանդության դեմ միջոցառումների խախտումների և դրանց դեմ իրականացված գործողությունների վիճակագրությունը։ 

Կորոնավիրուսի դեմ պատվաստման կեղծ հավաստագրերի տրամադրման առաջին դեպքը, որի մասին իրավապահները հայտնել են, գրանցվել է նախորդ տարվա օգոստոսին, երբ Երևանի թիվ 5 պոլիկլինիկայի վիրաբույժն իր ծանոթին կորոնավիրուսի դեմ պատվաստման առաջին դեղաչափի ստացումը հաստատող փաստաթուղթ էր տվել՝ գումարի դիմաց։ 

Հաջորդ՝ ավելի աղմկահարույց հայտարարությունը տարածեց Ազգային անվտանգության ծառայությունը՝ հոկտեմբերին, երբ վեց քրեական գործ էր հարուցվել վեց բուժհաստատություններում գրանցված խախտումների կապակցությամբ։ Երեք անձ ձերբակալվել էր։ 

ԱԱԾ-ում և ոստիկանությունում հարուցվել են պատվաստման կեղծ սերտիֆիկատների վերաբերյալ շուրջ 20 քրեական գործեր, որոնցից 7-ը՝ ոստիկանությունում։ Գործերը գտնվում են նախաքննության փուլում։ 

Քրեական գործերը հիմնականում վերաբերում են Երևանի, Շիրակի, Արարատի, Գեղարքունիքի մարզերի բուժհաստատություններին, հիմնականում՝ պոլիկլինիկաներին առնչվող դեպքերին:

Հարուցված քրեական գործերով կեղծ պատվաստումների «շահառու» քաղաքացիները չեն ներգրավվել։ Ըստ նախնական տվյալների՝ պատվաստման կեղծ սերտիֆիկատներ կամ կորոնավիրուսի թեստի կեղծ բացասական պատասխաններ է ստացել ավելի քան 310 անձ:

«Փաստերի ստուգման հարթակն» արդեն անդրադարձել է չպատվաստված կամ ՊՇՌ թեստի բացասական պատասխան չներկայացրած աշխատակիցներ ունեցող տնտեսվարողներին տուգանելու դեպքերին։ Ընդհանուր առմամբ, այս խախտումների համար գործատուները տուգանվել են շուրջ 22 միլիոն 950 հազար դրամով։ Ոստիկանությունից «Փաստերի ստուգման հարթակին» հայտնեցին նաև, որ դիմակների կրման պահանջը խախտելու համար մինչ այժմ վարչական պատասխանատվության է ենթարկվել 28,260 անձ, իսկ տուգանքի ընդհանուր չափը կազմում է 282 մլն 750 հազար դրամ: 

Անի Ավետիսյան

[easy-social-share buttons="facebook,twitter,vk,telegram" counters=1 style="icon" point_type="simple"]