Վարչապետի մասին Արթուր Վանեցյանի պնդումն ԱԺ խմբակցությունները չեն հաստատում

Նոյեմբերի 20-ին «5-րդ ալիքի» եթերում հարցազրույցի ժամանակ «Հայրենիք» կուսակցության ղեկավար, ԱԱԾ նախկին պետ Արթուր Վանեցյանը հայտարարել է, որ վարչապետ Նիկոլ Փաշինյանը հերքել է Արցախում պատերազմի ժամանակ բացահայտված դավաճանների մասին իր ավելի վաղ արած հայտարարությունը։ 

«Ազգային ժողովի խմբակցությունների հետ հանդիպման ժամանակ պատգամավորներից մեկը հարցրել էր՝ իսկ ի՞նչ եղան էն դավաճանները։ Ասել էր՝ հա, էդ տեղեկությունը չհաստատվեց»,- հայտարարել է Արթուր Վանեցյանը։ Նիկոլ Փաշինյանի կողմից նման հայտարարություն անելու մասին Վանեցյանն ասել էր նաև նոյեմբերի 11-ին՝ 168․am-ին տված հարցազրույցի ժամանակ։ 

Խոսքը Նիկոլ Փաշինյանի՝ հոկտեմբերի 8-ի գրառման մասին է, որում վերջինս նշել էր, որ որոշ մարդիկ կռվող զինվորներին համոզել են, թե «Նիկոլը հողերը ծախել է, թե սա իրականում պայմանավորված պատերազմ է, ձեզ էստեղ բերել-մսաղացի մեջ են գցել, որ կոտորեն, որ պայմանավորվածությունը չերևա, դիրքերը պահելը իմաստ չունի»։ Փաշինյանը գրել էր, որ դրանից հետո որոշ զինվորներ թողել են դիրքերը։ ԱԱԾ-ն սկսել էր քննություն, ձերբակալվել էր Ստեփանակերտի բնակիչ։

Քանի որ Վանեցյանը պնդում է, որ վարչապետը դավաճանների մասին տեղեկությունները չհաստատվելու վերաբերյալ հայտարարությունն արել է ԱԺ խմբակցությունների հետ հանդիպման ժամանակ, «Փաստերի ստուգման հարթակը» կապ հաստատեց և՛ «Բարգավաճ Հայաստան», և «Լուսավոր Հայաստան» խմբակցությունների պատգամավորների հետ՝ այդ պնդման իսկությունը ճշտելու համար։ 

ԲՀԿ և ԼՀԿ ներկայացուցիչները չհաստատեցին Արթուր Վանեցյանի խոսքերը։

Նշենք, որ վարչապետ Փաշինյանը պատերազմի ընթացքում ԱԺ ներկայացուցիչների հետ երկու հանդիպում է ունեցել՝ հոկտեմբերի 11-ին ԱԺ խորհրդի անդամների հետ, և հոկտեմբերի 19-ին հրավիրված Անվտանգության խորհրդի նիստում, որին մասնակցում էին նաև ԱԺ խմբակցությունների ներկայացուցիչները։

Ազգային ժողովի «Լուսավոր Հայաստան» խմբակցության ներկայացուցիչը Fip.am-ին հայտնեց, որ պատերազմի ընթացքում ԱԺ պատգամավորների և Նիկոլ Փաշինյանի հետ հանդիպումների ընթացքում այդ թեմայով քննարկումներ չեն ծավալվել։ «Բարգավաճ Հայաստան» խմբակցության անդամ Արման Աբովյանը, որը ներկա է եղել Անվտանգության խորհրդի նիստին, մեզ հետ զրույցում նշեց, որ չի հիշում նման հարց․ «Այդ օրը, ընդհանուր առմամբ, քննարկվել էր օպերատիվ իրավիճակը և ռազմաճակատին վերաբերող այլ հարցեր»։

«Փաստերի ստուգման հարթակը» հարցում է ուղարկել նաև Ազգային անվտանգության ծառայություն՝ պարզելու, թե ի՞նչ փուլում է գտնվում գործի քննությունը։

Անի Ավետիսյան

[easy-social-share buttons="facebook,twitter,vk,telegram" counters=1 style="icon" point_type="simple"]