Oragir.News-ը սխալ է․ Երևանի քաղաքապետարանի կողմից հայտարարված գնման մրցույթն օրենքի խախտումով չի անցել

Օգոստոսի 8-ին Oragir.News-ը գրել էր, որ Երևանի քաղաքապետարանի կողմից «Երեխայի իրավունքների և շահերի պաշտպանություն» ծրագրի շրջանակներում անհրաժեշտ պարագաներ գնելու համար անցկացված մրցույթը տեղի է ունեցել օրենքի խախտումով, քանի որ եղել է նաև ավելի ցածր գին առաջարկող ընկերություն, սակայն հաղթող է ճանաչվել այլ ընկերություն։

«Գնումների մրցույթը տեղի է ունեցել օրենքի խախտումով, քանի որ եղել է նաև ավելի ցածր գին առաջարկող ընկերություն, սակայն հաղթող է ճանաչվել «Անի Մանուկյան Արմենի» ԱՁ-ն։ Մասնավորապես՝ «Մ․ Ա․ Կիրակոսյաններ ՍՊԸ»-ն հիշյալ պարագաների մատակարարման համար առաջարկել է 409․000 դրամ գինը, որը 190․000 դրամով պակաս է հաղթող ընկերության առաջարկած գնից, սակայն, ժողովրդավարության բաստիոն ինքնահռչակված Հայաստանի մայրաքաղաքի ղեկավարությունը որոշել է օրենքը խախտել և հաղթող ճանաչել «Անի Մանուկյան Արմենի» ԱՁ-ին»,— գրել էր լրատվականը։

Երևանի քաղաքապետարանը քաղաքապետարանի կարիքների համար տնտեսական ապրանքների փաթեթներ ձեռք բերելու համար այս տարվա հունիսի 17-ին մրցույթ էր հայտարարել, որին մասնակցելու համար հայտ էր ներկայացրել 5 ընկերություն՝ տարբեր գնառաջարկներով՝ «ԴԱՎՄՈՆԹ» ՍՊԸ (1 մլն 290,000 դրամ), «Տարոն Մաթևոսյան» ԱՁ (900,000), «Անի Մանուկյան Արմենի» ԱՁ (599․000), «Մ․ Ա․ ԿԻՐԱԿՈՍՅԱՆՆԵՐ» ՍՊԸ (409․000), «Երվանդ Սարգսյան Ռուդոլֆի» ԱՁ (632․000)։

Գնման ընթացակարգի հանձնաժողովի հայտերի գնահատման նիստի N3 արձանագրության համաձայն, հայտ ներկայացրած մասնակիցներից երեքի մոտ («Տարոն Մաթևոսյան» ԱՁ, «Անի Մանուկյան Արմենի» ԱՁ, «ԴԱՎՄՈՆԹ» ՍՊԸ) եղել են անհամապատասխանություններ։ Գնահատող հանձնաժողովը կառավարության N526-Ն որոշման 41-րդ կետի հիման վրա առաջարկել է շտկել դրանք։ 

Նկատենք՝ ըստ այդ որոշման, եթե հայտերի բացման նիստի ընթացքում իրականացված գնահատման արդյունքում մասնակցի հայտում արձանագրվում են անհամապատասխանություններ, ապա հանձնաժողովը մեկ աշխատանքային օրով կասեցնում է նիստը, իսկ հանձնաժողովի քարտուղարը նույն օրը դրա մասին էլեկտրոնային եղանակով տեղեկացնում է մասնակցին՝ առաջարկելով մինչև կասեցման ժամկետի ավարտը շտկել անհամապատասխանությունը:

Վերոնշյալ մասնակիցները սահմանված ժամկետում շտկել էին առկա անհամապատասխանությունները։

Նույն արձանագրության համաձայն՝ «Մ. Ա. ԿԻՐԱԿՈՍՅԱՆՆԵՐ» ՍՊ ընկերությունը՝ ի դեմս տնօրեն Լ. Կիրակոսյանի, հանդիսանում է նաև «Մաան» ՍՊ ընկերության տնօրենը, իսկ «Մաան» ՍՊ ընկերությունը մինչև հաջորդ տարվա՝ 2025-ի փետրվարի 10-ը ներառված է գնումների գործընթացներին մասնակցելու իրավունք չունեցող մասնակիցների ցուցակում, այսինքն՝ այս ընկերությունն ընդգրկվել է սև ցուցակում:

Հանձնաժողովն արձանագրել էր, որ «Մ. Ա. ԿԻՐԱԿՈՍՅԱՆՆԵՐ» ՍՊ ընկերության և «Մաան» ՍՊ ընկերության միջև առկա է փոխկապակցվածություն, քանի որ այս ընկերությունների 100% բաժնեմասի սեփականատերը և տնօրենը միևնույն անձն է: 

Ի դեպ, «Մաան» ՍՊ ընկերության նկատմամբ 2023 թվականի հուլիսից արգելանք է կիրառվել և նշանակվել է վարչական տույժ։ Մեկ տույժ կիրառվել է նաև այս տարի։

«Գնումների մասին» օրենքի համաձայն, գնումների ընթացակարգերին մասնակցելու իրավունք չունեն այն անձինք, որոնք հայտը ներկայացնելու օրվա դրությամբ ներառված են գնումների գործընթացին մասնակցելու իրավունք չունեցող մասնակիցների ցուցակում։ Կառավարության N 1593-Ն որոշման համաձայն, մասնակցի՝ օրենքի 6-րդ հոդվածի 1-ին մասի 6-րդ կետով նախատեսված ցուցակում ներառվելը, դրանում գտնվելու ժամանակահատվածում, ինքնաբերաբար հանգեցնում է վերջինիս հետ փոխկապակցված անձանց գնումների գործընթացին մասնակցության իրավունքի սահմանափակման, ուստի՝ գնահատող հանձնաժողովը որոշել էր «Մ. Ա. ԿԻՐԱԿՈՍՅԱՆՆԵՐ» ՍՊ ընկերության կողմից ներկայացված հայտը գնահատել անբավարար և մերժել:

Գնահատող հանձնաժողովի 2024 թ․ հուլիսի 17-ի թիվ 2 որոշմամբ ընտրվել է «Անի Մանուկյան Արմենի» ԱՁ-ի ներկայացրած հայտը։

Ընտրված մասնակցի՝ «Անի Մանուկյան Արմենի» ԱՁ-ի հետ պայմանագիրը կնքվել է 2024 թ․ օգոստոսի 7-ին։

Այսպիսով, Oragir.News-ի պնդումը, թե Երևանի քաղաքապետարանի կողմից «Երեխայի իրավունքների և շահերի պաշտպանություն» ծրագրի շրջանակներում անհրաժեշտ պարագաներ գնելու համար անցկացված մրցույթը տեղի է ունեցել օրենքի խախտումով, սխալ է։

Սյուզաննա Համբարձումյան