ՌԴ-ի, Ուկրաինայի ու Բելառուսի քաղաքացիները ոչ միայն ավելի շատ են գալիս, այլև ավելի շատ մնում են (ինֆոգրաֆիկա)

Ուկրաինայի տարածքում Ռուսաստանի նախաձեռնած ռազմական գործողություններով պայմանավորված՝ ՌԴ-ի, Ուկրաինայի և Բելառուսի քաղաքացիների հոսքը դեպի Հայաստան կտրուկ մեծացել է։ 

«Փաստերի ստուգման հարթակն» ամփոփել է պատերազմի մեկնարկից ի վեր՝ փետրվար-հուլիս ժամանակահատվածում այդ երկրների քաղաքացիների ժամանումների ու մեկնումների, դրանց տարբերության (միգրացիոն սալդո) վիճակագրությունը։ 

Այսպես, 2022 թվականի փետրվար-հուլիս ամիսներին Հայաստան է ժամանել 469,170 ՌԴ քաղաքացի։ Սա 2․2 անգամ ավելին է 2021-ի նույն ժամանակահատվածի համեմատ (209,112) ։ 

Մեկնածների և ժամանածների տարբերությունն այս ժամանակահատվածում կազմել է 75,356։ Նախորդ տարվա միգրացիոն սալդոն ՌԴ քաղաքացիների դեպքում ևս դրական է եղել՝ 33,149։ 

Ուկրաինայից Հայաստան ժամանումների թիվը 2022-ին փետրվար-հուլիսին նախորդ տարվա նույն ժամանակահատվածի համեմատ աճել է աննշան՝ 5%-ով․ եթե 2021-ին այդ թիվը կազմել էր 12,451, ապա 2022-ին՝ 13,107։ 

2022 թ. փետրվար-հուլիս ամիսներին Հայաստան է ժամանել նաև Բելառուսի 12,050  քաղաքացի՝ նախորդ տարվա 3558-ի փոխարեն, այսինքն՝ այդ թիվը աճել է ավելի քան 3 անգամ։ 

Այսպիսով, նախորդ տարվա նույն ժամանակահատվածի համեմատ աճել է ՌԴ-ի, Ուկրաինայի, Բելառուսի քաղաքացիների ելքերի ու մուտքերի թիվը։ Ինչպես նաև աճել է մուտքերի և ելքերի տարբերությունը, ընդ որում, տոկոսային արտահայտությամբ ամենից բարձր աճը գրանցել է Բելառուսը:

Նանե Մանասյան

[easy-social-share buttons="facebook,twitter,vk,telegram" counters=1 style="icon" point_type="simple"]